Ёхуд Мартуниснинг машаққатли болалиги
Португалиянинг «Спортинг» клуби ўтган ҳафтада ўз сафига янги футболчини қўшиб олди. Бу эса яхшигина шов-шувга сабаб бўлди. Мартунис исмли ёш йигитча, гарчи тажрибали ҳисобланмаса-да, ўзига хос тарихга эга. Айнан унинг футболга кириб келишигача бўлган жараёнлар, бошидан ўтказганлари бутун дунё ОАВнинг эътиборини жалб қилганди. Шу боисдан ҳам бу футболчининг «Спортинг»га ўтиши кўпчиликни бефарқ қолдирмади. Биз эса Мартуниснинг айнан болаликдаги аянчли ўтмишига тўхталиб ўтмоқчимиз.
ЭНГ ОҒИР ЖУДОЛИК
7 ёшли Мартунис онаси ва икки опаси билан машинада кетаётганди. Кутилмаганда машина қаттиқ силкинди ва айланиб кетди. Маълум вақтдан сўнг эса у сувга ғарқ бўлиб ётарди. Бу автофалокатдан фақат Мартунис омон қолди, холос. Аниқроғи, у сув юзасида қалқиб турган мактаб стули парчаларига илашиб қолганди. Унинг онаси ва опалари эса ҳалок бўлишди. Сувнинг шиддатли оқими болакайни Индонезиянинг Суматра шаҳридаги шаҳарчалардан бирига элтиб ташлади. Мазкур воқеа 2004 йилнинг 26 декабрида содир бўлган, афтоҳалокатга эса зилзила сабаб бўлганди. Индонезиядаги бу зилзиланинг кучи 9, 3 магнитудага тенг бўлиб, унинг натижасида 230 минг нафар одам ҳалок бўлганди.
ДЕНГИЗ БАҒРИДАГИ УЧ ҲАФТА
Мартунис Банда-Ачех шаҳарчасига келгунча, денгизда уч ҳафталик сарсонгарчиликка дучор бўлди. Тўлқин уни очиқ денгизга улоқтириб ташлаганди. Унинг ихтиёрида стул, матрас, ёғоч хода, кресло қолдиғи ва диван бор эди, холос. Мартунис уч ҳафта мобайнида ҳаётини сақлаб қолиш, очликка қарши курашиш учун қуритилган угра истеъмол қилди. Бахтига, уни ҳам цунами шу ёқларга олиб келганди. Шунингдек, тоза минераль сув ичди (бу сувнинг борлиги ҳам унинг бахти эди) .
Уч ҳафта давомида йигитча бир нечта ўнлаб жасадларни кўрди ва бутун Ер юзида ёлғиз ўзим қолган бўлсам керак, деб ўйлади. Денгиздаги ҳаётнинг ўн тўққизинчи кунида барча озиқ-овқат ва ичимлик захиралари тугади, океан ҳам йигитчага ёрдам берадиган озиқ овқат солинган ёки ичимлик бўлган идишларни улоқтирмай қўйди. Мартунис кучдан қолганида сув тўлқини уни қирғоққа улоқтириб ташлади. Ҳолдан тойиш, ҳашаротларнинг чақишидан қолган жароҳатлар, хуллас, у мазкур ҳодисадан кейин вайронагарчиликлар орасида қолганди.
ЖУРНАЛИСТЛАР ЭЪТИБОРИНИ ТОРТГАН КУЛБА
Аммо шу ерда Мартунис кутилмаган омадга дуч келди: қирғоқдаги 21-кунда «Sky News» телеканали журналистлари билан учрашади. Журналистлар мазкур ҳудудда юришар, охирги цунами оқибатлари тўғрисида репортаж тайёрлашарди. Улар Ачехда ёлғиз болакай яшаётган омонатгина кулбани кўриб қолишади. Журналистлар дарҳол Мартунисни овқатлантириб, сув ичиришди ва касалхонага олиб боришди. Унинг отаси ва бошқа қариндошларини излай бошлашди.
Бу хабар бутун дунёга тарқалиб кетди. Айниқса, Португалияни карахт аҳволга солиб қўйди. Чунки уч ҳафта давомида денгизда сузган йигитча футбол бўйича Португалия терма жамоаси либосини кийиб олган, либоснинг орқасига эса «Руи Кошта» деб ёзиб қўйилганди. «Мен бу вақтда умуман қўрққаним йўқ, чунки яшашни, оилам билан учрашишни ҳамда футболчи бўлишни хоҳлардим», — деганди ўшанда Мартунис журналистларга берган интервьюсида.
Португалия футбол федерацияси бу қатъиятли болакайга тасанно айтди ва уйини тиклаб олиши ҳамда ҳаётини изга солиши учун отаси 40 минг евро ажратди. Криштиану Роналду эса болакайни оиласи билан бирга Португалия терма жамоасининг ўйинига таклиф қилди.
«МЕН ФАҚАТ ФУТБОЛГА ҚИЗИҚАМАН»
Роналду 2005 йилнинг ёзида Банда-Ачехга келди. У Мартунис билан ўйин ўйнади, унга телефон совға қилди ва «Спортинг» жамоаси базасига таклиф қилди. Бунинг учун кетадиган маблағларни тўлашни эса ўз зиммасига олди. Бу Роналдунинг биринчи ёрдами эмасди. У кўп бора Мартунис билан учрашди ва унга дастхати туширилган футболкаларини совға қилди. Кейинчалик эса Криштиану болакайга инглиз тилини ўрганишни ва футбол мактабига ёзилишни маслаҳат берди. Роналду Мартунисга Мадриднинг «Реал» клуби фонди ҳомийлик қилишини айтди.
«Менинг асосий қизиқишим бу — футбол. Мени бошқа спорт турлари умуман қизиқтирмайди. Бувим футболчи бўлган, шу боис мен ҳам улғайганимда футбол ўйнашни жуда истардим», — дейди Мартунис 2008 йилда берган интервьюларидан бирида.
Йигитнинг отаси, Сарбини балиқ савдоси билан шуғулланади. У кўп вақтини ўғли билан футбол ўйнашга (ҳатто кечқурунлари ҳам) ва тил ўрганишга сарфлайди. «Мен доим ўғлимнинг мактабга боришини, инглиз тилини ўрганишини истаганман. У ҳаётда кўплаб имкониятларга эга бўлиши учун ақлли бўлиши керак. Мен у таълим олишни тўхтатиб қўйишини истамайман, чунки ўзим шундоқ ҳам саводсизман, саводсизлик имкониятларни анча чегаралаб қўйишини яхши биламан», дейди Сарбини.
ПРОФЕССИОНАЛ ФУТБОЛГА ҚАДАМ
2014 йилнинг октябрида Мартунис Индонезия ёшлар терма жамоасига қабул қилинди. «Криштиану мен жуда кўп шуғулланишим ва тажриба тўплашим кераклигини айтди, — дейди Мартунис. — Унинг фикрича, агар ўз устимда тинимсиз шуғуллансам, мен қила олмайдиган ишнинг ўзи қолмас экан, энг муҳими, профессионал футболчи сифатида шаклланарканман. Бу эса менинг азалий орзум».
Мартунис, ниҳоят, ўтган ҳафтада «Спортинг» билан шартнома имзолади. Бу унинг учун ҳақиқий бахт эди. Фақат у дарҳол асосий таркибда ўйнаб кета олмайди, дастлаб португаль клуби академиясида шуғулланади ва «Спортинг» ёшлари сафида вақти-вақти билан ўйин ўтказади. Мартунис эса Роналду унинг омади эканлигини таъкидлашдан чарчамайди, чунки айни дам Криштиану уни қўллаб-қувватламоқда, хусусан, Лиссабонда тажрибали мураббийлар қўл остида тажриба тўплашига ёрдам бермоқда.
Криштианунинг Мартунисга кўрсатган биринчи катта янгилиги компьютер эди. У Мартунис билан бирга компьютерда ишлаган даврларини қуйидагича хотирлайди: «Компьютер экранини очишим биланоқ йигитчанинг кўзлари каттариб кетди, у компьютерни биринчи марта кўриб турганди».
Айни дамда Мартунис келажакдаги орзуси сари дадил қадам ташламоқда. Роналду эса ундан етук футболчи чиқишига ишонади. Биз эса кўплаб қийинчиликларни енгиб ўтган Мартуниснинг ўзи орзу қилгандек футболчига айланишини истаб қоламиз.
Интернет материаллари асосида НИЗОМ тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
