АПЛдаги «бирровчилар»

Кўпинча мураббийлар кутилган натижани қайд эта олишмаса, муддатидан аввал истеъфога чиқарилади. Бўш қолган ўринни эса вақтинча ўртачароқ даражадаги ёки, у қадар машҳур бўлмаган мутахассислар эгаллашади. Уларнинг асосий вазифаси - янги мураббий келгунига қадар клубни бошқариб туришдан иборат. Сўзимизга «Манчестер Юнайтед» устози Оне Гуннар Сулшер яққол мисол бўла олади. У деярли бажариб бўлмас вазифанинг уддасидан чиқишга мувфффақ бўлди. Бугун АПЛ да вақтинчалик мураббий сифатида ютуқларга эришган бошқа мураббийларга тўхталиб ўтамиз

Ди Матео

Лондоннинг «Челси» клубини вақтинча бошқарган мураббий клубнинг яқин ўтмишдаги энг катта совринини қўлга киритган мураббий сифатида тарихда абадий қолади. Соддагина, камгап мураббий «Челси» билан Европа чемпионлар лигасида ғолиб бўлган йили «Барселона», «Бавария» сингари жамоаларни мағлубиятга учратган эди. Энг қизиғИ шундаки, ўша «Челси» Абрамович давридаги таркиб жиҳатидан энг кучсизи сифатида тан олинган эди. 2011-йилда Виллаш Боашнинг омадсиз стартидан сўнг клубга вақтинча таклиф этилган мураббий ўзининг илк мавсумидаёқ ЙЧЛдан ташқари Англия кубогини ҳам қўлга киритгани тахсинга сазовор. Афсуски, кейинги мавсумдаги омадсиз мавсум эвазига кўп ўтмай номдор мураббийга ўз ўрнини бўшатиб берди. Шунга қармасдан, бу инсон футбол мухлислари томонидан халигача баҳс ва мунозараларга сабаб бўлиб келмоқда.

Тони Бартон

Катта ёшдаги мухлисларимиз яхши билишса керак, «Астон Вилла» 1981-82-йилги мавсумларда Чемпионлар Лигасида АПЛнинг амалдаги чемпионлари сифатида иштирокини бошлаган Рон Сандерс шогирдлари ички чемпионатда бирин-кетин мағлубиятларга учрай бошлайди. Клуб уни истеъфога чиқаради ва унинг ёрдамчиси Тони Бартонни вақтинчалик мураббий эътиб тайинланади. Бартон клуб тепасига келганида «Астон Вилла» АПЛда 18-поғонада борар, ЙЧЛ да ҳам мақтагулик ўйин кўрсатмаётган эди. Тони жамоанинг тактик ва стратегик ўйин услубини тубдан ўзгартиради ва асосий эътиборни ёшларга қаратади. Оқибатда, клуб ўша йили ЙЧЛда финалда кимсан «Бавария»ни енгиб янги тарих яратади. АПЛ да эса, 11-бўлиб финишга етиб келганига қарамасдан, мухлислар Тони Бартоннинг тўлақонли мураббий этиб эълон қилинишини раҳбариятдан талаб қилишади. Бартон бундай катта босимни кўтара олмайди ва орадан 2 йил ўтиб қониқарсиз натижалар сабабли ишдан олинади…

Гус Ҳиддинг

Голландиялик мураббий 2008-09 – йилги мавсумларда «Челси»ни боши берк кўчага олиб кириб қўйган Сколарининг ўрнини вақтинчалик эгаллайди. У қисқа муддат ичида клубни фантастик даражага олиб чиқа олди, - деб беъмалол айта оламиз. Ўша йили Ҳиддинг 22 та учрашувда жамоасини майдонга олиб тушган бўлса, атиги бир бор мағлубиятга учрайди. Ўша мағлубият ҳам «Барселона»га қарши кечган уй учрашувида эди. Ҳакам томонидан белгиланмаган 6 та пеналти ва Иниестанинг сўнгги дақиқалардаги голи билан кўпчиликнинг ёдида қолган учрашувда Ҳиддинг шогирдлари «Барса»дан анчагина кучлироқ кўрингани ҳеч кимга сир эмас. Голландиялик мутахассис ўша мавсум омадсиз стартга қарамасдан, Англия кубогида зафар қучади ва АПЛ ғолибидан 7 очко кам тўплаб 3-ўринда мавсумни якунлайди. Абрамович ажойиб «камбекни» амалга оширган мураббийга тўлақонли шартнома таклиф этади. Қаҳрамонимиз эса, рад жавобини берганча, Россия терма жамоасини бошқариш учун Москвага йўл олади.

Крейг Шекспир

2015-16-мавсумни жуда яхши эсласа керак. Ўшанда «Тулкилар роса томоша кўрсатишган»эди. Клаудио Раниери бошчилигидаги «Лестер» чемпионликни қўлга киритган, бутун дунёнинг эътибори шу жамоада эди. Шекспир ўша мавсумда Раниерига ёрдамчи сифатида фаолият олиб борган бўлса, кейинги мавсумдаги омадсиз учрашувлардан сўнг жамоани тарк этган италиялик мутахассиснинг ўрнини вақтинчалик эгаллайди. Ўша мавсумда Шекспир кетма-кет 5 та турда ғалаба қозонади ва жамоани элитада сақлаб қолади. Чемпионлар Лигасида ҳам «Севилия» клубини турнирдан чиқариб юборган «тулкилар» бир қарашда яна ўзларига келиб олгандай таассурот уйғота бошлайди… Ўша мавсум сўнгида Британия матбуоти Шекспирни «мавсум кашфиёти»,- дея эълон қилгани ҳеч кимни ажаблантирмаган эди. Минг афсуски, кейинги мавсумдаги омадсиз старт учун қаҳрамонимизга чиқиш эшиклари кўрсатиб юборилади. Шекспир қисқа муддат ишлаган бўлсада, ўз услуби ва мураббийлик ҳислатларини яққол кўрсатиб бергани учун бу рейтингимиздан жой олди.