“Реал” Родри учун қанча тўламоқчи эканлиги маълум бўлди — ТЕАМtalk

Мадриднинг “Реал” клуби ёзги трансфер ойнаси вақтида “Манчестер Сити” ярим ҳимоячиси Родрини ўз сафига қўшиб олиш борасида жиддий ҳаракат бошлади. ТЕАМtalk нашрининг ёзишича, Родрининг вакиллари “Манчестер Сити” раҳбарияти билан учрашиб, футболчининг трансфер нархи ва кетиш шартларини муҳокама қилган. Мадридликлар ушбу келишувни Жаҳон чемпионати бошлангунга қадар якунлашни мақсад қилган.

Клуб раҳбарияти Родрини жамоани тарк этган футболчилар — Тони Кроос ва Лука Модричнинг ўрнини боса оладиган янги етакчи сифатида кўрмоқда. Хабарларда айтилишича, “Реал” ушбу трансфер учун ҳаддан ташқари кўп маблағ сарфлаш ниятида эмас. Мадридликлар 60 миллион евро атрофидаги таклиф “Манчестер Сити”ни келишувга кўндириш учун етарли бўлади, деб ҳисоблашмоқда. Бу вазият футболчининг амалдаги шартномаси якунланиб бораётгани ва унинг Испанияга қайтиш истаги билан изоҳланган.

Шу билан бирга, Эдуардо Камавинганинг сотилиши эҳтимоли фонида, “қироллик клуби” Алексис Макаллистер, Энсо Фернандеш ва Сандро Тонали каби вариантларни ҳам кўриб чиқмоқда, бироқ айнан Родри асосий нишон бўлиб турибди.

“Манчестер Сити” устози Пеп Гвардиола ҳам ушбу трансферга тўсқинлик қилмаслигига шама қилди: “Дунёда ‘Реал’да ўйнаш имкониятини рад этадиган футболчи йўқ. Агар ўйинчи бахтсиз бўлса, у кетиши керак. Агарда у ўзининг даражасига мос таклиф билан хонамизга кирса, уни тўхтатиб қолмаймиз”.

2024-йилги “Олтин тўп” соҳибининг амалдаги шартномаси келаси йили якунига етади ва футболчининг ўзи ҳам фаолиятида янги чорловга тайёр экани айтилмоқда. Родри 2019-йилдан буён “шаҳарликлар” шарафини ҳимоя қилиб келмоқда. У Англия клубига Мадриднинг бошқа бир жамоаси — “Атлетико”дан ўтган эди. “Манчестер Сити” таркибида у кўплаб совринлар, жумладан, Чемпионлар Лигаси ғолиблиги ва олти бор Англия чемпионлигини қўлга киритган.