Футболчиликдан мураббийликкача: устозга айланган шогирдлар

Футбол дунёсида нафақат ўйинчилик даври билан, балки ундан кейинги мураббийлик фаолияти билан ҳам маълум ва машҳур шахслар мавжуд. Ўз касби сўнгида мураббийлик ва менежерлик соҳасига қадам қўйиш кўплаб футболчилар учун ўта мураккаб жараён саналади. Шунинг учун ҳамма ҳам бу ишга қўл уравермайди. Шундай ўйинчилар борки, улар тарихда футболчилик билан бир пайтда бутун бошли жамоани бошқариб, ўз ортидан эргаштира олган. Ҳозир бир нечта ана шундай футбол фидойилари ҳақида гап кетади.

1. Уэйн Руни, «Дерби Каунти»

Ўз фаолиятини футболчи сифатида мардонавор якунлаган Уэйн Руни кўп муддат севимли касбидан узилиб қолмади. Жисмоний имкониятларидан максимал фойдалангандан сўнг, у мураббийлик қила бошлади. Инглиз ҳужумчиси 2020 йилда Чемпионшип жамоаси «Дерби Каунти» билан шартнома имзолади. Ўзининг илк мураббийлик мавсумини тўла-тўкис ва омадли ўтказа олмаган бўлса ҳам Руни ҳаракатдан тўхтагани йўқ.

2. Винсент Компани, «Андерлехт»

«Манчестер Сити»даги узоқ даврли ўйинларидан кейин бельгиялик ҳимоячи 2019 йилда ўз фаолиятини бошлаган жойга, «Андерлехт»га қайтади. Эски жамоа уни дастлаб 2019-2020 йилги мавсум учун ўйинчи-мураббий сифатида ишга олади. Аммо у ўша мавсумдаёқ клубнинг 1998-1999 йилдан бери энг ёмон натижаси сабабчисига айланганидан сўнг, тезда ишдан бўшатилади. У мавсум сўнгида жамоадан кетишга мажбур бўлади.

3. Питер Рейд, «Манчестер Сити»

Рейд 1980 йилларнинг энг машҳур ва афсонавий футболчиси сифатида ҳамманинг онгида қолган эди. Собиқ футболчи 1990 йилда «Сити»га ўйновчи-мураббий сифатида ишга ўткач, барчаси яхши томонга ўзгаргандек эди. Кетма-кет икки йил ПЛ турнир жадвалида бешинчи ўрин эгалланиши ҳамда «МЮ»дан юқорида мавсум якунланиши жамоада Рейд қўлини сездириб турарди. Бироқ орадан кўп ўтмай 1993 йилда у истеъфога чиқарилади.

4. Самуэл Это'о, «Анталяспор»

Ҳа, тўғри ўқидингиз! Ўз вақтида барчанинг севимли ҳужумчисига айланган «Барса»нинг собиқ футболчиси Это'o фаолиятини якунлагач, 2015 йилда Туркия сафарига тутинади. У «Анталяспор» клуби билан битимга келишиб, ўз тажрибаси, қобилияти ва кучини мураббийга айланиш учун сарфлади. Ўша йилнинг декабрь ойида жамоага ўйинчи-мураббий сифатида келган мутахассис футболчи бир неча ой давомида клуб мухлисларига нималарнидир исботлашга ҳаракат қилиб кўради.

5. Ҳанс-Питер Флик, «Викториа»

Ўз футболчилик фаолиятини бошлаган клубда яна давом эттириш имконияти насиб этган футболчилардан бири бу Фликдир. Немис футболчиси 90 йилларда ўз фаолиятини гуллаган даврини бошдан ўтказди. Кўп ўтмай эса ўз жамоаси «Викториа Бамментал» билан шартнома имзолаб, 2000 йилгача у ерда барқарор равишда ўйинчи ҳамда мураббий бўла олган эди.

6. Жон Тошак, «Свонси»

«Ливерпул» клубидаги саккиз йиллик фаолиятидан кейин жароҳатлар олиб майдонни эрта тарк этган Тошак ўз ишини 1978 йилдан бошлаб «Свонси»да давом эттиради. У ўша йилиёқ, 29 ёшида жамоада ўйинчи-мураббийлик қила бошлайди. Тошак жамоани иккинчи дивизонга кўтарилишига катта ёрдам беради. Қолаверса, клуб таркибида тўпурарликни ҳам қўлга олган эди. Унинг ҳаракатлари жамоани юқори марралар забт этишида муҳим роль ўйнайди.

7. Кенни Далглиш, «Ливерпуль»

Жамоанинг энг муваффақиятли хариди сифатида эътироф этилувчи «Ливерпуль» форварди Далглиш 1985 йилда мураббийлик ролига кўтарилади. У илк мавсумидаёқ Биринчи дивизионда чемпионликни нишонлайди. Қолаверса, жамоани ўша йили мамлакат кубоги соҳибига айлантиради. У 1987 йилга қадар жамоаси билан иккита лига титулини қўлга киритишга муваффақ бўлган эди. Унинг ўйинчи ҳамда мураббийлик даври шонли онларда юз беради.

Жалолиддин ИСМАТОВ тайёрлади