Маълумки, Стивен Жеррард «Ливерпул»даги сўнгги мавсумини ўтказмоқда. Хўш, унинг «қизиллар» таркибидаги рамзлик, сардорлик ўрнини ким эгаллайди? Албатта, ҳатто Бренден Рожерс якунда ўз шогирдларини кучли тўртликка олиб чиққан тақдирда ҳам мухлислардан жорий мавсумнинг аламларини кетказиш осон бўлмайди. Жеррарднинг жамоадан кетишига аҳд қилганлиги, Старрижнинг жароҳати, «МЮ», «Челси» ва «Арсенал»дан қабул қилиб олинган мағлубиятлар, жамоанинг ЧЛ, ЕЛ, Англия ва Лига кубокларидаги омадсизликлар - буларнинг барчасини унутиш осон эмас. Бироқ бу ҳаёт. У келажак сари олға интилишни талаб этади.
Қишки ғалабалар серияси эвазига «Ливерпуль» фахрли тўртликка яқинлашгач, мухлислар кўнглида умид учқунлари чақнади. Футболчиларнинг имкониятлари хусусидаги тасаввурлар ўзгара бошлади. Ҳа, янги мавсумда Стивини «қизиллар» сафида кўролмаймиз, Раҳим Стерлингдек ёрқин футболчи ҳам хайрлашиш арафасида турибди. Демак, жамоада янги етакчи пайдо бўлади. Бу борада ортиқча бош қотиришнинг ҳожати йўқ - сўнгги вақтларда ёрқин ўйин кўрсатаётган Филиппе Коутиньо бош юлдуз ролига жуда муносиб. Келинг бразилиялик иқтидор соҳибининг устун жиҳатлари билан яқиндан танишиб чиқайлик.
Афсунгарлик
Коутиньо яшил майдонда чинакам мўъжиза кўрсатмоқда. Янги йилдан кейин бу футболчининг ҳаракатларини ҳеч бўлмаганда бир марта кўзатган мухлис, албатта, бу фикрни тасдиқлайди. Филиппе сўнгги 3,5 ойни шунчалик шиддатли ўтказдики, мутахассислар уни АПЛ мавсумининг энг яхши футболчиси унвонига номзодлар сафига киритишди. Ваҳоланки, у узоқ вақт давомида спорт формасини тиклашдан нарига ўтолмаганди. Бренден Рожерснинг декабрь ойидаги трюкидан кейин Коутиньони тўхтатишнинг иложи бўлмай қолди. Футболчининг парвозини қуйидаги рақамлар яққол намойиш этади: 16 август - 25 декабрь оралиғида Филиппе ҳар қайси ўйинда ўз жамоадошлари учун ўртача, 0,84та қулай шароит яратиб берганди. Бу - Фернандиньо, Жо Аллен ва Том Клеверлининг кўрсаткичларидан паст, шу давр ичида камида 10та учрашув ўтказган барча футболчилар орасида Коутиньо 118-ўриндан жой олганди. Бундан ташқари, АПЛдаги 996 дақиқалик фаолияти давомида бирорта ҳам самарали тўп узатишни амалга оширолмаган, ўз ҳисобига бор йўғи 2та голни («КПР» ва «Арсенал» дарвозасига) ёзиб қўйганди.
Энди мавсумнинг ҳал қилувчи босқичидаги кўрсаткичларга эътибор беринг: ҳар 90 дақиқа ичидаги қулай шароит яратиш 2,03га (Мата, Эриксон, Фабрегасларникидан юқори) етди, АПЛнинг барча футболчилари орасида 19-ўринга кўтарилди. Ўз ҳисобига чемпионатда 4та самарали тўп узатиш ва 2та голни ёзиб ўйди. Англия кубоги турниридаги 3та голи «қизиллар»нинг ярим финалга қадар етиб келишларига муносиб улуш қўшди. Бундан ташқари, Коутиньо энг яхши дриблинг соҳиблари рўйхатида 6-(ҳар ўйинда 3,43 марта алдаб ўтиш) ва ҳужумкор футболчилар ўртасида 8-поғонадан жой олди. Бу борада футболчи Стерлинг, Бентекс, Коста ва Касорладан ўзиб кетди. Тўғри, Роналду, Месси ва Харри Кейндек сермаҳсул ўйинчилар даврида Филиппенинг натижалари лол қолдирадиган даражада эмас. Бироқ у ўйинга кўрсатадиган таъсири рақамлар билан ўлчаб бўлмайдиган футболчилар сирасига киради. Асосий вазифаси плеймейкерлик бўлишига қарамай, мунтазам равишда прессинг иштирокчиси (ҳар ўйинда ўртача 1,75 марта тўпни рақибдан тортиб олади). Бу борада Филиппе Сако, Морено, Шкртель ва Хендерсондан олдинда. Тўпни назорат қилиш бобида «Ливерпул»нинг ҳеч бир аъзоси у билан тенглашолмайди. Қолаверса, «қизиллар» ҳужумларининг 80 фоизини айнан у бошлаб беради. Қўшимчасига 2015 йили бирорта жамоадоши дриблинг бобида ундан ўзиб кета олгани йўқ, рақиблар дарвозаларини нишонга олиш бўйича ҳам Филиппе етакчи - ҳар бир учрашувда ўртача 3,29 зарба. Рақиб дарвозаси олдида хавфли вазиятларни юзага келтириш борасида ҳам устунлик унинг томонида. Эътиборли жиҳати шундаки, Коутиньо бундан бир неча йил муқаддам туманли ўлкага ташриф буюрганидаёқ «Ливерпуль» мухлислари уни «Митти афсунгар» тахаллуси билан сийлашганди. Тўғри, футболда ўйинчига лақаб қўйишдан кўра жўнроқ юмуш бўлмаса керак. Лекин очиғи, узукка қўйилган кўздек мос тушадиган тахаллусга (Жонатан Вудгейтга берилган «қишлоқи» номини инобатга олмаганда) анчадан бери дуч келмаётгандик. Дарҳақиқат, Коутиньонинг ўйини ҳар қандай мухлисни ўзига ром этади. Уни кузатар экансиз, беихтиёр хаёлингиздан бир фикр ўтади: «Борди-ю, Филиппе мавсум аввалидан шундай юксак савияни намойиш этганида, АПЛдаги бугунги вазият қандай кўриниш оларди?» Балки, «Ливерпуль» «Челси» ўрнида етакчилик қилармиди?
Шорт - лист
Ўтган ҳафтада АПЛ ўзининг мавсумдаги энг яхши футболчисини эълон қилди. Унда «Челси»нинг бельгиялик легионери Эден Азар ғолиб чиқди. Ана шу юксак унвонга номзодлар орасида қаҳрамонимиз ҳам бор эди. Тўғри, Эден Азар, Давид де Хеа, Харри Кейн каби юлдузлар билан бўлган рақобатда ғолиб чиқиш имконияти Коутиньода деярли йўқ ҳисобида эди. Лекин шуни ҳам унутмаслик керакки, Филиппе фақат Рождество байрамидан кейин ёрқин ўйинлар кўрсата бошлаганди. Ана шу қисқа вақт ичида номзодлар сафидан ўрин олишнинг ўзиёқ ёш иқтидор соҳибининг юксак салоҳиятидан далолат беради.
Шу ўринда «Ливерпул»нинг бошқа бир аъзоси - Луис Суарес 2012|2013 йиллар мавсуми якунига кўра айнан шу унвонга даъвогарлик қилганини эслатиб ўтиш жоиз. Бир йилдан сўнг қандай воқеалар юз берганини ҳаммамиз яхши биламиз.
Битим
Раҳим Стерлинг ва унинг ҳали имзоланмаган янги шартномаси хусусида ҳар ким истаганча фикр билдириши мумкин. Аммо бизнинг ҳозирча билганимиз шуки, англиялик футболчи ўз қилиқлари билан мухлислар ва раҳбариятнинг дилини «хуфтон» қилди, ўз обрўсини тўкди. Коутиньо эса ортиқча тортишувларсиз, ҳеч қандай можароларга йўл қўймаган ҳолда итоаткорлик билан 5 йиллик келишув остига имзо чекди. 70000 фунтли ҳафталик иш ҳақини оширишларини талаб қилмади. Демак, мутасаддилар бир ҳафталик фаолияти 100000 турадиган Стерлингдан воз кечиш учун ишончли далилга эга бўлдилар.
«Ливерпуль» сафида тўп суриш - рўёбга чиққан орзу! «Ливерпуль» - буюк жамоа! Унинг мухлислари мени доимо қўллаб-қувватлашмоқда. Шу сабабли музокаралар бошланган куниёқ мен шартномани имзолашга тайёр эдим. Ўша кун мен учун энг бахтли ҳисобланади», - деган эди ўшанда Коутиньо. Юқорида зикр этилган сўзлардан хулоса чиқарадиган бўлсак, бразилиялик иқтидорли ярим ҳимоячи янги мавсумни «қизиллар» етакчиси сифатида бошлайди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
