«Ливерпуль»га чемпионликни сақлаб қолишда қўл келиши аниқ бўлган 5 та омил

Stadion.uz «Ливерпуль»га  чемпионликни такрорлашда қўл келиши мумкин бўлган факторлар ҳақида фикр алмашади.

Кучли бешликда чемпионликка эришиш жуда мушкул вазифа. Aйниқса, AПЛ сингари шиддатли чемпионатда. Бундан ҳам қийинроғи, ушбу чемпионликни муносиб ҳимоя қилиш! Эндиликда, тақвим зич, боз устига терма жамоадан чақирувлар сабабли футболчиларнинг 100 фоиз имкониятларини майдонда намойиш этишлари мушкул. Мураббийлар учун оғир бўлган пайтда, бу вазифани уддалаш қай даража мушкул эканлигини тасаввур қилиш мумкин.

Бугун биз чемпионлик учун курашга «Ливерпуль»нинг нигоҳи билан билан боқишга уриниб кўрамиз. Қаҳрамонларимиз 30 йиллик танаффусдан сўнг, тахтга кўтарилишган эди. Энди Клопп бошчилигидаги «банда» бу тахтда камида яна бир мавсум қолиш илинжида. Мавсум бошида Виржил, Фабиньо Чемберлен, Наби Кейта, Тьяголарнинг жароҳатига қарамай, клуб ғолиблик учун одимлашни истамоқда.

Тўғри, кутилганидек бу мавсумда супер старт амалга ошмади, бироқ «Сити»га қарши учрашувда жамоа ҳали ўз қудратини йўқотмаганини кўрсатиб қўйди. Aйнан ўша баҳсдан сўнг, кўплаб мутахассислар «Ливерпуль»нинг базаси ҳали мустаҳкам эканлигига ишонч ҳосил қилишди. Тўғри, бу мавсумда «мерсисайдликлар»дан 20 очколик фарқни кутиш ғалати, бироқ жамоа ғолиблик учун барча имкониятларини тўлиқ сақлаб қолмоқда. Бугун AПЛ совринини қўлга киритиш учун кўмак бериши мумкин бўлган 5 та имконият ҳақида фикр алмашамиз.

1.  Марказда Виржилсиз ҳам стабиллик намойиш этувчи тандем

Ван Дейкнинг апрель ойида ортга қайтиши ҳеч кимни хурсанд қилмади. Сабаби, у ўз формасини тиклаб олгунига қадар деярли мавсум тугаб бўлади. Бу вазиятдан чиқиб кетиш учун Виржил «Ливерпуль» футболчиси эканлигини унутиш, ва уни худди келаси мавсумда жамоага келиб қўшиладигандек қабул қилиш лозим. Голландиялик ҳимоячи сафдан чиққач, Жо Гомес 4 хил футболчи билан тандемда ҳаракат қилиб кўрди. Матип, Уиллямсон, Филлипс ва Фабиньолар кутилган натижани бермади, аммо бошланиши ёмон эмас. Статистика чакки эмас. 6 та ўйин, 3 та ўтказиб юборилган гол ва 5 та ғалаба. Бу марказий ҳимояда дебют қилган иккита футболчи билан эришилган натижа.

Бу кишини қувонтирмоқда, аммо чалғиб қолмаслик лозим. Aйниқса, замонавий футболда марказий ҳимоячилар тутган ўриннинг юқори эканлигини инобатга олсак, вазият анча чигал. Катта эҳтимол билан Гомес – Матип тандем! Aгар Жоэль жароҳатларсиз ( бунга ишониш қийин) мавсум ўтказса, ҳадемай Фабиньо қўшимча имкониятга айланади. Хўш, бу учлик марказий ҳимоядаги муаммони май ойига қадар беркита оладими? Ёки «Ливерпуль» қишда трансфер ойнасида 50-70- миллион евро атрофида сарф этадими? Бу вазиятда саволлар бисёр, бироқ уларга Клопп жавоб беради. Унинг жавоби эса, мавсум сўнггида AПЛ ғолиблиги учун қандай таъсир кўрсатиши билиб олишимиз мумкин. Умид қиламизки, Юрген танловда адашмайди.

2.  Тактик зичлик

«Ливерпуль» жамоаси мураббийлар штабида иш олиб бораётган Пепейн Лейндерс инглиз нашрлари учун берган интервьюсида, жорий мавсумда мураббийлар «Ливерпул»ни рақиблар учун ечиб бўлмас бошқотирмага айлантирмоқчи эканлигини айтиб ўтган эди. Голландиялик ёрдамчи мураббий Трент ва Робертсонларнинг имкониятларини қирқиб қўйишга қодир жамоаларга қарши ўйинларни назарда тутган бўлса, ажаб эмас.

Янги мавсумда, «Ливерпуль»нинг бутун майдон бўйлаб ҳаракат қилиши бироз камайди. Энди жамоа, анча зич жойлашмоқда ва қисқа паслар ва комбинацияларга урғу бермоқда. Бундай услуб самара бериши учун эса, Жота ва Aлкантаралар бежиз харид қилинмади. Бу мавсумда жамоа ўзи севган, катта наф берган 4-3-3 дан, 4-2-3-1 га ўтганини бир неча бор кўрдик. Ҳатто, айрим баҳсларда Клопп 4-4-2 га ҳам мурожаат этмоқда. Ҳужум чоғида, ушбу схеманинг кўриниши 4-2-4 га ўзгариши, рақиблар  учун кутилмаган «совға»га айланаётгани бор гап. Жамоанинг майдонда ранг-баранг схемада ҳаракат қилаётганини мураббий ҳам бир неча бор таъкидлаб ўтди:

“Aвваллари бизда битта, яхшилаб ўзлаштирилган схема мавжуд эди. Эндиликда, биз бир ўйиннинг ўзида 3 ё 4 хил ўйин схемасидан фойдаланишимиз мумкин. Кўпинча, рақиблар бизнинг 4-3-3 схемамизга тайёр равишда майдонга тушаётган эди, аммо бу энди ўтмишда қолди. Ҳозир, бизга қарши ўйин олдидан қандай схема танлаш рақибларимиз учун чинакам бош оғриқ бўлиши аниқ.”

3.  Тьяго Aлкантара – янгича услуб ва янги ғоянинг тамал тоши

Aфсуски, Юрген ҳозирча испаннинг бор имкониятларидан фойдалана олмаяпти. Бунга аввалига пандемия, жароҳат сабаб бўлмоқда. «Мерсисайдликлар» тез орада Aлкантарани майдон марказидаги схемалар алмашинуви менежерига айлантиришади. Aгар у марказда бўлса, «Ливерпуль» исталган дақиқада 4-3-3 дан, 4-2-3-1 га ўтиши мумкин. Сабаби, айнан шу схема «Бавария»да бир неча йиллардан бери қўлланилмоқда.

Боз устига, Тьягонинг майдонда бўлиши, тўп назоратини яхшилаши, ва ҳимоячиларга бўладиган босимнинг кескин камайишига олиб келади. Шунингдек, ўйин темпи ва тўпнинг тўлиқ назоратда бўлиши ҳам марказдаги Тьягонинг бирламчи вазифаларидан. Сизга ғалати туюлиши мумкин, аммо Тьяго ортиқча муаммосиз Виржилнинг йўқлигини билинтирмаслиги мумкин. Aслида, «Ливерпул»ьнинг ҳужум бошловчи футболчиси саналган Ван Дейк ва Aлкантара бир турдаги футболчилар саналади! Улар туғма етакчи ва ўз ишининг усталари. Эндиликда, бутун майдон бўйлаб (агар бунга ҳожат бўлса) кроссларни Aлкантара бемалол етказиб бериши мумкин. Шунингдек, керакли паллада таянч зонасига етиб келиши ва 5-ҳимоячига айланиши ҳам ҳеч гап эмас. Умуман олганда, ушбу трансфер «Ливерпуль» учун чемпионликни сақлаб қолиш йўлида олдинга ташланган қадам бўлди.

4.  Ротация, ротация, ротация

Ёзда Юрген олдинда бизни энг ноодатий мавсум кутиб тургани ҳақида сўзлаган эди. Шунингдек, бу мавсумдан «омон» чиқиш учун ротация жуда муҳим эканлигини ҳам қўшиб қўйган эди. Aфсуски, мураббий ўзи истаганидек ротацияга мурожаат эта олмаяпти. Мавсум бошида олинган жароҳатлар (Шакири, Мане, Фабиньо, Кейта, Цимкас, Чемберлен, Виржил…) бунга имкон бермади. Мавсум стартидаги йўқотишларга қарамай, мураббий академия ёшлари ва универсал футболчилар ёрдамида вазиятдан чиқиб кетишга уринмоқда. Бу қувонарли ҳолат. Тез орада, таркиб яна тўлиқ бўлгач, барчаси ўз ўрнига тушиб кетади. Aгар мураббий ўзи айтганидек ротацияга катта урғу берса, зич тақвимда силласи қуриган рақиблардан 3 очко олиш анча осонлашади. Бу эса, якунда кучга тўлган оёқлар ёрдамида чемпионликни нишонлаш билан тугаши ҳам ҳеч гап эмас.

5.  Рақиблар

Бу спорт, унда ғалаба қозониш учун рақибнинг омадсизлиги ҳам керак бўлади. Бу «Ливерпуль»ни камситиш эмас, шунчаки айни дамда жамоанинг «туманли албион»даги чемпионлик тақдири рақибларнинг ўзини қай даражада намойиш этиши билан ҳам боғлиқ. Aйниқса, асосий рақобатчиларники билан чамбарчас боғлиқ десак, адашмаган бўламиз. AПЛнинг сўнгги 4 та мавсумидан бери ғолиб 90 очкодан кам жамғармаяпти. Бу мавсумда эса, бу трюкни намойиш этиш жуда мушкул. Бугунги кундаги «Ливерпуль» ўтган мавсумдаги каби 99 очко билан чемпионликни нишонлашига ишониш мушкул, аммо бу ишни «Сити» ёки “Aрсенал” ҳам амалга ошира олмаслиги тобора аниқлашиб бормоқда. Катта эҳтимол билан, жорий мавсумда ғолиблик учун 80-82 очко етарли бўлади. Бу эса, сўнгги 5 йил ичидаги чемпионлик учун энг шиддатли кураш бизни кутиб турганидан далолат!

Яҳёхўжа Улуғхўжаев