“Реал Мадрид” юлдузларининг трансфер қиймати 70 миллион еврога камайди

Transfermarkt портали Испания Ла Лигаси футболчиларининг бозор қийматини янгилади. Янгиланган маълумотларга кўра, Мадриднинг “Реал” клуби етакчиларидан уч нафари — Килиан Мбаппе, Винисиус Жуниор ва Федерико Вальверденинг трансфер баҳоси сезиларли даражада камайган.

Қайд этилишича, ушбу футболчиларнинг умумий трансфер қиймати 70 миллион еврога пасайган.

Энг катта йўқотиш уругвайлик ярим ҳимоячи Федерико Вальвердеда кузатилди. 27 ёшли футболчининг нархи 30 миллион еврога тушиб, айни пайтда 90 миллион евро этиб белгиланган.

Франция терма жамоаси ҳужумчиси Килиан Мбаппенинг трансфер қиймати эса 20 миллион еврога камайди. Натижада 27 ёшли футболчининг баҳоси 180 миллион еврони ташкил қилмоқда. Шунга қарамай, Мбаппе ҳануз дунёнинг энг қиммат футболчилари қаторидан жой олган.

Шунингдек, бразилиялик вингер Винисиус Жуниор ҳам нархи пасайган футболчилар сафидан ўрин олди. 25 ёшли футболчининг трансфер баҳоси 10 миллион еврога камайиб, ҳозирда 140 миллион еврога тенг. Бундан ташқари, англиялик ярим ҳимоячи Жуд Беллингем ҳам 10 миллион еврога арзонлаган.

Мутахассислар фикрича, “Реал Мадрид” етакчиларининг трансфер қиймати пасайишига жамоанинг ўтган мавсумдаги натижалари ҳамда футболчиларнинг индивидуал кўрсаткичлари таъсир кўрсатган.

Маълумот учун, якунланган мавсум “қироллик клуби” учун омадсиз кечди. Жамоа Ла Лигада иккинчи ўринни эгаллади, УЕФА Чемпионлар Лигаси билан чорак финал босқичида хайрлашди. Шунингдек, Испания Кубогида ҳам кутилган натижани қайд эта олмади.

Бироқ футболчиларнинг умумий трансфер қиймати бўйича “Реал Мадрид” Ла Лигада етакчилик қилмоқда. “Қироллик клуби” футболчиларининг бозор нархи 1,22 миллиард еврога баҳоланган. Кейинги ўринларда “Барселона” (1,16 млрд евро) ва “Атлетико Мадрид” (577 млн евро) жамоалари қайд этилган.