Италияга талпинган кўнгиллар: А серияга кимлар ташриф буюрди?

Ёзги трансферлар ойнаси бизга бир нечта ажойиб харидларни тақдим этди. Бутун Европа клублари ёз давомида ўз футболчиларини қидириш билан вақт ўтказди. Айниқса, Италия клублари анча янгиликларни амалга оширди. Бу бошқа чемпионатдан бўладими ёки ички кўчишлар, барибир клублар савиясини белгилаб берувчи ва таъсир этувчи кучга эга бўлди. Қуйида сиз билан А серияда амалга оширилган энг яхши трансферлар ҳақида гаплашамиз.

1. Мерих Демирал – «Аталанта»

Ўтган мавсумда «Ювентус»дан марказий ҳимоячини ижарага олган «Аталанта» уни сотиб олиш шарти билан таркибга қабул қилган эди. Демирал Италияда бир мавсумда йил ҳимоячиси номига лойиқ топилади. Клуб Кристиан Ромерони Демиралга алмаштирди дейиш мумкин. Бу жамоага фақат фойда келтиради. Чунки Демирал ўта тажрибали футболчи.

2. Мануэл Локателли – «Ювентус»

Трансферлар ойнаси очилган пайтда биз айнан мана шу харидни кутган эдик ва бу содир бўлди. Локателли Туринга кўчиб ўтди. Собиқ «Сассуоло» юлдузи «Юве» жамоаси марказига ўйин назорати борасида ижобий баланс беради. У Туринга яна шонли юришларни қайтара олиши тахмин қилинган. Супер маэстро деб ном олган Мануэл плеймейкерликни яхши ўзлаштирган.

3. Хоакин Корреа – «Интер»

Милан шаҳрининг амалдаги чемпионлари ёзги трансферлар ойнасида бойиди, аммо ўз етакчиларидан маҳрум бўлди. Лукаку ва Ҳакимини Евромайдондаги рақибларига сотиб юборган клуб, яхши трансферларга ҳам қўл урган. Улардан бири ва кўп таъкидлангани, Хуакин Корреадир. У «Лацио»дан сотиб олинди. Илк мавсумдаги дебютидаёқ «Верона»га қарши майдонда ўзгаришлар қила олди. Корреа тез орада «Сан Сиро»ни «ёндириши» мумкин.

4. Маттиа Заканьи – «Лацио»

Римликлар бу ёзда Корреани йўқотди. Аммо улар Закайнини қўлга кирита олди. Уни Италиядан ташқарида яхши танимасликлари мумкиндир, бироқ 26 ёшли ҳужумчи рақиблар учун яхши бошоғриқ бўлиш хусусиятига эга. Заккайни ақлли ҳужумчи ва жуда ҳам тезкор саналади. У Маурицио Сарри бошчилигида яхши натижага эриша олади. Шунингдек, жамоанинг ҳужумкор тизимини барпо этиши мумкин.

5. Теун Копмейнерс – «Аталанта»

Европанинг элит клублари эшелонидаги қисми Коопменерсга қизиққан эди. Ҳатто, «Ливерпуль» ҳам. Аммо «Аталанта» иқтидорли нидерландни ўзига «бўйсундира олди». 23 ёшли футболчи майдоннинг марказий қисмида етакчига айлана олади. Ундан кўп нарса кутилмоқда. Гасперини бекорга «АЗ Алкмаар»га бу футболчи учун 12 миллион евро тўлагани йўқ, ахир...

6. Элдор Шомуродов – «Рома»

Ёз бўйи римликларга яхши бир ҳужум вакили кераклиги ҳақида кўп гапирилди. «Рома» бу пайтда ўз нишонлари ортидан қуваётган эди. Уларнинг бири Шомуродовдир. Ёрқин ўзбек футболчиси бу ёзда «Женоа»дан Италия пойтахтига йўл олди. У аллақачон ўзини барча учун исбот эта олган. Гарчанд у жамоада кафолатланган асосий таркиб футболчиси бўлмасада, Жозенинг асосий қуролига айланиши мумкин.

7. Патрик Кутроне – «Эмполи»

Кутроненинг фаолияти жуда беқарор эди. Асли «Милан» ҳужумчиси бўлган 23 ёшли футболчи анча йиллардан бери «Вулверхемптон», «Фиорентина» ва «Валенсия»даги ижараларда юриб қайтди. Унинг дарбадарлиги дебютант клуб «Эмполи»да якун топди. Ҳозирда у ғалабалар учун тайёр ва буни «Юве»га қарши ўйинда исбот эта олди.

8. Марко Арнаутович – «Болонья»

Бир нечта бешлик клублари радарида бўлган Марко бу ёзда Европага яна қайтди. Унинг Хитойдаги саргузаштлари якун топгач, Италиянинг энг ўртамиёна клуби «Болонья»га келиб қўшилди. У доимо жарима майдончаси атрофида хавфли бўлган. Бу «россоблюлар» учун яхши пойдеворга айланиши мумкин.

9. Альваро Одриосола – «Фиорентина»

Алваронинг фаолияти бундан уч йил илгари «Реал»га кўчганидан сўнг, юксалиб кетиши тахмин қилинган эди. Бироқ бундай бўлмади. Мадридликлар уни Италияга сотиб юборди. Бинафшаранг либос эгалари футболчига ўзини намойиш этиши учун яхшигина имконият яратмоқчи. Ўнг қанот ҳимоячиси йиллар давомида барқарор ўйнай олмаётган эди. «Фиорентина» раҳбарияти эса испанияликни таланти ҳали тўлиқ кўринмаганини сезди шекилли, дарров уни жалб қилди. У Италияда кучли мудофаа ясаши мумкин. Бу жараённи эса кузатишда давом этамиз.

10. Тамми Абрахам – «Рома»

Анча ўйлардан кейин, оҳири барибир сотиб юборилган футболчи янги клубига тезда мослашиб кетди. У илк баҳсларданоқ ўзини кўрсатиб, голлар ура бошлади. «Челси»да жой топа олмаган Тамми, Италияда юксалишни лозим кўрди. «Рома» эса у орқали ҳужумини кучайтириб олди. Тўғри, клуб ёзда таркиб учун анчагина ҳаражатга ботди. Эндиликда, буни натижасини кўришдан умидвор бўлиб турибди. Ҳархолда, бекорга Абрахам учун 35 миллион фунт сарф этилмаган.

инглиз тилидан Жалолиддин ИСМАТОВ таржимаси