Дунё футболи тарихида муносиб ўринга эга бўлган аёллар бир қанча топилади. Аммо уларнинг ҳаммаси ҳам қайсидир футболчи ёхуд клуб, ёинки терма жамоа фаолиятига кескин таъсир ўтказа олмаган. Биз қуйида эътибор қаратадиган хонимлар эса бу ишга муваффақ бўла олишган. Бу кетишда аёлларга нисбатан ишлатиладиган «сочи узун, ақли калта» ибораси ўз кучини йўқотади, шекилли...
18. Сара Карбонеро
Икер Касильяснинг рафиқаси қўлида микрофон тутганча, майдон четида турган гўзалнинг қандай қилиб миллат фахрига айланишига яққол мисол бўла олади. Бунинг устига, Сара ҳозирги пайтда Мадриднинг «Реал» клуби футболчилари учун бош илҳом манбаи ҳамдир.
17. Захия Дехар
Келиб чиқиши тарафдан Жазоир томонларга мансуб бўлган франциялик енгилтабиат қизалоқ Франция термасининг ЖЧ-2010даги омадсизлигида асосий айбдорлардан бири бўлди. Чунончи, мундиал арафасида терма жамоанинг Рибери, Бензема каби етакчилари Захияникида меҳмон бўлишгани ҳақида ОАВда шов-шувли хабарлар тарқалдию, терма жамоанинг ишлари чаппасига кетди.
16. Шакира
Бекхэмлар оиласи жамоатчиликка шуни исботлаб бердики, хонанда ва футболчиларнинг ўзаро ҳамкорлиги нафақат бахтли, балки жуда даромадли бўлиши ҳам мумкин экан. Шунинг учун Херард Пике шартта таниқли хонанда Шакирани никоҳига олдида, ўзи ҳам баҳонада анчагина машҳурликка эришди. Бироқ афсуски, тўйдан сўнг оиласига эътиборни кучайтирган ҳимоячи ўйин борасида йўқотишга учради. Яъни у кўп вақтини захира ўриндиғида ўтказмоқда.
15. Хелена Сегер
Швециялик Златан Ибрагимовичнинг ҳаракатларини трибунада ёхуд телеэкран орқали кузатган маъқулроқ ва хавфсизроқ. Чунки у билан ёнма-ён юрсангиз, битта ўринсиз гап учун бошингизга кутилмаган зарба тушиши ҳам эҳтимолдан холи эмас. Хайриятки, Ибранинг рафиқаси Хелен унга қандай муомала қилиш кераклигини яхши билади. Агар у бўлмаганида, ҳужумчи нафақат футбол майдонида, балки қамоқхонада ҳам анчагина қаҳрамонликлар кўрсатган бўлармиди?..
14. Тереза Ривера
Ривера хоним футбол борасида ҳеч вақони тушунмаслигини ҳеч қачон ҳеч кимдан яширмаган. 13 нафар фарзанднинг онаси бўлган бу бадавлат аёл 1994 йили Испаниянинг «Райо Вальекано» клубига президент қилиб сайланди. Тўғри, кампиршо футболни тушунмаслиги мумкин, аммо айнан унинг бошқаруви остида Мадрид клуби Ла-лиганинг доимий иштирокчисига айланди. 10 йилдан сўнг Ривера хоним дунёдан ўтди, «асаларилар» эса Сегундага йўл олишди. Шундан сўнг жамоа мухлислари «Райо ўйингоҳини «Тереза Ривера стадиони» деб аташни таклиф қилишди.
13. Шон Мэсси
Англия премьер-лигасидаги биринчи аёл ҳакам. 2011 йилнинг 22 январида АПЛ доирасидаги «Ливерпуль» ва «Вулверхэмптон» ўйини чоғида Шон омма эътиборига тушиб қолди. Аниқроқ айтсак, лайнсменнинг биринчи бўлимдаги ишини диққат билан кузатган Sky Sports телекомпанияси шарҳловчилари Энди Грей ва Ричард Кейслар танаффус чоғида микрофонни ўчиришни унутиб, Мэссининг ишларини уни таҳқирлаган ҳолда таҳлил қила кетишди. Энг қизиғи, Мэсси ўша учрашувда жуда тўғри қарорлар чиқарди. Танқидчи-шарҳловчилар эса ишдан шармандаларча ҳайдалишди.
12. Ева Карнейро
Эҳтимол, Лондоннинг «Челси» клубини ёқтирмаслик мумкиндир, аммо Евани ёқтирмасликнинг сира иложи йўқ. Очиғини айтсак, жаҳон футболидаги энг соҳибжамол аёллардан бири тиббиёт ходимлари орасида биринчи бўлиб инқилобга қўл урди. қани, айтингчи, олдинлари тиббиёт ходимларининг майдонда юришганига ким эътибор қаратган? Ҳеч ким. Аммо бугунги кунда «кўклар»нинг тез-тез жароҳат олишларини истайдиган телетомошабинлар анчагина топилади...
9. ЛКоринн Диакр
Ўтган йилнинг июнь ойида Франция иккинчи лигасининг «Клермон» клуби эркак мутахассисларнинг ишларидан зерикиб, мураббийлик курсисига аёл кишини таклиф қилди. Шу тариқа, клуб раҳбарлари аввалига бу ўринга португалиялик Элена Коштени мўлжаллашди. Аммо у сўнгги дақиқаларда таклифни рад қилгани сабабли, Франция аёллар термаси устози Коринн Диакрга эътибор қаратилди.
10. Ванесса Перронсель
Бу ҳурлиқо Англия премьер-лигасидаги энг шов-шувли жанжаллардан бирига сабабчи бўлган. Чунки Уэйн Бриж билан фуқаролик никоҳидан ўтган Ванесса севгилисининг жамоадоши ва яқин дўсти бўлмиш Жон Терри билан ҳам ишқий муносабатлар ўрнатгани маълум бўлиб қолди. Бу хиёнат тарихи ОАВда ошкор бўлиб кетгач, Терри бир лаҳзада «Йил отаси» унвонидан, кейинроқ эса терма жамоанинг сардорлик боғичидан маҳрум бўлди. Айни пайтда кўпгина футболчилар Терри билан қўл бериб сўрашмай қўйишган.
9. Лариса Рикельме
Аксарият мухлисларнинг ёдларида бор, Лариса ЖЧ-2010нинг Италия ва Парагвай терма жамоаларининг ўйини вақтида оламшумул машҳурликка эришди. Зеро у азбаройи парагвайлик футболчиларни руҳлантириш мақсадида ўзининг телефонида олинган эҳтиросли суратларни интернетга жойлади. Орадан бир йил ўтгач, у Америка кубогида ҳам шунга ўхшаш ўзгача мухлислик учун Парагвай терма жамоасининг биринчи рақамли ишқибозига айланди.
8. Кристен Пазик
Агар Кристеннинг таъсири бўлмаганида, Андрей Шевченко ҳеч қачон шон-шуҳрат чўққисидан пастга тушмасди. Чунончи, Шева шунчаки, Кристен хоним «инглиз тилида сўзлашувчилар орасида бўлиш»ни ҳоҳлагани учунгина «Челси» таклифига рози бўлганди. Шу ўринда Жозе Моуриньонинг сўзларига диққат қаратамиз: «Шевченконинг муаммолари ҳақида унинг ўзидан сўраш керак. Уйимда хўжайин - менман! Андрейда эса бундай эмас - агар унинг хотини овозини салгина баландлатса, Шева қўрқувдан каравотнинг тагига кириб кетади».
7. Ирина Шейк
Иринага қадар ҳам моделлар футболчилар билан учрашиб юришган. Аммо улар кўпинча футболчилар учун «текин ўйинчоқ» вазифасини ўтаганлар. Криштиану Роналду - Шейк иттифоқида ҳам аввалига шундай бўлиши кутилганди. Аммо Ира КриРо билан ўтган вақт давомида барча имкониятлардан тўла фойдаланиб, медиа-юлдузга айланиб олди. Маккоргина Шейк, шу тариқа, танилиб олгач, Роналдудан воз кечиб, Дуэйн Жонсон билан кинода суратга тушиб юрибди.
6. Алена Середова
«Чехиялик фотомодель Италия футболини бузмоқда» - 90 йиллар охирларида Италиянинг аксарият нашрларида тахминан шу сўзларни учратиш мумкин эди. Бунга қўшилмасликнинг иложи ҳам йўқ, аслида. Ўзингиз ўйлаб кўринг, Середова аввалига Дель Пьерони ўзига мафтун қилди. қайсидир лаҳзаларда Алекс унинг қўлини ҳам сўради. Шунда Алёна унга жавоб тариқасида Инзагига кетиб қолди. Кейинроқ Пиппо ҳам азият чекиб қолди, чунки Середова энди Виерига ошиқ бўлиб қолганди. Эсингизга солиб қўяйлик, биз ҳозир Буффоннинг собиқ рафиқаси ҳақида гапиряпмиз. Танигандирсиз...
5. Сюзанна Вернер
Афсоналарнинг гувоҳлик беришича, Бразилия терма жамоаси ЖЧ-1998 финалини айнан Сюзанна туфайли бой берган экан. Чунки ўша вақтда машҳур Роналдонинг салкам рафиқаси ҳисобланган Вернер бутун чемпионатни TV Globo шарҳловчиси Педро Бьяла даврасида ўтказади. Айтишларича, бу иш туфайли рашк ўтида қоврилган «Сўйлоқ» майдонда сира ўзини ўнглаб ололмаган ва оқибатда бутун Бразилиянинг умиди бўлган футболчи финалда умуман кайфиятсиз тўп сурганмиш. Бу қанчалик ҳақиқатга яқин, билмадигу, аммо мундиалдан сўнг Роналдо маъшуқаси билан орани очиқ қилди. Вернер эса унга-бунга илакишиб юриб, охири «селесао»нинг собиқ дарвозабони Жулио Сезар билан никоҳдан ўтди.
4. Ирина Дерюгина
Блохин ва Дерюгиналарнинг никоҳ тўйлари собиқ иттифоқ учун ҳақиқий мега воқелик эди. Телевидение унчалик ривожланмаган, газета ва журналлардаги маълумотлар ҳам ҳаминқадар бўлгани учун ўша вақтдаги «шоу-бизнес янгиликлари» фақат миш-мишлар орқали тарқаларди. Аммо шунга қарамай, таниқли гимнастикачи аёлнинг «Олтин тўп» соҳибининг турмуш тарзига етарлича таъсир ўтказа олгани рост. Биринчидан, айнан Дерюгина Блохинни хорижга юбориш учун астойдил меҳнат қилди. Иккинчидан, Иринанинг онаси Олег Васильевич билан Лобановский ўртасидаги муносабатлар бутунлай издан чиқмаслиги учун бир неча марта куёвига тўғри танбеҳ бера олди.
3. Клаудия Вильяфанья
Ҳатто расман ажралишган бўлишса-да, Клаудия Вильяфанья ҳамон Диего Марадонанинг севимли аёли бўлиб қолаверади. Зеро ҳозир ҳам Армандо қайлиқларни собиқ рафиқасининг танловига кўра биноан танлайди. Шуни биласизми?! Агар Клаудия бўлмаганида, биз Марадонани бугунгидек футбол афсонаси сифатида эсга олмаган бўлардик, бу аниқ. Чунки Диего эндигина танилган вақтида доимий кечалар, кўнгилхушликлар, гиёҳванд моддалар, енгилтак қизлар ва уюшган жиноятчилар оламига тушиб қолди. Бу ботқоқдан уни фақат садоқатли аёлигина қутқара олди. Айниқса, Марадона учун ниҳоятда омадсиз ўтган 90-йилларда Клаудия доим унинг ёнида туриб, бало-қазолардан асраб қолди.
2. Дэнни Костер (Круифф)
Йохан Круиффни доимо қарорларини ҳурмат қилишга ундаб келган Дэнни уни Голландияни тарк этиб, «Барселона» клубига ўтишга кўндирган аёл ҳисобланади. Чиндан ҳам, Йохан рафиқасининг маслаҳатларига амал қилишини ҳеч қачон яширмаган. Жуда бадавлат ва машҳур заргар Кер Костернинг қизи бўлмиш Дэнни «Голландия гўзали-67» танловида ғолиб чиққан. Китоблар ва санъатга меҳри баланд Костер хоним ўз вақтида Круиффни чекиш балосидан халос қила олганди. Албатта, кўпчилик «Барселона»нинг бугунги ютуқларини «Ла Масия» билан боғлайди. Аммо тан олайлик, Дэнни Костер Йоханни Каталонияга олиб келмаганида, «Барселона» юксакларга кўтарила олмасди.
1. Виктория Адамс (Бекхэм)
Шубҳасиз, Виктория футбол оламига имиж, ташқи кўриниш борасида ўзига хослик тушунчасини олиб кирган биринчи аёл. Мабодо Виктория ва Дэвидларнинг тақдири қўшилмаганида, биз бугун Бекхэмни фақат жарима зарбалари ва аниқ тўп оширишлари билан эслардик, холос. Машҳур гуруҳнинг собиқ хонандаси эса оддийгина иқтидорли футболчидан «идеал эркак»ни ясай олди. Айнан шунинг учун ҳам миллионлар ўйини ишқибозлари орасида хотин-қизларнинг сони кескин кўпайди.
Исроил РАҲИМОВ тайёрлади. Мақола ҳақида батафсил "ИнтерСпорт" газетасининг охирги сонида ўқишингиз мумкин
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
