АПЛ вақт ўтгани сари энг «қаймоқли» нуқтасига яқинлашмоқда. Табиийки, жорий мавсум ҳам бир қатор ёшлар ўзларини ижобий томондан кўрсатиб, эртанги кунга янгича умид уйғотишмоқда. Демак, қуйида ҳам ўйин, ҳам трансфер нархи бўйича жиддий силжишга эришган 15 нафар футболчи ҳақида маълумот берамиз. Эътиборлиси, улар ҳали 23 ёшдан кичиклар.
Тибо Куртуа («Челси»)
Бельгиялик голкипер «Атлетико»даги 2та ажойиб мавсумидан сўнг «Челси»га қайтди. Бироқ унинг «кўклар» сафидаги истиқболи туманли кўринганди. Амалда эса Тибо кимсан Петр Чех ўрнини бутунлай ўзиники қилди. Натижада матбуотда чехиялик кипернинг «Челси» билан хайрлашиши ҳақида хабарлар урчиди. Тўғри, Куртуа қишда жароҳатдан азобланди ва унинг мавқеи нисбатан «қимирлаб» қолди. Лекин кейинчалик ўзини ўнглаб олган бельгиялик ўртача кўрсаткичлар бўйича премьер-лиганинг энг ишончли дарвозабонларидан бирига айланди.
Ёздаги трансфер нархи: 25 млн. евро
Ёзда қизиққан клублар: «Барселона», «Атлетико»
Ҳозирги трансфер нархи: 30 млн. евро
Ҳозирда қизиқаётган клуб: «Реал»
Патрик Макнейр («МЮ»)
Бирданига, қўққисдан чақнаган британиялик кутилмаганда, «МЮ»нинг ғалабалари тимсолига айланди. Эътибор беринг, Макнейр иштирок этган дастлабки 6та ўйиннинг барчасида «МЮ» ғалаба қозонди. Боз устига, бу ҳолат мавсум бошида, жамоа дуч келган рақибга очко улашаётган пайт кузатилди. Умуман олганда, Патрик бошланғич таркибдан жой олган чемпионат ўйинларида «Юнайтед» атиги бир марта ютқазди («Манчестер Сити»га).
Ёздаги трансфер нархи: 250 минг евро
Ёзда қизиққан клублар: номаълум
Ҳозирги трансфер нархи: 1,5 млн. евро
Ҳозирда қизиқаётган клублар: номаълум
Тайлер Блэккетт («МЮ»)
Луи ван Галь дарҳол ёшларга ишонч билдиришни маъқул кўрди. Макнейр билан синхрон тарзда Жесс Лингард ва Тайлер Блэккетт ҳам «МЮ» таркибига киришди. Агарда Лингард 1-турда майдонга тушгани билан бошланғич таркибда бошқа кўриниш бермаган бўлса, Тайлер кучлилар қаторида ўзига жой топди ва ҳозирда Фил Жонс, Жонни Эванс, Крис Смоллинг ва айнан Макнейрга рақобат тақдим этяпти. «Қизил иблислар»нинг Блэккетт билан шартномани узайтиришни хоҳлаётганлари бежиз эмас. Хабарларга кўра, унинг ҳафталик маоши нақ 25 маротаба (!) оширилади (2 мингдан 50 минг еврога).
Ёздаги трансфер нархи: 500 минг евро
Ёзда қизиққан клублар: номаълум
Ҳозирги трансфер нархи: 1 млн. евро
Ҳозирда қизиқаётган клублар: номаълум
Жеймс Уилсон («МЮ»)
Мавсум старти арафасида асосий таркибдаги жой учун Радамель Фалькао, Уэйн Руни ва Робин ван Перси қатори Жеймс ҳам даъвогарлик қилишини биров ўйлаганмиди? Умуман, бу йигитча ким ўзи? Факт шуки, Уилсон кучли рақобатдан ҳайиқмай, голлар ҳисобини очди ва трансфер баҳоси ярим йил ичида 6 марта (!) қимматлашди. Ван Перси эса табиий равишда ўз ўрнидан хавотирлана бошлади...
Ёздаги трансфер нархи: 250 минг евро
Ёзда қизиққан клублар: номаълум
Ҳозирги трансфер нархи: 1,5 млн. евро
Ҳозирда қизиқаётган клублар: номаълум
Натаниэл Клайн («Саутгемптон»)
«Саутгемптон»нинг ўтган мавсумдан қолган «қолдиғи» ҳозир ҳам чакки эмас. Ўзи Клайннинг топ-клубларга ўтмагани тушунарсиз ҳолат. Зеро, у маҳорат бобида ўша Лаллана, Ламберт, Шоу, Чемберс ва Ловрендан сира кам эмас. Мана, Натаниэл барқарорликни сақлаган ҳолда, ўта ишончли тўп сурмоқда ва Англия термасидан ҳам таклиф олди. Хуллас, «Саутгемптон» Клайнни яна бир мавсум ўз таркибида олиб қолишни уддаласа, бу чинакам мўъжиза саналади.
Ёздаги трансфер нархи: 7 млн. евро
Ёзда қизиққан клуб: «МЮ»
Ҳозирги трансфер нархи: 12 млн. евро
Ҳозирда қизиқаётган клублар: «МЮ», «Ливерпуль»
Жеймс Уорд-Проуз («Саутгемптон»)
«Авлиёлар»нинг навбатдаги кашфиётлари. Жеймс 19 ёшида «Саутгемптон»нинг асосий таркибига кирди ва бир йилдан сўнг жамоа етакчисига айланди. 15та ўйинда 7та голли узатма - зўрми? Демак, Уорд-Проуз келаси ёзда «Саутгемптон» томонидан уюштириладиган «аукцион» жараёнида яхшигина нархда сотилса, ажабмас.
Ёздаги трансфер нархи: 5 млн. евро
Ёзда қизиққан клублар: номаълум
Ҳозирги трансфер нархи: 8 млн. евро
Ҳозирда қизиқаётган клублар: номаълум
Садио Мане («Саутгемптон»)
«Саутгемптон» бутун мавсум бўйи ягона кашфиёт билан чекланиб қолармиди? Мана, клуб скаутлари Садио Манени Австрия лигасидан топишди ва мураббийлар уни тезлик билан истиқболли юлдузлар қаторига қўшишди. Ҳарқалай, Мане айни пайт «Саутгемптон»нинг энг ёрқин футболчилардан бири саналмоқда.
Ёздаги трансфер нархи: 7,5 млн. евро
Ёзда қизиққан клуб: «Вест Хэм»
Ҳозирги трансфер нархи: 14 млн. евро
Ҳозирда қизиқаётган клублар: номаълум
Эрик Дайер («Тоттенхэм»)
Антиқа тарих: англиялик футболчи «Спортинг-Б» клубида «сузиб», қимматбаҳо ўйинчиларни харид қилишга қодир «Тоттенхэм»га ўтди ва бошқалар билан тенгма-тенг асосий таркибга кириш учун курашмоқда. Ҳозирдан скаутлар Эрик Дайер атрофида парвона бўлишяпти, аммо клубга аниқ таклиф тушганича йўқ. Фақат, ҳозирча.
Ёздаги трансфер нархи: 3,5 млн. евро
Ёзда қизиққан клублар: «Арсенал», «Суонси»
Ҳозирги трансфер нархи: 7 млн. евро
Ҳозирда қизиқаётган клублар: номаълум
Кристиан Эриксен («Тоттенхэм»)
Даниялик йигит ўтган мавсумдаёқ клубнинг энг ёрқин «фигура»си бўлганди, ҳозир ҳам «тақачилар»ни ўз ортидан эргаштирмоқда. У ва Гарри Кейндан иборат жуфтлик 25тадан ортиқ гол уришга улгурди. Стандарт вазиятларнинг асосий ижрочиси, ностандарт ҳаракатларнинг асосий ва ягона устаси, қисқаси, асосий юлдуз. Ҳа, «Тоттенхэм»да Эриксеннинг мавқеи тобора ошяпти, шунга яраша, трансфер нархи ҳам нақ 7 млн. евро «болалади»...
Ёздаги трансфер нархи: 20 млн. евро
Ёзда қизиққан клублар: номаълум
Ҳозирги трансфер нархи: 27 млн. евро
Ҳозирда қизиқаётган клублар: «ПСЖ», «Ливерпуль»
Райан МэйсОН («Тоттенхэм»)
«Суиндон Таун»дан «Тоттенхэм»га. Бу реал воқелик эмас, Голливуд фильми сценарийсига хос. Аслида Райанни асосий таркибга мўлжалламагандилар ҳам, ҳозир эса у етакчи футболчилардан бири. Таянч ярим ҳимоячиси учун 2та голли узатма ёмон натижа эмас, трансфер нархининг нақ 18 карра (!) ошгани эса кўп нарсадан далолат беради.
Ёздаги трансфер нархи: 250 минг евро
Ёзда қизиққан клублар: номаълум
Ҳозирги трансфер нархи: 4,5 млн. евро
Ҳозирда қизиқаётган клублар: номаълум
Гарри Кейн («Тоттенхэм»)
Гарри Кейн АПЛ-2014|2015нинг бош кашфиёти - бунга шубҳа йўқ. Агар кимда-ким шубҳаланадиган бўлса, унда «Реал» ва «МЮ» каби клублар аллақачон Гаррининг «изи»га тушишганига эътибор қаратсин. Тўғри, ҳозирда футболчининг ўзи «тақачилар»га садоқатини намойиш этиб, янги шартнома тузишга хайрихоҳ турибди. Шундай бўлсада, топ-клублар барибир, «Тоттенхэм»да ногаҳон чақнаган йигитни ўз таркибларига оғдиришдан умидворлар.
Ёздаги трансфер нархи: 3 млн. евро
Ёзда қизиққан клублар: номаълум
Ҳозирги трансфер нархи: 15 млн. евро
Ҳозирда қизиқаётган клублар: «МЮ», «Реал»
Раҳим Стерлинг («Ливерпуль»)
Дэниэль Старриж жароҳатини даволанаётган, Стивен Жеррард «Ливерпул»дан кетиш ҳақидаги қарорини қандай эълон қилиш ҳақида бош қотираётган, Марио Балотелли эса ҳеч ўзини кўрсатолмаётган пайт Раҳим Стерлинг «Ливер-пул»нинг ягона умиди бўлиб келди. У голлар урди, тинмай югурди, меҳнат қилди ва мавсум ярмигача «Гол}пас» тизими бўйича «5}6» кўринишида очко тўплади. Бунинг натижасида трансфер нархига яна «арзимас» 10 миллион евро қўшилди.
Ёздаги трансфер нархи: 20 млн. евро
Ёзда қизиққан клуб: «Реал»
Ҳозирги трансфер нархи: 30 млн. евро
Ҳозирда қизиқаётган клублар: «Реал», «Бавария», «Челси», «ПСЖ»
Сэм Амеоби («Ньюкасл»)
Оралиқ танаффусга қадар 17та ўйин, 2та гол, 2та самарали узатма - «Ньюкасл»нинг бош захирачиси қандайдир ярим йил ичида асосий таркибнинг тўлақонли аъзосига айланди. Тўғри, Сэмнинг истиқболи ҳақида баралла гапиришга ҳали эрта. Лекин таъкидлаш жоизки, унда «Ньюкасл»нинг чин етакчиси бўлиши учун имкониятлар етарли.
Ёздаги трансфер нархи: 2 млн. евро
Ёзда қизиққан клуб: «Шеффилд Уэнсдей»
Ҳозирги трансфер нархи: 5 млн. евро
Ҳозирда қизиқаётган клублар: номаълум
Айосе Перес («Ньюкасл»)
Канар оролларининг бир бурчагида қолиб кетган ва аллақачон унутилган «Тенерифе» клубидан таклиф этилган Айоса АПЛга ёввойи қарғадек шиддат билан «учиб» келди. Оддий айтганда, бунгача примерода ҳам ўйнаб кўрмаган нотаниш футболчи бир нафасда «Ньюкасл» асосий таркибига ўрнашди ва айни пайт заргарона тўп узатишлари, кучли зарбалари, ўйинни нозик илғаши ва ақлли ҳаракатлари билан ажралиб турибди. Хуллас, у яқин орада «қарғалар» сафидан топ-клубга «учадиган» навбатдаги топ-ҳужумчига айланса, ҳеч ким ортиқча ажабланмайди.
Ёздаги трансфер нархи: 2 млн. евро
Ёзда қизиққан клублар: «Реал», «Барселона»
Ҳозирги трансфер нархи: 5,5 млн. евро
Ҳозирда қизиқаётган клублар: номаълум
Сейду Бериано («Вест Бромвич»)
«Кичик» клубларда «очилган» асосий кашфиёт - Сейду Бериано. Англиялик футболчи мутлақо кутилмаган ҳолатда тўпурарлар пойгасида кўриниш берди ва барчанинг эътиборини ўзига қаратди. Тезкор ва атлетик жиҳатдан чаққон йигит премьер-лигада нима қилиши лозимлигини дарҳол тушунди, чоғи, бирданига голлар ура бошлади. Тўғри, қишда у бироз тин олди, аммо бу пасайиш потенциал харидорларни хавотирга солаётгани йўқ. Унга transfermarkt.de сайтида қўйилган нарх «Вест Бромвич» талаб қилаётган суммадан анча паст эканлигини ҳам таъкидлаш жоиз.
Ёздаги трансфер нархи: 5 млн. евро
Ёзда қизиққан клуб: «Арсенал»
Ҳозирги трансфер нархи: 12 млн. евро
Ҳозирда қизиқаётган клублар: «Ливерпуль», «Тоттенхэм», «МЮ»
Дэнни Ингс («Бернли»)
Турнир жадвалининг қуйи қисмида юрадиган клублар таркибидан чиққан яна бир иқтидорли йигит. «Бернли» премьер-лигада «жон» сақлаб қолиш учун «жон олиб, жон бермоқда». Ёш ҳужумчи Дэнни Ингс эса клубни гўёки, «сочи»дан ушлаб, юқорироққа тортяпти. Ингс чемпионат тўпурарлари орасида кучли ўнликда бормоқда. Қолаверса, 4та голга ҳаммуаллифлик ҳам қилди. Натижаларига мувофиқ, трансфер нархи секин-аста кўтариляпти. Умуман, йигитча ёзда «Бернли»ни нисбатан кучлироқ клуб билан алмаштирса, бундан ҳеч ким заррача ҳайрон бўлмайди.
Ёздаги трансфер нархи: 4 млн. евро
Ёзда қизиққан клублар: номаълум
Ҳозирги трансфер нархи: 10 млн. евро
Ҳозирда қизиқаётган клублар: номаълум
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
