Перес "Реал"нинг ҳозирги таркиби учун қанча пул сарфлади? Маблағнинг ярмидан кўпи ҳужумчиларга кетган

Бугун 28 май куни Парижда Чемпионлар лигаси финали бўлиб ўтади. "Стад де Франс" стадионида кубок учун "Реал" ва "Ливерпуль" ўйнайди. Мадрид клуби сўнгги йилларда асосий еврокубок турнирида ажойиб муваффақиятларга эришди (саккиз йил ичида тўртта ғалаба). Ҳозирги таркиб "Реал"га қанчага тушганини ҳисоблаб чиқдик.

Дарвозабонлар (43,5 млн евро)

Мадриднинг “Реал” клуби 2018 йилда Тибо Куртуани “Челси”га 35 миллион евро тўлаб сотиб олди.Ўша пайтдан бошлаб Мадрид клуби таркибини ушбу дарвозабонсиз тасаввур қилиш қийин. Бельгиялик футболчи жорий мавсумда Чемпионлар лигасида барча 12 ўйинда қатнашган. (Бундай футболчилар "Реал" таржибида уч нафарни ташкил қилади).

2018 йилда 8,5 миллион еврога сотиб олинган украиналик Андрей Лунин узоқ вақт ижарада эди. Аввалига “Леганес”, кейин “Вальядолид” ва “Овьедо”да ўйнаган. "Реал Мадрид" таркибида у Ла Лигада атиги иккита ўйин ўтказди (иккаласи ҳам шу ой) ва Чемпионлар лигасида майдонга тушмади.

Ҳимоя (116 млн евро)

“Реал” уч нафар ҳимоячи учун бир евро ҳам тўланмаган. Давид Алаба ва Мигель Гутиеррес эркин агент сифатида жамоага қўшилишган, Начо Фернандес эса клуб тарбияланувчиси. Аммо Эдер Милитао ва Ферланд Менди учун жами 100 миллион евро клуб ҳисобидан кетган.

Таққослаш учун Марсело ва Дани Карвахал “Реал”га жуда оз пулга тушганди. Ҳимоя чизиғидаги ўйинчилардан Алаба, Милитао, Менди ва Карвахал жорий мавсумда Чемпионлар лигасида энг кўп ўйин ўтказган.

Ярим ҳимоя (149,5 млн евро)

"Реал Мадрид" беш футболчи учун кўрсатилган маблағнинг деярли барчасини сарфлаган. Модрич ва Кроос ҳақида ҳеч қандай савол йўқ – бу йигитлар ҳамон жамоа етакчилари қаторида ва сезиларли фойда келтирмоқда. Иско Чемпионлар лигасининг ушбу мавсумида майдонга тушмаган, Себальос 36 дақиқа, Камавинга 292 дақиқа майдонда ҳаракат қилди. Таққослаш учун Модрич ва Кроссда умумий ўйин вақти 1800 дақиқани ташкил қиляпти.

Мадридликлар Касемиро трансферини ҳам тўғри тахмин қилишди - 2016 йилда улар унинг учун 6 миллион евро тўлашди, ҳозир эса унинг нархи 50 миллион евро. Лекин ҳозир клубнинг энг қиммат ярим ҳимоячиси у эмас, Федерико Вальверде 65 миллион евро.

Ҳужум (429,4 млн евро)

"Реал" Эден Азар, Гарет Бэйл ва Лука Йович учун 279 миллион евро сарфлади, аммо бу мавсумда улардан ҳеч қандай фойда бўлмади. Бу трионинг Чемпионлар Лигасидаги статистикаси: 213 дақиқа, 0 гол, 0 голли узатма, битта сариқ карточка.

12 йил аввал 35 миллион евро эвазига жамоага келган Карим Бензема турнирда 15 та гол урди. Франциялик футболчи мавсумни шу қадар зўр ўтказдики, энди у “Олтин тўп”га асосий даъвогарлардан бири саналади. Қимматбаҳо Родриго ва Винисиус Жуниор жамоанинг энг яхши тўпурарлари қаторида.

Умумий хулоса

"Реал Мадрид" таркибдаги футболчиларни харид қилиш учун 738,4 миллион евро сарфлаган бўлса, ҳозир жамоа футболчиларининг умумий нархи 756,5 миллион еврони ташкил этади. Кўриб турганингиздек футболчиларнинг трансфер нархи сезиларли даражада ошиб кетмаган ва аксинча. Жамоа бугун финалда ғолиб бўлиши учун ушбу таркибнинг кучи етадими, йўқми. Барча саволларга учрашув якунидан сўнг жавоб оламиз.