Футбол оламининг сўнгги йиллардаги трансферлари жамоатчиликни шунга ўргатдики, эндиликда ҳали анча ёш, аммо келажаги порлоқ дея эътироф этилаётган футболчилар учун ақлга сиғмайдиган катта пуллар сарфланса ҳам ҳеч ким ортиқча ҳайрон бўлмайди. Ўзингиз ўйлаб кўринг, бундан қандайдир 10 йилларча аввал 50 миллион еврога Европа футболидаги энг ёрқин юлдузлардан бирини ва унга қўшимча қилиб яна икки нафар ўртача савиядаги захира вакилларини харид қилиш мумкин эди. Бугун эса худди шу 50 миллионга битта мавсумни яхши ўтказган Пауло Дибаланинг трансфер ҳуқуқини сотиб оласиз, холос. Ваҳоланки, у ўзини кўрсатган Италия чемпионати айни вақтда Испания ва Англиядаги мусобақалардан анча ортда қолиб кетган. Ёхуд бунча пулга ЖЧдаги ёрқин иштироки туфайли танилган Хамес Родригесни таркибга қўшиб олиш мумкин. Очиғини айтиш керак, молиявий fair-play ҳам футболчиларга белгиланаётган нархларнинг ҳаддан зиёд ошиб кетишига кутиганидек қаршилик қила олмаяпти. Бироқ ҳатто шундай ҳолатда ҳам нархларнинг сунъий равишда ўсишидан «плюс»ларни топиш мумкин экан. Бошқача айтганда, кутилмаганда мавсумни жуда кўтаринки кайфият билан ўтказган клублар ўзларининг бош юлдузларини фантастик пулга сотиб, шунинг эвазига таркибни 4 ёки 5 нафар янги ижрочилар билан бойитиб олишади. Аммо, бахтга қарши, бу иш ҳамманинг ҳам қўлидан келавермайди.
Омадли мисоллар
Зайниддин Зидан («Ювентус»дан «Реал»га; 73,5 миллион евро)
Эдинсон Кавани («Наполи»дан «ПСЖ»га; 64,4 миллион евро)
Златан Ибрагимович («Интер»дан «Барселона»га; 69,5 миллион евро)
Кўриниб турибдики, трансферлар бозоридаги чаққонлик борасида итальян клубларига тенг келадигани йўқ. Мисол учун, «Ювентус»ни олайлик: «Кекса синьора» Зиданни «Реал»га сотилишидан тушган пулларни оқилона сарфлаб, ўз таркибига «Олтин тўп»нинг бўлажак соҳиби - Павел Недвед, ўн йилликнинг энг яхши дарвозабони Жанлуижи Буффон ва ўша вақтларда дунёнинг энг яхши қанот ҳимоячиси бўлмиш Лилиан Тюрамларни харид қилди. Қисқаси, Лучано Моджининг ушбу ҳаракатлари туфайли клуб Италия чемпионатида яққол гегемонга айланди. Чемпионлар Лигасида эса финалгача етиб борди. Бир сўз билан айтганда, Зиданнинг сотиб юборилиши ўша вақтларда шундоқ ҳам кучли бўлган «Ювентус»ни Апеннинда тенгсиз жамоага айлантирди.
«Наполи»га келсак, клуб хўжайини Аурелио Де Лаурентис жамоа тарихидаги энг йирик трансферни амалга ошириб, уругвайлик Каванини Париж клубига ўта қиммат нархда сотди. Унинг савдосидан келган даромадга харид қилинган футболчиларни кўринг: Гонсало Игуаин (дарҳол Каванининг ўрнига голлар ура бошлади), Хосе Кальехон (Неаполда «очилиб», ўз нархини 3 баробар қимматлаштирди) ва Дрис Мертенс (у ҳам деярли уч баробар қимматлашиб, Бельгия термасининг етакчиларидан бирига айланди). Жорий мавсумда «Наполи» Европа Лигаси бош соврини учун курашмоқда ва эҳтимолки, унга бош даъвогар ҳам. Энди ўзингиз ўйлаб кўринг: бундан атиги етти йил илгари бу клуб «А» серияда умуман йўқ эди. Мана, пулни қандай саралаш керак?!
«Интер» ҳақида ҳам кўп гапириш шарт эмас, яхшиси, Златан Ибрагимовичнинг сотувидан кейин клубга таклиф этилган футболчилар рўйхатини кўздан кечирамиз. Булар: Диего Милито, Самуэль Это`о, Уэсли Снейдер, Тьяго Мотта ва Лусио. Ўша мавсумда Милан жамоаси ажойиб ўйинлар кўрсатиб, «требл»га эришди. Айтганча, айнан ўша даврда Жозе Моуриньо бошчилигидаги клуб ЧЛ ярим финалида «Барселона»ни енгганди. Шундан кейин ҳам футболдаги молиявий даҳолардан бири бўлган Массимо Мораттини олқишламасликнинг иложи бормикан?..
Омадсиз мисоллар
Гарет Бэйл («Тоттэнхем»дан «Реал»га; 100 миллион евро)
Луис Суарес («Ливерпул»дан «Барселона»га; 93,4 миллион евро)
Англия премьер-лигаси ҳақида гап кетганда, бир омилни инобатга олишимиз шарт - чемпионатдаги жуда қулай ва фойдали молиявий ҳолат клубларнинг зарарига ишлаган чоғи, қайсидир футболчининг сотувидан тушган катта пулларни тўғри сарфлашда инглиз жамоалари муаммоларга дуч келишмоқда. Бунга энг ёрқин мисол - «Тоттенхэм». Ваҳоланки, Гарэт Бэйлнинг трансфери футбол тарихида рекорд эди - юз миллион евро! Унинг сотуви келтирган фойда эса «шпор»ларга кўплаб янги аъзоларни тақдим этди: Роберто Сольдадо (ҳалигача Туманли Альбиондаги голлари сонини 10тадан ошира олмади), Эрик Ламела (Англиядаги биринчи мавсумдаёқ жиддий жароҳатга йўлиқиб, майдонда қайтиб кўринмади), Паулиньо (унинг трансферидан мақсадни ҳалигача ишқибозлар тушуна олишмаяпти). Биргина Кристиан Эриксеннинг таркибга қўшиб олиниши ўзини оқлади, холос. Трансфер бозоридаги омадсиз юришлар туфайли «шпорлар» ҳалиям чемпионатнинг ўртамиёна клуби даражасидан юқорига чиқа олмади. Гарэтнинг ўрнига қабул қилинганлар эса фойдали иш коэффиценти борасида унинг ярим ишини ҳам бажара олишмади.
Луис Суареснинг трансферига боғлиқ «Ливерпул»нинг «бозори» ҳам омадсизлик бобида «Тоттенхэм»дан асло қолишмайди. Аслида Луис жамоадан кетганидан сўнг мерсисайдликлар таркибга кўплаб етакчи футболчиларни жалб қилишди ва Брендан Рожерс жамоаси бу мавсумда фақат чемпионлик учун курашиши тахмин қилинди. Бироқ бунинг ўрнига, «қизиллар» ЕЧЛга йўлланмани ҳам қўлга кирита олишмади. Биргина уругвайлик футболчининг нархига сотиб олинган «янгилар» эса умуман ўзларини кўрсата олишмади. Ўзингиз таққослаб кўринг: Луис Суарес ўтган мавсумда жамоаси учун 31 тўпни рақиблар дарвозасига йўллаганди. Альберто Морено, Эмре Жан, Адам Лаллана, Марио Балотелли, Лазар Маркович ва Ричард Ламберт (буларнинг бари ўша трансфер келтирган фойдага харид қилинган)лар эса бутун мавсум давомида биргаликда атиги 10та гол уришди, холос. Айниқса, Балотеллининг сотиб олиниши клуб тарихидаги энг омадсиз таранферлардан бири бўлди, зеро, ҳатто Эндрю Кэррол ҳам ўз вақтида Балотеллидан яхшироқ кўрсаткичларга эришганди. Қолаверса, 27 миллион евро эвазига таркибга қўшилган Деян Ловрендан ҳам умидлар катта эди. Бироқ у жорий мавсумда атиги бир миллионга арзийдиган ўйинни ҳам намойиш қилмади. Тўғри, Суарес кетгач, жамоада янги юлдуз порлади - Раҳим Стерлинг. Энг қизиғи, у ҳам жамоадан шу ёздаёқ кетмоқчи. Умид қиламизки, Стерлингнинг трансферидан тушадиган маблағ бу гал оқилона сарфланади.
Биз бу яқин тарихни таҳлил қилиб турган бир вақтда жаҳон футболида янги йирик трансфер юзага келмоқда. Яъни катта эҳтимол билан айтиш мумкинки, тез орада франциялик ёш марказий ярим ҳимоячи Поль Погба Туриннинг «Ювентус»ини бошқа клубга алмаштиради. Унинг трансфер нархи эса 80 миллион евродан кам бўлмайди. Биз яхши биламизки, туринликлар раҳбарияти бундай шов-шувли трансферлар ва ўта йирик пуллар борасида яхшигина тажрибага эгалар. Чунончи, бугун 80 «лимон»га баҳоланаётган Погбани бир вақтлари «МЮ»дан Туринга олиб келиш учун атиги 300 минг евро сарфланганди. Энди фойдани ҳисоблаб кўринг - 79 миллион, 700 минг евро! Италия матбуоти эса ҳозирданоқ унинг ўрнига таклиф қилиниши мумкин бўлган футболчилар рўйхатини туза бошлади. Нимаики бўлмасин, янаги мавсумда «Ювентус» «Реал», «Барселона», «Бавария» ёки «Челси» каби грандлар қаторига кириб олиши мумкин. Қисқаси, таркибдаги етакчи футболчини сотиш - ҳам доим ҳам клуб зарарига ишлайвермайди. Италия клублари эса буни бир неча бор исботлашга улгуришди.
А.ҚОДИРОВ тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Қўқон-1912
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
