Тарихда «қуръа ташланди», деган ибора бор. Юлий Цезарга тегишли. Цезар ҳали император бўлмаган ва саркардалик мақомида турган вақтда унинг ҳудуди Рубикон дарёси билан чегараланар ва ундан ўтган тақдирда, уруш бошланиши белгилаб қўйилган эди. Айтишларича, буюк саркарда қўшинини дарё бўйига олиб келгач ҳам анча вақт иккиланиб турган ва ниҳоят нариги соҳилга ўтиш ҳақида буйруқ берар экан: «Қуръа ташланди», деган экан. Саркарданинг мана шу гапи тарихда қолиб кетган.
Ўзбекистон миллий терма жамоаси учун ҳам қуръа ташланди. Бундай қуръа бизнинг энг қўрқинчли тушимизга ҳам кирмаслиги турган гап эди. Аслида «Баҳрайн» атамаси футболга сал бўлса-да қизиққан ҳар қандай инсонни бироз сескантириши ҳеч кимга сир эмас. Энди жаҳон чемпионати сари бошланадиган навбатдаги курашда яна шу рақибга қарши майдонга тушишга тўғри келади. Майли эди гуруҳда қолган жамоалар «мундайроқ» бўлганида. Шимолий Корея қандай кучга эга эканини ҳаммамиз биламиз. Боз устига олимпиячилар Бангладешдан қуруқ қўл билан «шалвираб» қайтганидан буён Ямандан ҳам чўчиб қолганмиз. Гуруҳда яна Филиппин терма жамоаси ҳам борлиги эса фойда эмас, зарар келтириши ҳеч гап эмас. Чунки Филиппин ҳаммага очко улашган тақдирда, унинг барча ўйинлари натижалари бекор қилиниши ва ўзаро ўйинлардан келиб чиқиб ўринлар қайтадан тақсимланиши мумкин. Бу эса мавҳумликни келтириб чиқаради. Яхши биламиз, дунёда мавҳумликдан ёмони йўқ.
Ўзбекистон миллий терма жамоаси навбатдаги жаҳон чемпионати ва Осиё кубоги учун саралашда мана шундай рақибларга қарши кураш олиб бориши лозим. Жуда оғир гуруҳ, шундай эмасми? Ишқилиб терма жамоа бундай гуруҳдан чиқа олармикан?
Бундай саволлар ҳар бир мухлисни эзаётгандир эҳтимол. Футбол - миллионлар ўйини. Жаҳон чемпионати унинг энг юқори чўққиси. Терма жамоалар эса ҳар бир футбол мухлисининг фахри ва ғуруридир. Бутун бошли мамлакат шарафини ҳимоя қиладиган жамоа муваффақияти ҳар бир мухлиснинг ғурурини осмон баробар кўтарганидек, мағлубияти унинг нафсониятини етти қават ер қаърига тушириб қўйиши турган гап. Шунинг учун ҳам Ўзбекистон миллий терма жамоаси майдонда кўринганда бошқа ҳар қандай иш четга сурилади. Бор эътибор 11 нафар футболчига қаратилади. Зеро бундай ўйинларда уч очко эмас, балки бутун бошли мамлакат шаъни ўйланади. Шундай экан, ким ҳам ЖЧ саралашига беэътибор бўлар экан?
Бу сафарги саралаш баҳслари қандай кечар экан - а? Рақиблар жиддий бўлса, бири Баҳрайн, иккинчиси эса КХДР терма жамоаси. Боз устига фақат биринчи ўринни эгаллаган жамоа тўғридан-тўғри кейинги босқичга йўл олади. Иккинчи ўрин соҳиби эса... Ўзбекистон МТЖ ҳали ҳеч қачон иккинчи босқичдаёқ иштирокни якунламаган эди. Наҳотки бу сафар...
Ҳай, ҳай, яхши ният қилайлик. Насиб этса ҳаммаси зўр бўлади. Сизга қолса, ҳозирданоқ саралашни тугатиб қўйсангиз. Ундан кўра яхши нарсалар ҳақида ўйласангиз-чи. Уни-буни қўйинг, бир ҳисобдан саралашнинг бошиданоқ шундай кучли рақиблар дуч келгани яхши бўлди. Ўзбекистон миллий терма жамоаси жаҳон чемпионатига чиқишни мақсад қилганми, нима учун энди Баҳрайн ва КХДРдан қўрқиши керак экан? Керак бўлса, улар биздан қўрқсинлар. Шундай эмасми?
Терма жамоа мана шундай рақибларга қарши кечадиган курашларда тобланиб, кейинги босқичга чиқадиган бўлса, анча-мунчадан ҳайиқмаслиги турган гап. Ёдингизда бўлса, тўрт йил олдин Ўзбекистон МТЖ худди шундай гуруҳдан жой олган эди. Бизга қарши Япония, КХДР ва Тожикистон терма жамоалари курашган эдилар. Ўшанда ҳам пессимист мухлислар руҳан тушкунликка берилган, оптимистлар эса имкон қадар камроқ гапиришга ҳаракат қилган эдилар. Ўша учрашувлар қандай натижа билан якунланди? Ҳа, яшанг, Ўзбекистон миллий терма жамоаси кимсан Япония ва КХДРни сафарда мағлуб этди ва гуруҳда биринчи ўринни эгаллаган эди. Боз устига бу ўйинлар терма учун катта тажриба мактабини ўтаган ва футболчиларимиз сал бўлмаса жаҳон чемпионати йўлланмасини қўлга киритишлари ҳам мумкин эди. Афсуски, тўплар нисбати бизнинг фойдамизга бўлмагани важидан мундиалга Австралия ва Жанубий Корея йўл олди. Аммо майли, ўтган гаплар билан ярангизни янгиламайлик. Яхшиси, эътиборимизни келгуси учрашувларга қаратамиз.
ЖЧ ва ОК саралашларининг дастлабки босқичидаёқ кучли рақибларга қарши кураш олиб боришнинг яна бир ижобий томони бор. Яхши биламиз, Терма жамоалар маркази ҳар доим ҳам савияли жамоалар билан ўртоқлик ўйинлари ташкил қилиб бера олмайди. Ҳали у баҳона кўрсатилади, ҳали буниси. Шундай экан, ҳал қилувчи сўнгги босқичга Малайзия ва Қирғизистон эмас, балки Баҳрайн ва КХДР жамоаларини енгиб, тобланиб чиққан маъқул эмасми?
Нима бўлган тақдирда ҳам, биз, мухлислар келажакка ишонч билан қарашимиз лозим. Кўпни кўрган мутахассислар айтдики, терма жамоа шу гуруҳдан эсон-омон чиқиб олса, албатта жаҳон чемпионатига борар экан. Биз ҳам мана шу гапга ишонамиз ва унинг рўёбини тилаймиз. Ким билади дейсиз, бу қуръадан биздан кўра рақиблар қай даражада хафа бўлган эканлар. Шундай экан, келинг, фақат яхши нарсалар ҳақида ўйлайлик.
Ҳа-я, мақола бошида келтирилган Юлий Цезар воқеаси қандай якун топган, дерсиз? Цезар ўша қуръада адашмаган ва ҳамма рақибларини енгиб, Рим тахтини эгаллаган эди. У шу иши билан тарихда қолган. Ким билади дейсиз, балки Ўзбекистон миллий терма жамоаси ҳам тарихда қоладиган ишлар бўсағасида тургандир...
Абдуллоҳ, "ИнтерФУТБОЛ" газетаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
