Ўзбекистон чемпионати 8-тури бизга кутилмаган етакчини тақдим этди, дейиш анча нотўғри бўларди. Нотўғри ҳам гапми, бу билан биз биринчида бораётган «Нефтчи»га нисбатан ҳурматсизлик ҳам қилган бўлар эдик. Кейин, бу ҳурматсизликка асло клубнинг шонли ва анча унутилаёзган ўтмиши эмас, балки жорий йилда қайд этаётган натижалари сабаб бўлишини ҳам алоҳида таъкидлаб ўтиш лозим. «Нефтчи» ниҳоят ўтмиши билан эмас, балки бугунги куни билан яшашни ўрганиб олган кўринади - жамоа қайд этаётган натижалар бунга мисол...
Эътибор беринг, «Нефтчи» Олий лиганинг 8-турига келиб мағлубиятга учрамаган ягона жамоа бўлиб турибди. «Локомотив» мағлуб бўлди, «Пахтакор» очко йўқотди, қўйинг-ки, анча барқарор кўринган «Насаф» ҳам бир бора енгилишга улгурган. «Бунёдкор» ҳақида-ку, умуман гапирмадик. «Қалдирғочлар» ўз тарихларида илк марта «Сўғдиёна»дан мағлубиятга учрадилар. Шундай экан, нима учун «Нефтчи» ҳаммани енгиб, Олий лигада биринчи ўринга кўтарилиб олса, кутилмаган ҳолат бўлиши керак? Йўқ, «Нефтчи» ҳақли равишда турнир жадвалида етакчи бўлиб олди. Боз устига фарғоналиклар қаторасига 6та ўйинда ғалабага эришганлар. Мурод Исмоилов шогирдлари дастлабки икки турда дуранг қайд этганларидан буён ҳали бирор марта очко йўқотмадилар. Мана энди ўзингиз бир ўйлаб кўринг, шундай жамоа мусобақа жадвалида етакчиликни қўлига олса, ҳайрон қолиш керакми?
«Нефтчи» ҳақида гаплашар эканмиз, ҳали анча илиқ фикрлар билдиришимиз мумкин. Кимдир бунга эътироз қилиши ва фарғоналикларнинг асл кучи етакчиларга қарши кечадиган ўйинларда намоён бўлишини айтиши мумкин. Аммо ҳамма гап шундаки, «Нефтчи» мана шу ўтган қисқа вақт ичида икки марта ғолибликка асосий даъвогарлардан ҳисобланган жамоалар билан куч синашишга улгурди. Бу ўйинлар натижаси қандай бўлганини ўзингиз ҳам биласиз - «Локомотив» билан дуранг натижа қайд қилинди (1:1), «Бунёдкор» эса мағлубиятга учратилди (1:0). Бироқ бу ҳали ҳаммаси эмас - эътиборли томони, ҳар икки жамоага қарши кечган учрашув ҳам сафарда ўтказилди. Яъни фаворитлар ўз майдонида мағлуб этилди ёки ғалабага тенг бўлган дуранг қайд қилинди. Бу натижалар ҳам «Нефтчи»нинг кучи қай даражада эканини билдириб турса керак.
Энди олдинда «Насаф» ва «Пахтакор»га қарши кечадиган ўйинлар кутиб турибди. Шу ўринда таъкидлаш жоиз, агарда бу учрашувларда ҳам «Нефтчи» яхши натижага эришса, Фарғона бу йил чемпионлик учун кураш олиб боришини бемалол, баралла овоз чиқариб айтаверинг. Ҳеч тортинманг. Мабодо «Пахтакор» ҳам мағлуб этиладиган бўлса, Мурод Исмоиловга бўлган ҳурматимиз бемисл даражада ошиб кетиши турган гап. Чунки яхши биламиз, Исмоилов ўз вақтида «Пахтакор» билан Ўзбекистон чемпионатида ғалабага эришган эди. Мураббийнинг «шерлар» билан муносабати ҳозир ҳам ёмон эмас. Шундай экан, таниш-билишчилик яшил майдон четида қолиши ва ҳакам ҳуштаги чалингач, ҳамма рақибга айланиб, ашаддий кураш бошланишини бизга айнан шу ўйин исботлаб берган бўларди. Шундай эмасми?
Майли, асосий мавзудан чалғимайлик. Келинг, шу ўринда бир саволга жавоб топишга ҳаракат қилиб кўрсак. Ўтган мавсум «Нефтчи» анчайин мураккаб вазиятда қолган эди. Жамоадан Юрий Саркисян кетгач, «Нефтчи» ўзига кела олмаслиги ва ҳатто Биринчи лигага тушиб кетиши мумкинлиги ҳақида гап- сўзлар пайдо бўлган эди. Саркисяндан сўнг орадан бироз вақт ўтгач «Нефтчи» раҳбариятига ҳам чиқиш эшиклари кўрсатилди. Бу эса жамоадаги ички муҳитга ҳам таъсир ўтказмай қолмади. Қаторасига учралган мағлубиятларга қўшимча ўлароқ матбуотда ҳам «Нефтчи» шаънига турли гап-сўзлар чоп этила бошлади. Бу эса мавжуд вазиятга яна-да чигаллик олиб кирарди. Бир қарашда Фарғона футболи жуда катта муаммолар гирдобига ўралашиб қолгандек кўринганди. Бундай гап-сўзлар мавсум якунига етгач ҳам тинмади. Фақат бу йил - «Нефтчи» кетма-кет ғалабаларга эриша бошлагачгина жамоани тинч қўйишди.
«Нефтчи» бу йил чемпион бўла оладими ёки йўқ, бу ҳақда гапиришга ҳали анча эрта. Чунки биз ҳар қанча истамайлик, жамоанинг йил давомида барқарор ўйин намойиш этиш имконияти қай даражада эканини биз билмаймиз. Бунинг учун клуб тенг кучли икки таркибга эга бўлиши керак. «Нефтчи»да эса яхши биламизки, ёрқин номлар у қадар кўп эмас. Аммо нима бўлган тақдирда ҳам фарғоналиклар бу йил ўз сўзларини айтишга улгурдилар. Яқинда устоз журналист Алишер Никимбаев статистика борасида чиройли гап гапирганди - «Нефтчи» охирги марта 2007 йилда Олий лигада якка пешқадам бўлган экан. Ўшанда фарғоналиклар Ўзбекистон чемпионатида 11-турга қадар етакчиликни ушлаб турганлар. Аммо якунда «Бунёдкор» ва «Пахтакор» барибир олдинга ўтиб кетган. «Нефтчи» шундан буён биринчи ўринга чиқа олмай келаётган эди. Ниҳоят орадан 8 йил ўтиб фарғоналиклар яна тахтга қайтдилар.
Бу йил вазият анча бошқача, боз устига, клублар ўртасидаги фарқ ҳам у қадар катта эмас. Ким билади, дейсиз, балки «Нефтчи» бизни ҳали кўп ҳайрон қолдирар. Бироқ нима бўлган тақдирда ҳам, фарғоналикларга мана шу натижа учун ҳам раҳмат айтгинг келади.
Умид қиламизки, мавсум охирига қадар «Нефтчи» бундай раҳматлардан ҳали кўпини эшитади. Ахир қачонгача пули кўп жамоалар чемпион бўладилар - биздан ҳам чиқсин-да «Атлетико»га ўхшаган чемпионлар...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
