Бундан 11 йил олдин Индонезияда 230 минг кишининг умрига зомин бўлган даҳшатли ер силкинишларидан бири содир бўлганди. Мазкур фожиа ҳақида фильмлар ҳам суратга олинган, аммо йиллар ўтгани сари ўша машъум воқеанинг янгидан-янги тафсилотлари маълум бўлмоқда. Қуйида уларнинг бири ҳақида сўз боради.
7 ёшли Мартуниш севимли жамоаси бўлган Португалия термаси либосида футбол ўйнаётган пайтида улкан цунами остида қолди. Уни уч ҳафта қидиришди. Дастлаб ҳалок бўлган онаси ва икки укасини топишди. Сўнг Мартунишнинг ўзини. Болакай шунча вақт давомида фақат кўлмаклардан сув ичган ва хом угра билан озиқланганди. Мартунишни шифохонага олиб келган ташкилот (Save theChildren) аъзосининг айтишича, агар бола бир кун кейин топилганида, у тирик қолмас экан.
Госпиталда Мартуниш қақроқни енгди, отасини учратди. Катта бўлгач эса яна коптокни қўлига олди. Индонезиянинг Банда-Ачех шаҳридаги футбол мактабига қатнаш билан бирга, ҳафтасига 3 марта инглиз тили дарсларини қолдирмади. Буни болакай орзу сари йўл деб билди.
Натижада, орзунинг ўзи Мартунишни ахтариб топди. Португалия футбол федерацияси мазкур воқеадан бохабар бўлгач, жабрланганлар уйини таъмирлашда ёрдам берди, орадан 3 йил ўтгач эса йигитча иккинчи «кумири» бўлмиш Криштиану Роналду билан учрашди. Биринчи «кумири» эса - бобоси эди. «У футболчи бўлган ва мен катта бўлгач, албатта бобомга ўхшашни хоҳлайман», - деган эди Мартуниш 2008 йилда.
- Ўғлим ақлли, унинг келажаги тўғрисида аниқ тасаввурга эга бўлиб вояга етишини истагандим, - дейди Мартунишнинг отаси. - Аммо менинг йўлимдан бормасин, ахир мен таълим ололмадим. Умид қиламанки, у келажакда яхши касб эгасига айланади.
Мартуниш таклиф этилган Лиссабоннинг «Спортинг» клуби академиясида ўйинчиларга пул тўланмайди. Лекин дунёдаги кўпгина болалар орзу қилган мақсадга етиши учун имкон берилади. Мартунишнинг ўзи ҳам буни жуда яхши ҳис қилади. «Менга бундай имкон берилганидан хурсандман. Бу ерда бўлишнинг ўзи катта бахт. Яшасин, «Спортинг!», - деди у клуб томонидан ўтказилган тантанали маросим чоғида.
Дарвоқе, Роналду бундан 11 йил аввал Мартунишга терма жамоа либосини тақдим этганди.
Криштиану «Спортинг»нинг янги ўйинчисини таништириш маросимига ҳам ташриф буюрди. Лиссабон клуби унга ҳам ўз вақтида катта ҳаётга йўлланма берган эди-да.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
