"Ливерпуль"нинг бўшашиш сабаби нимада?

Журналист Қаҳрамон Асланов сўнгги вақтларда нега "Ливерпуль" ўйинида пасайиш юзага келганини таҳлил қилиб кўрди.

“Ливерпул”да охирги 4 ўйинда уч мағлубият бор. Унгача 49 ўйинда 4 мағлубият эди холос. Сўнгги пайтларда жамоа ўзига ўхшамаётгандек, гўёки ўша футболчилар, ўша таркиб, аммо индивидуал томондан ҳам ҳар бир футболчида пасайиш кўриш мумкин – масалан, Муҳаммад Салоҳда мана шу 4 ўйинда бирорта гол ҳам, ассист ҳам йўқ.

Бу ҳолатни, агар сиз ҳам эсласангиз, 2012/13 мавсумдаги “Манчестер Юнайтед”га қиёслаш мумкин. Ўшанда “МЮ” АПЛда рақобатчиларидан 15 очкога ўзиб кетган, ҳамма ЕЧЛ нимчорак финалида “Реал”га қарши ўйинни кутарди. Ўша тўқнашувда “МЮ” имкониятни бой берди ва турнирдан чиқиб кетди. Уёғига гўёки мавсум тугаган, мотивация қолмаган, фақат чемпионатни тугатиб қўйиш, шундоғам нақд бўлиб, мухлислар кўникиб бўлган совринни олиш қолганди холос. Англия кубогидан ҳам “Челси”дан ютқазиб чиқиб кетишди, чемпионатда ҳам бир қатор ўйинларни, жумладан, Манчестер дербисини ҳам бой беришди. Требл орзусида турган жамоа учун “Реал”дан мағлубият оғриқли бўлган, жамоа тонусини, тиргагини йўқотиб қўйганди.

“Ливерпул”да ҳам айнан шундай бўлди деб ўйлайман. Қизиқ, ўттиз йил кутилган аввалги чемпионликка ковид соя солганди. Бу сафар гўёки жамоа ажойиб мавсум ўтказиб, АПЛ совринлари бўйича “МЮ”га етиб олишдек катта воқеа бўляпти-ю, аммо негатив муҳит ҳукмрон – футболчилар танқид остида, Трент кетяпти, Виржил ва Салоҳ бўйича шартномалар ҳам муаллақ турибди, Слот ҳам мавсум бошидаги сеҳрини йўқотиб қўйгандек. Ҳаммаси аслида АПЛда кураш қизимагани билан боғлиқ, яъни рақобатчиларнинг бўлиши ҳам фойдали экан...