ЕЧЛ. «Ливерпуль» ишончли ғалабани қўлга киритди (видеошарҳ)

Европа чемпионлар лигасининг чорак финал босқичи доирасида дастлабки ўйинлар бўлиб ўтди. Қуръада омади чопган "Ливерпуль" дастлабки ўйинда ишончли ғалабани қўлга киритди.

Мерсисайдликлар учрашувнинг 5-дақиқасидаёқ "Порту" дарвозасини ишғол қилишди: Наби Кейта жарима майдончаси ташқарисидан йўлланган зарба рикошет орқали голга айланди.

Биринчи бўлим ўрталарида Муҳаммад Салоҳ рақиб дарвозабони билан яккама-якка вазиятга чиқиб, имкониятдан фойдалана олмади. Орадан кўп ўтмасдан эса Роберто Фирмино чиройли комбинациядан унумли фойдаланиб, ҳисобдаги фарқни 2тага оширди.

Танаффусга қадар ҳисоб яна ўзгариши мумкин эди. Португалияликлар ҳужумчиси Марега иккита қулай имкониятдан фойдалана олмаган бўлса, бир марта Фирмино қулай вазиятни кўкка совурди.

Иккинчи бўлимда "Ливерпуль" тўп назоратини ўзида ушлаб қолган бўлса, меҳмонлар кўпроқ ҳимояланишди.

Шу тариқа, Юрген Клопп шогирдлари жавоб ўйини олдидан ажойиб имкониятга эга бўлишди. Жавоб баҳси 17 апрель куни Португалияда бўлиб ўтади.

Европа чемпионлар лигаси, чорак финал, дастлабки ўйин
Ливерпуль Англия – Порту Португалия 2:0 (2:0, 0:0)
Голлар: 1:0 – 5 Кейта, 2:0 – 26 Фирмино.
Ливерпуль – Алиссон, Александер-Арнолд, Ловрен, ван Дейк, Милнер, Хендерсон, Фабиньо, Кейта, Салоҳ, Фирмино (Старридж, 82), Мане (Ориги, 73).
Порту – Касильяс, Макси Перейра (Фернандо, 77), Фелипе, Эдер Милитао, Корона, Данилу Перейра, Оливер Торрес (Бруну Кошта, 73), Теллес, Отавио, Соарес (Браими, 62), Марега.
Огоҳлантиришлар: Соарес (17), Фелипе (61).