Таэквондо (WTF). ЖЧда муваффақиятли иштирок этган юртдошларимиз Ватанимизга қайтиб келдилар
Инсон ҳаётида шундай воқеалар бўладики, ҳеч қачон ёддан кўтарилмайди, келгусида эса авлодлар томонидан фахр билан ёдга олинади. Россиянинг Челябинск шаҳрида Олимпиада ўйинлари дастуридан ўрин эгаллаган Таэквондонинг WTF йўналиши бўйича ўтказилган жаҳон чемпионатида мардонавор спортчиларимиз томонидан қўлга киритилган улкан муваффақиятларни ҳам мана шундай тарихий воқеалар сирасига киритиш мумкин.
Эътиборлиси, дунёнинг 140дан зиёд давлати вакиллари иштирокида бўлиб ўтган мазкур йирик спорт мусобақасида Ўзбекистон терма жамоаси аъзолари 1 та олтин ва 2 та кумуш медалга сазовор бўлиб, озод ва обод юртимизда камолга етаётган ёшлар ҳеч кимдан кам эмаслигини дунё аҳлига яна бир бора намоён этдилар.
Шу ўринда таъкидлаш жоизки, мазкур жаҳон чемпионатида иштирок этган 140дан ортиқ давлатдан фақатгина 30 давлат вакилларигагина совринли ўринларни эгаллаш насиб этди. Шундан ўнта давлат терма жамоалари жаҳон чемпионатининг олтин медалларини қўлга киритдилар. Қувонарлиси, улар орасидан Ўзбекистон терма жамоаси аъзоси Дмитрий Шокин ҳам ўрин эгаллади.
Энг оғир вазндаги спортчилар мусобақасида Ватанимиз шарафини ҳимоя қилган Дмитрий Шокин ғоятда муросасиз кечган беллашувлар давомида мардлик ва жасурлик намуналарини намоён этиб, чин маънода қаҳрамонга айланди.
Кейинги пайтда биз жаҳон чемпиони деган иборани оддий сўз билан талаффуз қилишга одатланиб боряпмиз. Бир қарашда бу жуда яхши ҳолат. Бироқ, ушбу иборани маъно-мазмунини янада чуқурроқ таҳлил қиладиган бўлсак, ер юзида истиқомат қилаётган етти миллиарддан зиёд аҳоли орасида маълум бир спорт турининг маълум бир вазн тоифасида дунёда тенгсиз деган маънони англаш мумкин. Шу маънода олиб қарасак, ҳамюртимиз Дмитрий Шокин бугунги кунда Таэквондо спорт оламида энг оғир вазндаги спортчилар орасида жаҳонда тенгсиз.
“Жаҳон чемпионатида туғилиб ўсган Ватани шаънини муносиб ҳимоя қилиб, шохсупанинг энг юқори поғонасига кўтарилиш ҳар бир спортчининг улкан орзуларидан бири ҳисобланади. Мен мана шундай муваффақиятни қўлга киритганимдан, жонажон Ўзбекистонимиз байроғини сарбаланд кўтариб, халқимиз, Президентимиз ишончларини оқлаганлигимдан бахтиёрман. Менинг ушбу ғалабам барча юртдошларимизнинг ғалабаси деб биламан. Фурсатдан фойдаланиб, Давлатимиз ва хукуматимиз раҳбариятига чексиз миннатдорчилигимни билдирмоқчиман. Шу билан бирга, биз қаерга бормайлик, иштирок этаётган мусобақамизнинг нуфузи нечоғлик юқори бўлишидан қатъий назар доимо бизни қўллаб-қувватлаб турадиган барча юртдошларимизга, ота-онам, устозларим ҳамда жамоадошларимга ташаккур билдираман. Насиб этса, бундан кейин ҳам аҳил жамоамиз билан юксак натижаларга эришиб, ҳамюртларимизни ҳушнуд этишда давом этаверамиз”.
Эътиборлиси, мана шундай юксак шарафга эришиш учун яна икки нафар юртдошимиз жуда яқин келишди. Финалга қадар кечган беллашувларни ўз фойдасига ҳал қилишга муваффақ бўлган Никита Рафалович (-74 кг) ва Жасур Бойқўзиев (-87 кг) жаҳон чемпионатининг кумуш медаллари билан тақдирланишди.
“Жаҳон чемпионатида совриндор бўлганимдан хурсандман, – дейди Жасур Бойқўзиев. Эндиги орзуим – 2016 йили Бразилияда ўтказиладиган Олимпия ўйинларида Ватанимиз шаънини муносиб ҳимоя қилиш. Бунинг учун бор куч-ғайратимни сарфлайман”.
“Бу йилги жаҳон чемпионати муросасиз курашларга бой ўтганлиги билан аввалгилардан кескин фарқ қилди. Мана шундай кучли рақобат остида бўлиб ўтган нуфузли мусобақада совринли ўринни эгаллаганимдан жуда ҳам бахтлиман. Ушбу муваффақият бизга яна юксак масъулият юклайди. Зеро, эндиликда бизга дунёнинг етакчи спортчилари сифатида қарашади. Шуни ишонч билан айтаманки, келгусида ҳам жаҳоннинг пешқадам спортчилари сафидан мустахкам ўрин эгаллаш учун бор куч ва имкониятимизни ишга соламиз”, - дейди Никита Рафалович.
Мана шундай юксак натижаларни қўлга киритган Ўзбекистон терма жамоаси аъзолари Тошкент халқаро аэропортида катта тантана ва шоду-хуррамлик билан қарши олиндилар. Ғолиб спортчиларимизни кутиб олиш учун Ўзбекистон Миллий олимпия қўмитаси, Маданият ва спорт ишлари вазирлиги, Республика Таэквондо (WTF) ассоциацияси раҳбарияти, ОАВлари ходимлари, спортчиларнинг оила аъзолари, дўстлари пешвоз чиқдилар.
Маълумот учун. Дунёнинг 140дан зиёд давлати вакиллари иштирокида ўтаётган мазкур йирик спорт мусобақасида 2016 йили Рио-де-Жанейро шаҳри (Бразилия)да бўлиб ўтадиган XXXI ёзги Олимпиада ўйинларининг йўлланмалари учун рейтинг очколар ҳам ўйналди. Мазкур жаҳон чемпионатига қадар ўзбекистонлик спортчилар (Эдуард Хегай ва Акмал Эргашев) фақатгина икки бор жаҳон чемпионатининг кумуш медаллари билан тақдирланишган эди.
Манба: www.olympic.uz
Киритилди: 09:02, 20.05.2015. Ўқилди: 4917 марта. Фикрлар: 1 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
