Айни пайтда бутун дунёдаги кўплаб мусулмонлар қаторида ўзбекистонлик зиёратчилар ҳам Арафот тоғида ҳаж амалларини бажаришмоқда. Бугун ҳаж зиёрати чоғида муфтий Нуриддин Холиқназаров бошчилигидаги ўзбекистонлик зиёратчилар футбол бўйича миллий терма жамоа ғалабаси ҳаққига дуо қилишди.
"Бу шунчаки ўйин эмас. Бу ерда ватан шарафи турибди, юрт обрўси турибди. Улар биздан дуо умидида туришибди. Футбол жамоамизга Аллоҳ таолонинг Ўзи мададкор бўлсин. Илоҳим, юртимизни шаънини бутун дунёга тарацинлар. Аллоҳ уларга куч-қувват берсин. Ҳар бир қадамларини Аллоҳ ўткир қилсин. Бутун дунёга бизни танитишликда Аллоҳ мададкор бўлсин. Уларни ёмонликлардан, касалликлардан, ёмон кўзлардан Аллоҳнинг Ўзи сақлаб, Ўзи ҳимоя қилиб турсин. Аллоҳим мана шу ҳожиларнинг дуолари ҳурматидан уларга ғалаба ато қилсин", деб дуо қилди муфтий Нуриддин Холиқназаров.
Футбол бўйича Ўзбекистон миллий терма жамоаси жаҳон чемпионати йўлида бугун 5 июнь куни Абу-Даби шаҳрида БАА терма жамоасига қарши майдонга тушади. Ўйиндаги ғалаба ёки ҳар қандай ҳисобдаги дуранг Ўзбекистон миллий терма жамоасига 2026 йили АҚШ, Канада ва Мексикада бўлиб ўтадиган жаҳон чемпионатига тўғридан-тўғри йўлланмани тақдим қилади.
