«Реал»нинг энг тушунарли ва мантиқан асосли ғалабаси

Аввалги босқичларда «Реал» ҳисобда олдинга чиқиб олгач, Париж ҳам, «Челси» ва «Сити» ҳам у қадар кўп имкониятга эга бўлмаганди. Аксинча, бу жамоалар синиб қолган, ўйин қовушмаганди.

Финалда ундай бўлмади. «Ливерпуль» ҳисобни тенглаштириш учун етарли имкониятга эга бўлди, 1.15 XG - ўртача 2 голга яраша ўйнади. Куртуа эса, умумий 9 сэйв билан ЕЧЛ финаллари рекордини ўрнатди.

Сабаби, маълумки, «Реал» айниқса тизимли жамоаларга қарши хаос яратиш ва юқори савиядаги ижрочилар тажрибаси ёрдамида ўша хаосни голларга айлантириш билан шуғулланди. Айниқса, ҳисобни ушлаш керак бўлганда бу қўл келади.

«Ливерпуль» ҳам қисман тизимли жамоа, лекин шу билан бирга хаос сценарийси, тўпнинг тезликда у жамоадан бунисига ўтиши, майдон марказисиз футболда ҳам кучли. Клоппнинг «Манчестер Сити»га қарши аввалги ўйинларида бу устунликдан фойдаланарди.

«Реал»га қарши, айниқса, гол ўтказилгач, инглизлар ўша услубга ўтишди - янги «Ливерпуль»нинг юзлари Тиаго ва Диаш ўрнига эски ливерпулчилар, хусусан Фирминонинг тушиши ҳам шундан дарак, менимча.

Шунинг учун ҳам «Ливерпуль» кўп вазият яратди, «Реал»нинг сценарий доирасида ҳам кучли бўла олди. Шунчаки, Куртуа ва Каземиронинг ўта зўр ўйини, Винисиуснинг ягона вазиятдан фойдаланиши, аксарият ливерпулчилар ўз даражасидан пастроқ ўйин кўрсатгани учрашув тақдирини ҳал қилди.

Қисқаси, «Реал»нинг энг тушунарли ва мантиқан асосли ғалабаси.

Қаҳрамон Асланов.