Ван Дейк Алиссоннинг кетиши ҳақида: «Биз ҳали аниқ билмаймиз, у «Ливерпуль» учун жуда муҳим»

«Ливерпуль» сардори Виржил ван Дейк дарвозабон Алиссон Бекернинг клубдан кетиши мумкинлиги борасидаги хабарларга муносабат билдирди.

Аввалроқ бразилиялик посбон «Ювентус»га ўтиш бўйича оғзаки келишувга эришгани ҳақида хабарлар тарқалган эди.

«Бу борада ҳамманинг ўз фикри ва туйғулари бўлиши мумкин. Миш-мишлар юрибди, агар бирор аниқ гап бўлса, буни ҳаммамиз билиб оламиз. Лекин шахсан мен ҳеч қачон хавотирга тушмайман.

Қулоқ солинг, қачондир ҳар бир футболчининг, жумладан менинг ҳам кетадиган куним келади. Аммо агар бу содир бўлса — мен бу ҳақда ҳеч нарса билмайман ва менимча, унинг ўзи ҳам ҳали аниқ билмайди — биз клуб сифатида бунга мослашамиз.

Биз ижобий ва афсуски, салбий лаҳзаларни биргаликда бошдан кечирдик, шунинг учун унинг кетиши катта зарба ва йўқотиш бўлиши шубҳасиз. Лекин ҳозир нима содир бўлиши ёки бўлмаслиги ҳақида ўйлашга ҳожат йўқ деб ҳисоблайман.

У мен учун жамоа етакчиларидан бири сифатида жуда муҳим ва майдонда ҳам катта аҳамиятга эга. Чунки мен уни дунёдаги энг яхши — менинг фикримча, энг зўр — дарвозабон деб биламан. У қолган тўртта ўйинда бизга ёрдам бериш учун [жароҳатдан] иложи борича тезроқ қайтишга ҳаракат қилмоқда ва бу бизнинг асосий вазифамиздир.

Бундан кейин нима бўлишини эса мендан сўрамаслигингиз керак. Унинг қолишини истармидим? Албатта, бунга ҳеч қандай шубҳа йўқ», — деди ван Дейк.

АПЛнинг жорий мавсумида Алиссон 25 та ўйин ўтказиб, 30 та гол ўтказиб юборди. 33 ёшли футболчининг «қизиллар» билан шартномаси 2027 йилгача амал қилади.