A seriya. «Inter» «Piza»ni «xokkeycha» hisobda mag‘lub etdi (videosharh)

Italiya A Seriyasining 22-turi doirasidagi ilk uchrashuvda «Inter» o‘z maydonida «Piza»ni qabul qildi. Bellashuv Milan shahridagi «San-Siro» stadionida bo‘lib o‘tdi. Mezbonlar o‘yin davomida 0:2 hisobida ortda qolib ketganiga qaramay, kambek amalga oshirib, 6:2 hisobida g‘alaba qozondi.

Uchrashuvda hisobni 11-daqiqada «Piza» yarim himoyachisi Stefano Moreo ochdi. 23-daqiqada u dubl muallifiga aylandi.

39-daqiqada «Inter» xavbeki Pyotr Zelinski penaltini aniq ijro etib, hisobni qisqartirdi. Ikki daqiqa o‘tib, Lautaro Martines muvozanatni tikladi. 45+2-daqiqada Franchesko Espozito «Inter»ni oldinga olib chiqdi.

82-daqiqada Federiko Dimarko to‘rtinchi golni urdi, 86-daqiqada esa Anj-Yoan Bonni hisobni 5:2 ko‘rinishiga keltirdi. Qo‘shimcha daqiqalarda Genrix Mxitaryan gol urib, uchrashuvdagi yakuniy hisobni o‘rnatdi — 6:2.

Ushbu g‘alabadan so‘ng «Inter» 22 o‘yindan keyin 52 ochko to‘plab, turnir jadvalida birinchi o‘rinda qolmoqda. «Piza» esa 14 ochko bilan 20-o‘rinda joylashgan.

Keyingi turda «Inter» 1 fevral kuni «Kremoneze»ga qarshi maydonga tushadi, «Piza» esa bir kun oldin «Sassuolo» bilan kuch sinashadi.

Italiya A Seriyasi, 22-tur
23 yanvar 2026 yil, juma
Milan, «San-Siro» («Juzeppe Meassa»)
«Inter» — «Piza» — 6:2
Gollar: 0:1 — Moreo (11), 0:2 — Moreo (23), 1:2 — Zelinski (39, pen.), 2:2 — Martines (41), 3:2 — Espozito (45+2), 4:2 — Dimarko (82), 5:2 — Bonni (86), 6:2 — Mxitaryan (90+3)