"Барселона" ушбу мавсумдан эътиборан Хави - Иньеста жамоаси бўлишдан узил-кесил воз кечди ҳамда Месси, Неймар ва Суарес дружинасига айланди. Soccer.ru сайтида эълон қилинган мақолада Хави Эрнандеснинг тез орада Яқин Шарққа йўл олиши билан боғлиқ вазият таҳлил қилинади.
Хавининг Қатарга кўчиб ўтиши ҳақидаги миш-мишлар анча вақтдан бери қулоққа чалиниб келаётган эди. Аммо унинг "Ал-Садд" клуби спорт директори билан бирга тушган сурати омма эътиборига тақдим қилингач, гап-сўзлар ҳақиқатга айланаётгани ойдинлашди. Буни сенсация деб ҳисоблаш нотўғри, бу узоқ кутилган воқеадир. Чунки каталонияликлар ўтган ёзда бери ўз етакчиси билан хайрлашишга тараддуд кўришаётган эди.
Шубҳасиз, Эрнандес – буюк футболчи ва жамоавий совринлар унинг буюк шахсиятини исботлаб турибди. Афсусланарли томони, ёрқин ўйин ва ақлли узатмалари билан донг қозонган даҳо худди жамоадоши Андрес каби "Олтин тўп"ни боши узра кўтара олмади. Аммо биз унинг замондоши бўлган ҳолда Эрнандес ўйинларини ўз кўзимиз билан кўриб, завқ олганмиз. Шундай экан кейинчалик Хави ҳақида гап кетганда биз шахсий ютуқлар ҳақида умуман бош қотирмаймиз.
Хави – ҳақиқий футбол "биокомпьютери"дир, бенуқсон узатмалар машинаси, аммо шу билан бирга майдондаги кутилмаган, мантиққа зид қарорлари билан футбол ишқибозларини ҳайрат кўчасига етакловчи инсон ҳамдир. Хатога йўл қўймаслик, аммо чиройли тўп узатишларини яна ва яна такрорлаш учун миясида минглаб ўйин вазиятларини ёдда тутиш осон иш эмас.
Эрнандеснинг энг катта ютуғи – бу кўпчилик футболчилар фахрланадиган "тўғри" оёқлар эмас, балки ўз танасини бўйсундиришга муваффақ бўлган тафаккуридир. Тўғри, кундалик машқлар ва тонг отар маҳалдан кун ботар маҳалгача тўп билан муомала қилишсиз ҳеч нима чиқмасди. Лекин кўплаб ўсмирлар ҳам худди шундай ҳаёт тарзига амал қилишади. Демак, бу ерда инсоннинг ирсияти билан боғлиқ факторлар кўп нарсани ҳали қилиши яна бир карра ўз тасдиғини топади.
Хави тақдир унга ато этган иқтидорни ўз вақтида англаб етиб, салоҳиятини ва куч-қудратини кераксиз ишлар, нотўғри қарорлар, аҳмоқона машғулотларга йўналтиргани йўқ.
Бускетснинг фикрича, Хави испан футболининг барча даврларидаги энг зўр футболчиси. Аммо афсуски, биз ҳали вақтни ўз назоратимизга олиш илмини ўзлаштира олмадик. Вақт эса ҳеч қачон ҳеч кимга вафо қилмаган.
Гвардиола "Барса"дан кетгач Эрнандес сайёрамизнинг энг кучли футболиси даражасида тўп суришдан тўхтади, жорий мавсум эса у асосий таркибдаги ўрнини бутунлай йўқотиб қўйди. Аслида у ўтган ёздаёқ кетмоқчи эди, аммо Луис Энрике уни қолишга кўндирди. Хави ҳақиқатдан ҳозирги жамоага зарур, айниқса футболчилар ўртасида юз бериши мумкин бўлган низоларни юмшатиш учун ҳам керак эди. Ахир Хави ҳақиқий сардор ва дипломатдир.
Аммо Каталонияда бундан кейин узоқ вақт ушланиб қолиш мантиққа тўғри келмайди. Қолаверса, "Барселона" ярим чизиғида ажойиб, иқтидорли футболчилар тўп сурмоқда, ёшлар камолга етмоқда.
Катта эҳтимол билан Хави келаси мавсумдан бошлаб Қатарда фаолият юритади. Эҳтимол, ўша ерда мураббийлик ишини ҳам йўлга қўяр? Чунки шу хилдаги миш-мишлар ҳам қулоққа чалиняпти.
Эрнандес келажакда "Барса"ни бошқариш ниятида. Ўзининг футбол майдонидаги фикрлаши, дипломатияси, шахсий фазилатлари ва етакчи бўла олиш иқтидорига эга Хавидан балки ажойиб мураббий чиқар.
"Ал-Садд" Эрнандеснинг келишув бўйича якуний қарорини кутмоқда. Аммо бунгача ҳали охирига етказилмаган ишлар ҳам бор. Хави Европа футболи билан чиройли тарзда хайрлашишни истамоқда, "кўк-анорранглилар"да эса барча турнирларда зафар қучиш учун ажойиб имконият мавжуд.
Маҳмуджон АЗИМОВ
таржимаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
