Холанд учун яна бир марра

«Манчестер Сити»нинг рақиблар дарвозабонларига шафқат билмас норвегиялик ҳужумчиси Эрлинг Холанд 2 сентябрь куни АПЛ 4-туридан ўрин олган «Фул­хэм»га қарши ўйин (5:1)да навбатдаги «хет-трик»ни расмийлаштирди.

 Энди «йиртқич» ҳисобида АПЛда қайд этилган 5та «хет-трик» бор. Аммо у бу борада чемпионат рекордидан ҳали анча узоқда. Зеро, аргентиналик Серхио Агу­эро АПЛ баҳсларида нақ 12 марта «хет-трик»­ка эришган. Демак, Эрлинг чемпионат тарихидаги мутлақ етакчига тенглашиш учун яна 7та ўйинда 3тадан гол уриши керак.

1-ўрин. Рўйхат етакчиси — Серхио Агуэро. Аргентиналик собиқ ҳужумчи «Манчестер Сити»даги фаолияти давомида АПЛ ўйинларида нақ 12та «хет-трик» тўплаган.

2-ўрин. Яна бир собиқ футболчи Алан Ширер Анг­лия чемпионатидан ўрин олган ўйин­ларда 11 марта «хет-трик» қайд этган. Бу иккинчи юқори натижа. 

3-ўрин. АПЛда «хет-трик»лар сони бўйича топ-3нинг охирги вакили - Робби Фаулер. «Ливерпул»нинг собиқ ҳужумчиси 9 марта ўйин­ни 3тадан гол билан якунлаган.

4-6-ўринлар. Агар Гарри Кейн АПЛда лоақал яна бир мавсум ўйнаганида, катта эҳтимолки, «хет-трик»чилар хит-парадида кучли 3таликка бош суқарди. Факт шуки, у ҳозир 8 мартадан «хет-трик»ка эришган Майкл Оуэн ва Тьерри Анри билан бир қаторда - 4-6-ўринлар.

7-ўрин. Уэйн Руни Англия чемпионатида 7 марта «хет-трик» расмийлаштирган ва бу 7-натижадир. Ҳозирча, албатта. Ахир ёвқур Холанд тобора яқинлашмоқда.

8-ўрин. АПЛдаги фаолиятини 6та «хет-трик» билан ёпган Луис Суареснинг позицияси янада омонат. Ҳозирда уни амалдаги икки футболчи таъқиб қилмоқда - Холанд ва Раҳим Стерлинг. 

9-15-ўринлар. Ҳа, нақ 7 нафар футболчи ҳисобида 5тадан «хет-трик» бор. Эрлинг Холанд ва Раҳим Стерлингда ушбу рейтинг бўйича юқорилаш имконияти бўлса, Рууд ван Нистелрой, Энди Коул, Иан Райт, Робин ван Перси ҳамда Димитар Бербатов энди паст­га тушишса тушишадики, тепага кўтарилишмайди асло. 

Д.АЛИМОВ тайёрлади