Легионер футболчиларнинг сони кўпайгани терма жамоаларнинг ўсишига хизмат қилади. Бугунги кунда Одил Аҳмедов, Санжар Турсунов, Сервер Жепаров сингри маҳоратли футболчиларимиз хорижнинг кучли жамоаларида тўп суришмоқда. Албатта, кучли мамлакат чемпионатларида ўйнаган ҳамюртларимизнинг сони ортгани ўзбек футболининг ривожига улкан ҳисса қўшган бўлишади. Яна шундай ўйинчиларимиз борки, улар миллий биринчилиги кучли бўлмаса-да, юртимиз шарафини ҳимоя қилган ҳолда ўзбек футболининг довруғини кенгайтиришмоқда. Қуйида турли экзотик мамлакатлар футболида ўйнаётган футболчиларимиз борасида сўз юритамиз.
Алишер Аҳмедов (“ Радиант ” , Мальдив ороллари)
Ушбу дарвозабон сўнгги маротаба 2012 йилги мавсумда миллий чемпионатимизда тўп сурганди. Шундан бери эса Аҳмедов фаолиятини бошқа мамлакат биринчиликларида давом эттириб келяпти. Хусусан дарвозабон 2013 йилдан то 2014 йилнинг охирига қадар Қозоғистон чемпионатида тўп сурган бўлса, жорий йил бошидаг эса Мальдив оролларига йўл олди. У ерда Аҳмедов «Радиант» клуби шарафини ҳимоя қилмоқда. Шу ўринда айтиш керакки, Мальдив ороллари олий дивизионида 8та жамоа қатнашади ҳамда мусобақа тўрт даврадан иборатлигини ҳам айтиш керак. «Радиант» клуби амалдаги мамлакат чемпиони ҳисобланади. Бу йил эса клуб ОФК Кубогида қатнашди. Афсуски, ҳамюртимизнинг мана шу мусобақада жамоаси билан иштироки омадсиз келди ва улар гуруҳда қолиб кетишди. Шунга қарамай, жиззахлик дарвозабон клубнинг асосий дарвозабони бўлиб, барча баҳсларда тўп сурмоқда.
Артур Парванов (“Олой”, Қирғизистон)
Яна бир дарвозабонимиз ҳозирги кунда Қирғизистон чемпионатида ўйнамоқда. Парванов бунгача мамлакатимизда тўп суриб, сўнгги жамоаси «Локомотив» ва «Оқ-тепа» клублари бўлганди. Мавсум бошида эса Парвановга «Олой» клубидан таклиф келиб тушди. Ҳозирги кунда эса Артур бишкек шаҳри жамоаси шарафини ҳимоя қиляпти. Боз устига бу жамоада Улуғбек Мўминов ҳам ўйнамоқда. Мўминов анчадан бери «Олой» сафида ўйнаб келмоқда. Умуман олганда, Қирғизистон чемпионатида бир қатор футболчиларимиз тўп суриб келишади. Бу анъанани дарвозабонларимиз ҳам давом эттириб келаётганлиги қувонарли холдир. Шуни қўшимча қиламизки, Парванов «Олой»нинг асосий дарвозабони ҳисобланади. Бунгача эса яна бир дарвозабонимиз Рустам Дадабоев биринчи рақамли кипер эди. Дадабоев эса 2015 йилнинг бошида эса «Оқ-тепа» клуби сафига келиб қўшилганди.
Асрор Ғофуров (“ Манисаспор ” , Туркия)
«Пахтакор» клуби тарбияланувчиси бўлган Асрор Ғофуровнинг йил бошида Туркия биринчи лигасига кетиб қолганлиги кўпчиликни диққатини ўзига қаратганди. Негаки, Ғофуров шу кунгача футболчи сифатида ўзини кўрсата олмаганди. Бироқ унинг Туркия биринчи лигаси иштирокчиси бўлган «Манисаспор» билан шартнома тузганлиги ажаблантирганди. Ярим ҳимоячи бўлган Ғофуров клуби сафида ўзини кўрсата олди. Доимий равишда майдонга тушиб келганлигини тилга олиш жоиз. Бироқ унинг клуби чемпионатда омадсизликга дуч келиб, Туркия иккинчи лигасига равона бўлди. Бунинг оқибатида ҳамюртимиз клуб билан амалдаги шартномасини бекор қилишга мажбур бўлди. Чунки Туркия иккинчи лигасида легионерлар хизмтидан фойдаланишга тақиқ қўйилган. Бунинг оқибатида Ғофуров жамоасиз қолиб кетди. Футболчининг берган баёнотига кўра, унга Туркиянинг бошқа бир клубларидан таклифлар бўляпти экан.
Ҳусниддин Ғофуров (“ Явор ” , Сербия)
Сербия чемпионатида тўп суриб келаётган Ҳусниддин Ғофуров учун йил омадли тарзда келди. Негаки, «Явор» таркибида мамлакат иккинчи лигасида тўп сурган ҳамюртимиз келгуси йилдан яна олий дивизионида ўйнайдиган бўлди. «Явор» бир йиллик танаффусдан сўнг яна кучлилар орасига қайтди. Мавсум давомида Ғофуров бир қатор голларни киритишни уддасидан чиқди ҳамда клубнинг олий дивизионига чиқишига ёрдам берди. Умуман, Ҳусниддин Ғофуровга мавсум арафасида юртимиз клубларидан ҳам таклифлар бўлганди. Бироқ футболчи юртимизга қайтишни истамаганди ва «Явор»га ёрдам беришини айтиб ўтганди. Буни қарангки, унинг бу клубдаги ишлари силлиқ кетмоқда.
Фарҳод Тожиев ва Садриддин Абдуллаев (“ Т-ТИМ ” , Малайзия)
«Локомотив» клубидан кетган икки нафар футболчи бугунги кунда Малайзия чемпионатида тўп сурмоқда. Малайзия футболида ўсиш секин-аста бўляпти. Бироқ у ерд молиявий томондан клубларнинг бақувват эканлигини кўрсатиш мумкин. Шу жиҳат ҳам айрим ўйинчиларимизнинг Малайзияга кетишига сабаб бўлмоқда. «Т-Тим» жамоасида ўйнётган бу йигитларимизнинг ишлари ҳам чакки эмас. улар ўз даражасида ўйнаб келишмоқда. Садриддин Абдуллаев ярим ҳимоячи бўлиб, асосан ҳужумчиларни тўп билан таъминласа, Тожиевларнинг кичиги эса гол киритиш борасида етакчи ҳисобланади. Бежизга уни Ўзбекистонлик Анри деб аташмайди.
Даурен Эшбоев ( “ Махтаорол ” , Қозоғистон )
«Шўртан», «Қизилқум» ва «Сўғдиёна» клубларида тўп сурган ҳимоячи Даурен Эшбоев ўтган мавсумдан буён фаолиятини Қозоғистон биринчи лигасида давом эттирибк келяпти. Эшбоев «Махтаорол» шарафини ҳимоя этмоқда. Бу йил ушбу клуб Янгиер шаҳрида мавсумга тайёргарликни давом эттирди. Йиғин мобайнида бир қатор назорат учрашувларида қатнашди. Шу ўйинларда Эшбоев ўзида яхши таассурот қолдирганлиги билан ёдда қолди. Умуман олганда, «Махтаорол» клубида Рауф Инилеев ҳам ишлаганлигини кўпчиликга сир эмас.
Қозоғистон биринчи лигасида бир қатор футболчиларимиз ўйнаб келишади. Павле Пуришкин, Жасур Нарзиқулов сингари ўйинчилримиз ҳам анча вақтдан бери қўшни мамлакатнинг қуйи дивизионида ватанимиз номида ҳаракат қилиб келишади.
Иззатбек Абдуваҳобов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
