Grigoriy Kolosovskiy: «Samvel Babayan — «Lokomotiv» jamoasi va murabbiylar shtabi rahbari»

Superligada 24-tur o‘yinlari start oldi. «Lokomotiv» jamoasi bu tur safarda «Dinamo»ga qarshi bahs olib bordi va 2:1 hisobida g‘alaba qozondi. Bellashuvdan so‘ng jamoa bosh murabbiyi Grigoriy Kolosovskiy matbuot anjumanida ishtirok etdi.

— Og‘ir o‘yin bo‘ldi. Ikki tomon uchun ham. Ikkala jamoa ham g‘alabani istadi, biroq bizga omad kulib boqdi. Xohish ham bizda ko‘proq edi. So‘nggi daqiqalarda tavakkal qilib g‘alabani ilib ketdik. Biz oxirigacha kurashish va 3 ochko uchun kelgan edik.

— Jamoaning elitada qolish imkoniyati qanday?

— Imkoniyat har doim bor. Albatta, raqiblar ham uxlayotgani yo‘q. O‘zimizda vaziyatdan chiqish uchun kuch topishimiz kerak. Bunday katta va tarixga ega jamoa ligada qolishi uchun harakat qilamiz.

— Samvel Babayan bugun qaydnomaga klub rasmiyi sifatida kiritildi. U sizga yordam beradimi?

— Ha, u bu jamoa va murabbiylar shtabi rahbari. Strategiyani va o‘yinlar uchun taktikani belgilab beradi. Samvel Babayan klubda faoliyat olib bormoqda.

— Futbolchilarning bor kuchini maydonga tashlab chiqib ketgani haqida fikringiz?

— Albatta, ko‘p narsa o‘xshamadi. Ko‘prog‘ini istagan edik. Yakunda, ishtiyoq evaziga g‘alabani ilib ketdik. Bizga jismoniy tayyorgarli pand bermoqda, ammo xarakter ko‘rsatdik.

— Sanjar Tursunovning qaydnomada yo‘qligi nima bilan bog‘liq?

— Bu klubning ichki ishi. Buni hal qilamiz. U jamoa sardori. Biz bilan emasligi yaxshi emas. U biz bilan bo‘lishi kerak.