Liga «Lokomotiv» stadionidagi qurilish ishlari bilan tanishdi

«Lokomotiv» klubi keyingi mavsumga tayyorgarlikni hozirdan boshlab yuborgan. Liga vakillari «Lokomotiv» stadionida bo‘lib, u yerdagi qurilish ishlari bilan tanishdi.

Ayni damda klub o‘z uy stadionini keyingi mavsumga tayyorlash maqsadida katta hajmdagi ishlarni amalga oshirmoqda. Jumladan, «Lokomotiv» stadioni maydonining chimi, drenaj qismi to‘liq yangilanmoqda. Bundan tashqari, stadion projektorini amaldagi talablarga mos ravishda to‘liq yangilash rejalashtirilmoqda. Majmuaning qolgan qismlari ham to‘liq ta’mirlanadi.

«Lokomotiv» klubi asosiy stadion ta’miri bilan cheklanib qolayotgani yo‘q. Klub o‘z arenasi yonginasidagi 2-sonli sport maktab hududida, muassasa bilan kelishgan holda tabiiy, zamonaviy drenaj tizimiga ega mashg‘ulot maydoni qurishni boshlab yuborgan. Kelishuvga ko‘ra klub sport maktabi tarbiyalanuvchilari uchun alohida sun’iy maydon qurib beradi. Bolalar uchun mo‘ljallangan maydon qurilishining asosiy qismi o‘z nihoyasiga yetib ulgurgan.

Ma’lumki, «Lokomotiv» klubining qarorgohi asosiy stadion yonida joylashgan. Klub endi shu huddudda mashg‘ulot maydoni ham barpo etmoqda. Qurilish ishlari yakuniga yetgach, «Lokomotiv» klubining qarorgohi, mashg‘ulot maydoni va uy uchrashuvlarini o‘rkazadigan stadioni bir huddudda joylashadi. Bu esa o‘z navbatida futbolchilar uchun qulaylik yaratadi.

Klub yoshlar jamoalarini rivojlantirish bo‘yicha boshqa rejalarini ham Liga bilan baham ko‘rdi. Liga bir tizim bo‘lib ishlaydigan va uzoq muddatli rejalar asosida harakat qiladigan klublarni doim olqishlaydi.