Энг яхши ва энг ёмон: мухлислар диди

Футбол оламида майдон, ундаги ўйинчилар, мураббийлар, тактикалар ва бошқа омиллардан четда бўлган нарсалар ҳам мавжуд. Клуб имижи ҳақида гап кетганида, беихтиёр биринчи навбатда футболчилар эгнидаги либос кўз ўнгимизга келади. Бу нарса ҳозирги дунё футболида даромадли тармоқлардан бири сифатида қаралади. Ҳатто сиз бирор жамоанинг энг ашаддий мухлиси бўлсангиз ҳам, клуб ёки терма жамоа формаси учун пул сарфлаётганингизда икки марталаб яхшилаб ўйлаб, кейин харажат қиласиз. Шунда ҳам либос кўриниши сизга маъқул келганида, албатта.

«Манчестер Сити»нинг янги мавсум учун тақдим этган учинчи рақамли либоси ижтимоий тармоқларда кўплаб танқидларга сабаб бўлди. «Puma» томонидан дизайнлаштирилган форма мухлислар томонидан тарихдаги энг ёмон учинчи тўплам деган ном олди. Худди шу каби, «Аякс» учун тайёрланган янги либос ҳам жиддий эътирозлар остида қолган. Қуйида сиз мухлислар томонидан энг яхши ҳамда энг ёмон деб топилган клуб либослар билан танишасиз. Уларнинг бари жамоа учинчи рақамли либоси сифатида тақдим этилган эди.

Энг ёмон:

«МЮ», 1992-93 йилги мавсумда

«Қизил иблислар» ушбу тўпламда Нютон Хитнинг даврини эсга олган эди. 1878 йилда жамоа шу ном остида ташкил этилганларида улар яшил рангдаги футболка кийган, либос ўртасидан олтинранг чизиқ тортилган эди. Жамоанинг 90 йиллар бошида тақдим этилган либоси ҳам худди шу кўринишга эга бўлиб, мухлислар танқидига сабаб бўлади.

«Ливерпуль», 2012-2013 йилги мавсумда

Мерсисайдликлар ўша мавсумдаги либоси учун катта маломатларга қолиб кетган эди. Бу либосни ҳатто Луиз Суарез ҳам ёқтирмаган дейишади. «Warrior Sports» компанияси томонидан тайёрланган футболкалар сиёҳранг ҳамда сариқ ранглар комбинациясидан иборат бўлган. Бу ранглар айрим таъсирчан кўзлар учун жуда оғир қабул қилинган. «Сити»нинг юқорида айтилган либосигача, мана шу тўплам АПЛнинг энг ёмон тўплами сифатида эътироф этиларди.

«Тоттенхем», 2006-2007 йилги мавсумда

Жигарранг рангли футболка «шпорлар» учун ўта ғалати ва ноанъанавий эди. Шундай бўлса ҳам 2006 йилги мавсумдан жамоа шоколадранг либосларда кўриниш беради. Бу Лондон жамоаси учун танқид тошлари отилишига асос бўлган эди.

«Челси», 2020-2021 йилги мавсумда

«Аристократлар» учун ўтган мавсум омадли келган бўлса ҳам, уларнинг имижи борасида бундай дея олмаймиз. Ғарбий Лондон клуби учинчи рақамли либоси орқали «Кристал Пелас»га қиёсланади. Бу эса клуб мухлисларини Twitter`да «исён» кўтаришига сабаб бўлган эди. Клуб аъзолари мавсумнинг илк ойларидаёқ либос ноқулайлигини ўзларида ҳис этишади.

Энг яхши:

«Рома», 2019-20 йилги мавсумда

Замонавий футбол либослари ҳақида гап кетганида, италияликлар дидига қойил қолмасдан илож йўқ. «Рома»нинг 2019-2020 йилги мавсум учун тақдим этган учинчи рақамли формаси 90 йиллар классик услубини ёдга солар эди. Мумтоз римликлар тепалигида «Lupetto»(бўрининг боши) қуюк кўк ранг фонида тасвирланган. Бу ўзига хос клуб мақсадларига ҳамоҳанглик берарди.

«МЮ», 1993-1994 йилги мавсумда

Қора ранг аралашган ҳар қандай нарсада бироз совуқлик мужассам саналади. «Қизил иблислар» 90 йиллар марказида ажойиб кўриниш касб этишди. Ўшанда жамоанинг уй ёки меҳмон формаси эмас, балки учинчи рақамли либоси барча ёдида қолишга муваффақ бўлган. Футболкадан кўк ва сариқ рангли чизиқлар ўтказилган эди. Шуни ҳам айтиш керакки, афсонавий тўпламлар уни кийиб юрган ажойиб футболчилар сабабли ҳам эсда қолади. Эрик Кантона мана шундай афсонавий либосдаги, афсонавий шахс эди. Ҳархолда, мухлислар уни ҳалигача шундай эслашади.

«Арсенал», 2021-2022 йилги мавсумда

«Канонирлар» майдондаги ҳаракатлари билан мақтана олишмасада, ҳеч бўлмаганда улар кийиб олган либос замонавий ва ўта дидли. Ўтган ҳафта «Бренфорд»га қарши мағлубиятли кечада, жамоа кўк зиг-заг нақшга эга янги мавсум учун учинчи тўпламда дебют қилган эдилар. «Adidas» тайёрлафан либос ёқасида эса мухлисларга руҳ бағишловчи «Ҳамма нарса Арсенал учун» шиори ёзиб қўйилган. Бу либос ҳам аслида 90 йиллар маҳсули бўлиб, унда Деннис Бергкамп ҳам майдонда ҳаракат қилган эди. Айнан унинг ақлга сиғмас ажойиб ҳаракатлари мана шу кўк рангли футболкада амалга оширилган дейиш мумкин.

инглиз тилидан Жалолиддин ИСМАТОВ таржимаси