АПЛ. «Ливерпуль» – «Фулхэм». Превью

Бугун тунда АПЛ 28-турининг қолдирилган баҳси доирасида «Ливерпуль» ўз майдонида «Фулхэм»ни қабул қилади. «Қизиллар» бу турга кетма-кет 5 та ғалабалик серия билан ташриф буюради. Бундан олдинги турда Клопп шогирдлари «Тоттенхэм» устидан иродали ғалабага эришган бўлсалар (4:3), Марко Силва жамоаси «Ман Сити»га 1:2 ҳисобида мағлуб бўлди.

«Ливерпуль»

«Қизиллар»да айни дам 4-ўриндаги «МЮ» билан фарқ 7 очкони ташкил қилади. Бунинг устига «қизил иблислар» битта кам ўйин ўтказган. Шу боис «Ливерпуль» мухлисларининг ЕЧЛ зонасига бир амаллаб кириб олишлари жуда ҳам қийин. Жамоа 5 та ғалабали серияда ҳам ҳар бир учрашувда ўз дарвозасидан гол ўтказиб юборган, «Энфильд»даги мағлубиятсиз серия эса 9 та ўйинга етган.

«Фулхэм»

Ўтган турда Силва шогирдлари амалдаги чемпионга қарши унчалик ёмон ўйнамади. Карлос Винисиус ҳисобни тенглаштирганда «Фулхэм» мухлисларида очко олиш умиди пайдо бўлган эди. Бироқ Хулиан Альварес бунга имкон бермади. Кетма-кет мағлубиятлар жамоанинг еврокубоклар учун ишончини тушириб юборди. Ҳозирда «Фулхэм» «Кристал Пэлас»дан 5 очко олдинда бўлса, «Брентфорд»дан худди шунча балл пастда. Натижада жамоа шунга монанд 10-ўринни эгаллаб турибди. Бироқ юқорида саналган ҳар икки клуб ҳам «Фулхэм»дан битта ўйин кўп ўтказган. «Эвертон» ҳамда «Лидс» устидан қозонилган ғалабаларни айтмаганда «коттеж эгалари» сўнгги 9 та баҳснинг 7 тасида ютқазишди. Бунинг устига февралдан бери «клин шит» ушлай олмай келади. Бу «Энфильд»га сафар олдидан яхши статистика эмас. Бироқ «Фулхэм» «Ливерпул»га қарши сўнгги 3 та баҳсда мағлуб бўлмаяпти. Августда «Крейвн Коттеж»даги ўйин 2:2 ҳисоби билан тугаган бўлса, ўтган мавсум жамоа «Энфильд»да 1:0 ҳисобида рақибини ютган. Агар бугун ҳам мерсисайдликларга қарши учрашувда очко олинса, ўзаро ўйиндаги мағлубиятсиз серия 4 тага етади ҳамда 56 йил аввалги натижа такрорланади.

Янгиликлар

«Ливерпул»да Клоппнинг ўзи ўтган турда ғалабани нишонлаш чоғида кичик жароҳат олган эди. Ўйинчиларга келсак, Фирмино, Кейта, Байчетич ҳамда Рэмзи бугун «қизиллар»га ёрдам бера олмайди. Диас йўқлиги учун Нуньесга имкон берилмоқда. Тиагонинг иштироки эса сўроқ остида.

«Фулхэм» сафида «Ман Сити»га қарши баҳсда Тим Рим ҳамда Андреас Перейра жароҳат олган. Уларнинг сафида Митрович ҳамда Курзава бор.