«Манчестер Сити»нинг сўнгги ўн йилликдаги омадли трансферлари. Топ-10

Ҳозирги кунда “Манчестер Сити” Европанинг энг кучли жамоалари сифатида тилга олинмоқда. Ҳа, бунда Хосеп Гвардоиланинг ҳиссаси беқиёс. Аммо жамоа раҳбарияти сўнгги йилларда олиб борган селекция сиёсати ҳам муваффақиятлар гарови бўлмоқда.

Охирги ўн йиллик мобайнида “Манчестер Cити”га нечта футболчи келиб кетмади дейсиз, трансферларнинг ҳаммаси ҳам ўзини оқлай олмади. Лекин шундай трансферлар бўлдики, улар жамоанинг ютуқларида катта хизмат қилди. “Сити”нинг сўнгги 10 йилдаги омадли трансферлари топ-10талигини эътиборингизга ҳавола этамиз.

10-ўрин. Габриэл Жезус
2017 йилда “Палмейрас”дан 32 миллион еврога сотиб олинган.

Тўғри, бу йигитча жароҳатлар гирдобига тушиб қолди. Энди формага кирганида яна жароҳат олди. Лекин, шуни тан олиб айтиш керакки, бу йигитчада нимадир бор. Унинг ўйинларида бразилияликларнинг ҳиди келиб туради. Бу шоввоз тўп билан жуда ҳам эркин муомала қилади, вазиятларга яхши чиқиб бора олади. Энг муҳими эса унинг карьераси ҳали олдинда. “Шаҳарликлар”нинг бу хариди топ ўнлигимизни бошлаб беради. Чунки иқтидорли, ғалабаларга чанқоқ, ёш йигитнинг харид қилиниши жамоа учун фақат ва фақат фойда келтирса ажаб эмас. Чунки у ҳужум чизиғида рақобатни кучайтира олди. Энг муҳими, унда иқтидор — “ғиж-ғиж”. Унинг тўлиқ кашф этилиши Гвардиоланинг қўлида. Балки, орадан йиллар ўтиб “Сити”нинг трансферлари ҳақида мақола ёзилса, у юқорироқ ўринларда бўлар?!

9-ўрин. Николас Отаменди
2015 йилда “Валенсия”дан 45 миллион еврога сотиб олинган.

Николас “Валенсия”дан “Манчестер”га кўчиб ўтгач, “Манчестер Cити”нинг ҳимоясидаги муаммолар анча камайди. Отаменди ҳозирда “ Cити”нинг ажралмас бўлаги бўла олди. У “Манчестер Cити”нинг “Серхио Рамос”и ролида кўрина бошлади. Унинг трансфер суммаси ҳам у қадар қўрқинчли эмас. Жамоа эгалари шу йигитни харидидан фақат ва фақат хурсанд бўлишса ажаб эмас, чунки Николос ўз ўйинлари орқали жамоа мухлисларининг ёқимтойига айланиб улгурди.

8-ўрин. Раҳим Стерлинг
2015 йилда “Ливерпуль”дан 70 миллион еврога сотиб олинган.

Чаққонлиги билан рақибларини шошириб қўядиган, хоҳлаган пайтида турбо тезликни қўша оладиган бу йигитнинг хариди аввалига ўзини оқламагандай кўринганди. Кейин эса Стерлинг секин-аста жамоага, унинг ўйинига мослаша бошлади. Айниқса, Гвардиола ундан жуда ҳам унумли фойдаланмоқда. Стерлинг “Манчестер Cити”нинг ўйини учун айни керакли фигура. Тезкор ҳаракатлари ва жарима майдони атрофида қисқа пасларда унинг фойдаси кўп тегмоқда. Бежизга унга шахсан Гвардиола “Сен менинг режаларимда борсан”, демаган бўлса керак. Ҳар ҳолда Стерлинг ўзи учун кетган пулларни оқлай олди. Тўғри, “Ливерпуль” мухлислари ундан ранжишди, лекин,“Одам доим чўққига интилиши керак. Чунки у тўхтаган куни уни унитишади”, деган эди бир ёзувчи. Стерлинг ўзининг келажагини “Манчестер Cити”да кўрди ва ҳозирча унинг ишлари чакки эмас.

7-ўрин. Венсан Компани
2005 йилда “Гамбург”дан 6 миллион фунтга сотиб олинган.

Бу баққуват жангчи жамоага келгач дунёнинг топ-5 ҳимоячиларидан бири бўла олди. Унинг ишончли ўйини, майдонни яхши кўра олиши, шерикларининг хатоларини ёпиб кета олиши билан тезда кўпчиликнинг эътиборини торта олди. Компани деганда ҳамманинг кўз олдига ҳакамлар билан ортиқча тортишмайдиган тартибли ҳимоячи бўлиб гавдаланади. “Шаҳарликлар” унинг учун тўлаган пулларидан ҳеч ҳам ачинишмаса керак. Чунки “Манчестер Cити”нинг Премьер-лигадаги ғалабаларида бельгиялик футболчининг ҳам яхшигина ҳиссаси бор. Ҳар ҳолда уни чиройли кўзлари учун жамоанинг сардори қилишмаган бўлишса керак.

6-ўрин. Фернандиньо
2013 йилда “Шахтёр”дан 40 миллион еврога сотиб олинган.

“Шахтёр”дек ўртамиёна жамоадан дунёнинг супер чемпионатига келиб, ўзини йўқотиб қўймаган бу футболчи топ ўнлигимизда 7-ўрнини эгалламоқда. У бу ўринга ўзидаги битта хислати билан эришди, десак ажабланмаса ҳам бўлади. Ҳа, гап унинг универсаллигида. У деярли Гвардиола қўл остида ҳамма амплуада ўйнаб кўрди. Фақат дарвозага турмади, холос. У қадар катта суммага олинмагани билан ҳам у топ ўнлигимизда юқорига чиқа олди. Унинг ўйинларини кузатган футбол ишқибозлари асли таянч ярим ҳимоячиси эканлигини ҳам унутиб юборган бўлишса керак. Чунки ундан охирги пайтларда Гвардиола худди жангдаги қўшимча кучдек фойдаланмоқда. Қаерга ёрдам керак бўлса, Фернандиньо ўша позицияга тушурилади ва у азалдан ўша ерда ўйнаётгандек ўзини эркин ҳис қила олади.

5-ўрин. Лерой Сане
2016 йилда “Шальке-04”дан 55 миллион еврога сотиб олинган.

Сочлари билан узоқ пландан ҳам ажралиб турадиган Сане туманли Альбионга тез мослаша олди. Немис футболи тарбияланувчиси “Манчестер Cити”нинг ўйинида бош роллардан бирини ижро этмоқда. У қисқа муддатда кўп мухлис орттирди. Ўзининг ишончли ўйинлари билан муҳим голлар уришда давом этирмоқда. Унинг рейтингимизнинг экваторида туришининг сабаби бор албатта. Чунки ҳозир замонавий футболда Мбаппе, Усмон Дембеле сингари келажаги порлоқ юлдузлар икки юз миллион атрофида баҳоланаётганда улардан қолишмайдиган Сане ҳам шу сумма атрофида баҳоланса ажаб эмас. Чунки у ҳали ёш ва уни ютуқларга бой келажак кутиб турибди. Жамоа мутасаддилари агар Санени бир мавсум кейинроқ харид қилишганида ҳозирги суммасидан анча кўпроқ тўлаган бўлишар эди.

4-ўрин. Кевин де Брюне
2015 йилда “Вольсфбург”дан 74 миллион еврога сотиб олинган.

Ўзининг ақлбовар қилмас пасларию зарбалари билан “шаҳарлик” мухлисларнинг ҳурматини қозонган йигит — де Брюне. Бир пайтлар “Челси”дан жой топа олмай Германияга йўл олган футболчининг бу қарори унга нақадар фойда келтиришини у ўша пайт тасаввур ҳам қила олмаган бўлса керак. “Манчестер Cити”да у том манода бор маҳоратини кўрсатмоқда. Унга тўланган сумма бундан 3 йил аввал катта кўринарди, лекин шуниси аниқки, де Брюне ҳозир ўша суммадан икки баробар қиммат туради. “Шаҳарликлар” ҳозир ўз ўйинларини бу малласоч йигитсиз тасаввур эта олишмаса керак. Чунки у ҳозир “Манчестер Cити”да “Иньеста” прататипидаги ўйинчи десак ҳам бўлади. Фақат Иньеста даражасига чиқиш учун ундан кўп меҳнат талаб этилади.

3-ўрин. Давид Силва
2010 йилда “Валенсия”дан 28,5 миллион еврога сотиб олинган.

Испаниялик Фантазиста ўзини деярли “Манчестер Cити”га бағишлади. Энг пик формада ўйнаганда ҳам, грандлар оғиз солганда ҳам “Манчестер Cити”га содиқ қола олди. Шу жумлаларнинг ўзи унга жамоа мухлисларининг ҳурматини ошира олган бўлса ажаб эмас. Яқин ўн йиликнинг “Манчестер Cити” жамоаси учун энг муҳим ўйинчи бўлиши мумкин эди, аммо у ўзидан иккита шоввозни ўтказиб юборишга мажбур.

2-ўрин. Яҳё Туре
2010 йилда “Барселона”дан 24 миллион еврога сотиб олинган.

“Барселона”дан “Манчестер Cити”га кўчиб ўтгач Яҳё ўзиннг иккинчи ёшлигини бошлади, десак ҳам бўлади. Айниқса, у “Манчестер Cити” чемпион бўлган йили бир мавсумда нечта гол урганини эслашнинг ўзи кифоя. У таянч зонасида ҳаракат қилиши билан биргаликда ўйинни бошқара олиш хусусиятига ҳам эга ярим ҳимоячи эди. Африка қитъасининг бир неча бор тенгсиз ўйинчиси бўлиши ҳам бежиз эмас. У “Манчестер Cити” учун узоқ кутилган чемпионликни тақдим этишда катта омил бўлиб хизмат қилди. У нафақат чемпионликни, балки ғолиблик руҳини ўз жамосида акс этира олган феномен сифатида ҳали кўп ёдга олинса керак.

1-ўрин. Серхио Кун Агуэро
2011 йилда “Атлетико”дан 38 миллион еврога сотиб олинган.

Ҳа, буни дарров сезган бўлсангиз керак, рейтингимизнинг биринчи поғонасида — Кун Агуэро. Уни “Манчестер Cити” ҳужум найзасининг нақд учи десак муболаға бўлмайди. У майдонда худди Марадонадек ҳаракат қилади. Гоҳида Мессидек иложсиз вазиятлардан фойдаланади, гоҳида Роналдудек бош билан ақлбовар қилмас голларни уради. Унинг услуби бу буюкларникига ўхшамайди, чунки у ўзига ўхшайди. “Манчестер Cити” мутасаддиларининг энг катта ютуқларидан бири бу, сўзсиз — Кун Агуэронинг харид қилиниши. Чунки бу шоввоз ҳозирда энг кучли бешта ҳужумчидан бири деб беъмалол айта оламиз. Мана бир неча йилдан бери “Манчестер Cити”га бир неча ҳужумчилар келиб кетишди, лекин ҳаммаси унинг соясида иккинчи бўлиб қолаверди. Агуэро ўзининг ўйинлари билан клуб тарихига олтин ҳарфлар билан битилди, десак адашмаган бўламиз. “Манчестер Cити”да ҳар қандай позицияга ўйинчи топилади, лекин ҳужумда эса Агуэронинг ўрнини ҳеч ким боса олмайди.

Хулоса
Бу бизнинг ўлчовимиз билан битилган мақола. Кимдир Сильвани, яна кимдур Яҳёни биринчи ўринда кутгандир. Лекин асосийси “Манчестер Сити” шу йигитлар орқали аста-секин Европани забт этишмоқда. Уларнинг зафарли юришларига омад тилаб қоламиз.

Яҳёхўжа УЛУҒХЎЖАЕВ