Итальянча иш: Антонио Конте АПЛнинг энг кўп маош олувчи мураббийларидан бирига айланадими?

«Интер» клубини чемпионлик шоҳсупасига етаклаган италиялик мутахассис, жамоадан кетиши ҳақида эълон қилинди. Эндиликда, Европанинг топ-клублари ушбу мураббий фаолияти билан қизиқмоқда.

«Челси»нинг собиқ мураббийи "Тоттенхэм" билан музокараларга киришганлиги ҳақида хабарлар тарқалди. Кўплаб нуфузли нашрлар ушбу янгилик амалга ошишини кутиб туришибди. Ҳозирги кунда АПЛ мураббийлари орасида Пеп Гвардиоланинг маоши энг кўпидир. «Шпорлар» сафига ўтиш муваффақиятли амалга оширилса, Конте бу борада иккинчи сифатида эътироф этилади.

«Тоттенхэм» клуби хўжайини Даниел Леви бошқарувга Антониодан яхшироқ вариант кўрмаётганини билдирди. Шунингдек, айнан Леви томонидан катта маош ваъда қилинганлиги айтилмоқда. «Миррор» нашри хабарига кўра, Конте йилига 15 миллион фунт-стерлинг миқдорига тенг бўлган маош билан таъминланади. 51 ёшли мутахассисни берилаётган иш ҳақи қониқтирса ҳам, клубда ўзига яраша юқори мавқе учун курашади. Жумладан, раҳбариятга ўзининг шартлари, юлдуз футболчиларни олиб қолиш ва бошқа эркинликлар яратиш билан боғлиқ талаблар беради. Конте Англия термаси етакчиси бўлган, Харри Кейн билан ишлашни ҳохламоқда. Раҳбарият, хусусан, Даниел Леви ҳам Кейн трансферини ёпиб қўйиши мумкин ёхуд унга ўта катта нарх белгилайди.

Агарда ҳақиқатдан ҳам италиялик бу таклифга рози бўлса, юқорида айтилгандек, фақат Пепгина ундан кўп пул ишлаб топадиган АПЛдаги ягона босс бўлади, холос. «Барса»нинг собиқ мураббийи «Сити»да ҳар мавсум учун тахминан 20 миллион фунт маош олади. Контенинг янги жамоадаги оладиган пули, уни бу борада, «Ливерпуль» бош мураббийи – Юргенн Клопп билан тенглаштиради. 53 ёшли германиялик ҳам «Энфилд»да йилига қарийб 15 миллион фунт маош олади. Лекин у шу пайтгача катта натижалар – чемпионлар лигаси ғолиблигига ҳамда АПЛ чемпионлигига эришган.

Бу мавсумда Англия кубогида ғолиб чиққан «Лестер» бош мураббийи, Бренден Роджерс 2019 йил охирида ойлик маошини йилига икки бараваргача ошириб, 10 миллион фунтга етказган эди. Ҳозирда, у маош борасида, лигада кучли учталикка киради.

Хабарларга кўра, мавсум дебютанти – «Лидс» клуби устози Марсело Бьелса ҳам маош борасида анча илдам. У "қизил иблислар" мураббийи Сульшер ва Чемпионлар лигаси ғолиби, Тухелдан кўра кўпроқ пул ишлаб топмоқда. 65 ёшли аргентиналик мутахассис "Элланд Роад"даги ишлари учун йиллик – 8 миллион билан сийланади.

Солиштириш учун, «Ман.Юнайтед» устози йилига 7,5 миллион фунт, ЕЧЛ ғолиби – «Челси» мураббийи Томас Тухел эса 7 млн. маблағ учун ишламоқда.

АПЛнинг мавсум-2020/2021даги энг кўп маош олувчи мураббийлари (топ-7):

1. Хосеп Гвардиола – 20 млн фунт
2. Юрген Клопп  – 15 млн фунт
3. Карло Анчелотти – 11,5 млн фунт
4. Брендан Роджерс  – 10 млн фунт
5. Марсело Бьелса – 8 млн фунт
6. Уле-Гуннар Сульшер – 7,5 млн фунт
7. Томас Тухель — 7,0 млн фунт

Жалолиддин ИСМАТОВ