Миллионлар ўйини ишқибозлари жаҳон футболининг юлдузлари ҳақида жуда кўплаб маълумотларни билишади. Хориж матбуоти футболчилар ҳақидаги икир-чикир маълумотларгача етказиб беришлари ҳеч кимга сир эмас. Яъни Роналду ёки Месси каби юлдузларнинг ҳаёти мунтазам равишда омма эътиборида бўлади. Афсуски ўзимизнинг футболчилар ҳақида мухлислар деярли ҳеч нарса билишмайди. Юртимизда ва хорижда фаолият кўрсатаётган футболчиларимизнинг бўш вақтларини қандай ўтказишлари ҳақида тўхталиб ўтишга қарор қилдик. Ёдда тутингки бу футболчиларнинг шахсий ҳаётларига бурун суқиш эмас, аксинча футболчилар ҳам тирик жонлиги ҳақида. Яъни улар ҳам бўш вақтларини мазмунли ўтказишни хоҳлашлари табиий, албатта.
ХХI аср интернет асри. Интернет оламига сайр қилишни ким ҳам ёқтирмайди дейсиз? Айниқса футболчилар ҳам вақт топишлари билан интернет оламига кириб сайр қилиб туришади. Мирзакамол Камолов, Воҳид Шодиев, Зафар Полвонов, Сардор Мирзаев, Ботир Қораев каби футболчиларни айнан мана шундай тоифага киритсак бўлади. Бугунги кунда энг оммавий ўйин ҳисобланадиган “Play Station” ихлосмандлари жуда ҳам кўп. Виртуал оламда севимли жамоасини танлаб, ёмон кўрадиган клубини мағлубиятга учратиб роҳатланишнинг завқи ўзгача албатта. Озарбайжонда дарвозабонларни додлатиб юрган Баҳодир Насимов, МДҲ кубоги, ёшлар ўртасидаги мундиалда мухлис ва мутахассислар назарига тушган Жамшид Искандаров, бир пайтлар Словак ва чех клубларида тўп суришга улгурган Азиз Ибрагимов, ҳамда таниқли маҳаллий футболчиларимиз Ислом Тўхтахўжаев, Иқбол Акрамов, Лочин Солиев, Павел Смоляченколар виртуал футбол ўйнашни ўзларининг жону диллари деб биладилар.
«Қашқирлар макони», «Титаник», «Шерюрак» каби фильмларни деярли ҳаммамиз севиб томоша қилганмиз. Кино кўришни ўз хоббилари сифатида билувчи футболчиларимиз сони ҳам кам эмас. Леонид Кошелев, Шавкат Раимқулов, Фозил Мусаев, Абдумажид Тоиров, Илёс Қурбонов, Виталий Денисов, Достон Абдураҳмонов кино деса ўзларини томдан ташловчилар сафига киришади. Витя шунингдек бўш вақтларида дўстлари билан бильярд ўйнаб ҳам ҳордиқ чиқариб туради. Ҳақиқий бильярдшунос сифатида терма жамоамиз мураббийи ва футболимиз фахри Миржалол Қосимовни келтириб ўтишимиз мумкин. Агар “ўзбек марадонаси” бильярд баҳсларида ҳақиқий рақибларни излаётган бўлса, биз унга Самандар Шодмонов, Музаффар Умрзоқов, Ҳамза Каримов ва Шерзод Каримов сингари футболчиларни тавсия қилган бўлардик. Ҳар ҳолда улар ҳам бильярд ўйинининг ҳақиқий ихлосмандлари саналишади.
Журналистлар ёзадиган ҳар бир мақолани диққат билан ўқиб, футбол нашрларининг деярли ҳеч бирини қолдирмай ўқиб борувчи футболчиларимиз ҳам бор экан. Воҳид Шодиев, Мўйдин Мамазулунов, Аббос Шодмонов, Илҳом Шомуродов, Асқар Муҳиддинов ва Рустам Қодировни киоскаларда газета харид қилишаётганларини кўриб қолсангиз ажабланманг, улар шунчаки ўз хоббилари билан шуғулланишаётган бўлишади.
Кучли жинс вакилларининг энг севимли машғулоти қайси деб сўрасак шубҳасиз кўпчилик албатта машина бошқариш деб жавоб бериши тайин. Бу борада айниқса терма жамоамиз етакчилари ажралиб туришади. Темур Кападзе, Игнатий Нестеров, Марат Бикмаев ўз машиналарига ўтириб, шаҳар бўйлаб сайр қилишни хуш кўришади. Шунингдек, Ғайрат Жўраев ва Илҳом Юнусов ҳам машина бўйлаб сайр қилиб бўш вақтларига мазмун киритишади.
Асрор Алиқулов, Саҳоб Жўраев, Исроил Эргашев ва Акмал Холматов бўш вақт топишса “плоский” экран телевизорларини ёқиб ойнаи жаҳонга термулишади. Ҳа, улар кўпроқ футбол томоша қилишса керак. Бугунги кунда китоб ўқувчи ёшлар сони камайиб кетаётгани ҳеч кимга сир эмас. Аммо бу юртимиздаги футболчиларга тегишли эмас. Мексика майдонларида жавлон уриб, россиялик мутахассисларнинг диққат эътиборига тушган Темур Ҳакимов ва «Пахтакор»нинг ўтган мавсумда тўпурари бўлган Темурхўжа Абдухолиқовлар футболчилар китоб ўқишмайди деган фикрларни рад этишади. Ҳа, улар саргузашт ва детектив асарларни мутолаа қилиб ҳордиқ чиқаришади. Самуэл Это’О ва Юрий Жирков билан бирга тўп сурган Одил Аҳмедовни бўш вақти бўлса театрда учратиб қолишингиз ҳеч гап эмас. Мабодо унга мураббийлик фаолияти билан барчага таниш бўлган Ислом Аҳмедов ҳамроҳлик қилаётган бўлса билингки, улар футболдан ташқари фақат театр ҳақида суҳбатлашишади. Ахир иккаласи ҳам театрнинг ҳақиқий ихлосмандларида.
Максим Шацких десак ҳозир кўпчиликнинг кўз олдида балиқ ови гавдаланади десам асло муболаға бўлмайди. Аммо бизда балиқ ови ишқибозлари етарлича топилади. Мабодо Максим балиқ овлашга ҳамроҳ қидириб қолса, биз унга Аюпхон Гаппаров, Илҳом Суюнов ва Азизбек Ҳайдаровни тавсия қилишимиз мумкин, улар ҳам балиқни овлашда Максда қолишмайдилар.
Ўтган йил якунларига кўра юртимиздаги энг кучли футболчи сифатида тан олинган Санжар Турсуновни бўш вақтида бассейндан топиш мумкин. Владимир Козак ҳам Санжар сингари мазза қилиб чўмилишни футболдан кейинги иккинчи ўринга қўяди. У шунингдек дадаси билан балиқ овига ҳам чиқиб туради. Жаҳонгир Жиямуродов табиат қўйнида дам олишни ёқтиради. Айниқса тоғ қўйнида қўлбола кабоб пишириш жону дили. Юртимиздаги энг тезкор футболчиларимиздан бири Иван Нагаев бўш вақти бўлса бўлди ака-ука Кличколар жангини томоша қилади. Шунингдек, Юрий Цой сайр қилишни, Фозил Мусаев эса мусиқа тинглашни хуш кўришади. Айрим футболчилар борки, улар бўш вақтлари бўлса, дарров оила давралари сафига ошиқадилар. Бундай футболчилар бизда ҳам оз эмас. Ғайрат Ҳасанов, Носир Отақўзиев, Фарҳод Тожиев, Суҳроб Неъматов, Ислом Иномов, Асқар Жадигеров, Элёр Жаҳонов, Ислом Иномов, Иля Илин, Ринат Байрамов, Эркин Бойдуллаев ана шундай футболчилар тоифасига киришади. Улар шунингдек вақтларини дўстлари даврасида ўтказишни ҳам ёқтирадилар.
Мана, азиз ўқувчилар айрим ўйинчиларимизнинг дам олиш фурсатларига қандай мазмун олиб келишлари билан танишиб олдик. Аслида биз учун энг муҳими футболчиларнинг майдондаги ҳаракатлари. Бўш вақтларини қандай ва қаерда ўтказиш эса уларнинг иҳтиёрларига ҳавола. Нима дедингиз?
Фурқат Юсупов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
