Салоҳ Клоппдан, Клопп раҳбариятдан андиша қилмоқда

«Ливерпуль» ва Салоҳ ўртасида янги шартнома имзолаш қийин кечмоқда. Муҳаммад Салоҳнинг жамоа билан амалдаги шартномаси 2023 йилнинг ёзида якунига етади. Бунгача ҳали 18 ой вақт бор. Аммо мисрлик футболчи ўз клубидан тушаётган таклифга рози бўлишга шошилмаяпти. Ўтган ҳафта Юрген Клоппдан ушбу вазият ҳақида сўрашди ва унинг бу борадаги жавоби жуда хотиржам кўриниш олди. «Мақсадимиз аниқ, лекин бу каби жиддий жараёнлар анча вақт талаб этади», - дейди Клопп.

Мухлисларга ҳам вазият шундай туюлмоқда, лекин нима сабабдан мисрлик футболчи узоқ вақтдан бери ўз келажаги ҳақида аниқ қарор қабул қила олмаяпти? Ва у нимани хоҳлайди? Бу каби саволлар инглиз ва унга ёндош хориж матбуотида кўплаб учрайди. Бундан чиқадиган биринчи хулоса шуки, Салоҳ «Ливерпул»да фақат пулни ўйламайди. У ҳали ҳам кучли амбицияга эга ва жамоаси билан ҳамон ғалабаларга чанқоқ. Айни дам унинг кўплаб шериклари аллақачон ўттизга кириб улгуришган - Фирмино, Хендерсон, ван Дейк. Мане 29 ёшда, Фабиньо эса 28. Салоҳ ҳозир жамоада барча шеркларига руҳий қалқон вазифасини ўтаб бераётгани сир эмас. У жорий мавсум «қизиллар» қўлга киритаётган ғалабаларда муҳим ролларни бажаряпти.

Жумладан, 21 та ўйинда майдонга тушган Муҳаммад ҳисобида жорий мавсум 20 та гол мавжуд. Бироқ шунга қарамай маош борасида у анча камтар. Техник салоҳияти жуда юқори бўлган ўйинчи бугунги замонавий футболда маоши бўйича бешинчи ўринни эгаллайди. «Ливерпул»да ван Дейкдан кейин иккинчи ўринни банд этган. Унинг агенти билан суҳбатларда ҳафтасига 300 000 фунт маош тўланиши ҳақида гап-сўзлар матбуотга сизиб чиқди. Нима бўлган тақдирда ҳам Салоҳ бунга тўлиқ ҳақли.

Асосийси, у «Ливерпул»да қолишни истаяпти. Салоҳ бу ҳақда октябрь ойидаёқ айтган ва бутун фаолиятини «Ливерпул»да ўтказишини яна бир бор таъкидлаган эди.

«Агар сизни бу савол қизиқтирса, мен фаолиятимнинг қолган қисмини шу ерда ўтказмоқчиман, лекин ҳаммаси менга боғлиқ эмас. Ҳаммаси клубнинг хоҳишига ҳавола», - деганди ўшанда Салоҳ.

Ҳеч ҳам шубҳа йўқки, у Юрген Клопп билан мустаҳкам ўрнатилган муносабатга эга. Аммо мисрлик мухлислар ва футболчилар орасида қанчалик машҳурликка эга бўлмасин, у раҳбарият томонидан ҳам юқори ишонч билдирилишини хоҳлайди. У Мисрнинг МБC Маср телеканалига берган интервьюсида бунга шаъма қилди: «Сенинг жорий трансфер сумманг клуб сени қанчалик қадрлашидан далолат беради». Клоппдан бу ҳақида сўрашганда немис мутахассиси аниқ жавоб беришдан ўзини олиб қочди. У икки орадаги сирни яширгандек таассурот уйғотади.

«Ливерпуль» шартномаси тугашига бир йил қолган футболчини мантиқан шоширишга ҳаққи бор. Бироқ бу ерда таклиф этилган шартнома ҳолатига ҳам эътибор бериш керак. У футболчини молиявий жиҳатдан қанчалар қониқтиряпти? «Қизиллар» раҳбариятининг эса бу борада «тили қисиқ» жойи бор. Ушбу масалада ортиқча баҳслашиб бўлмайди. Бироқ Салоҳга келаётган таклифлар ва эркин агент мақомининг қанчалик хавфли эканини ҳам унутмаслик керак.
Клуб спорт директори Майкл Эдвардс ёзда «Ливерпул»ни тарк этади ва бу Муҳаммаднинг янги шартнома тузишига ва унинг ўзи учун имкон қадар қониқарли кўриниш олишига тўсқинлик қилиши мумкин.