Қатар пойтахти Доҳа шаҳрида бокс бўйича катталар ўртасида ўтказилган жаҳон чемпионати якунланди.
Мазкур жаҳон чемпионатида дунёнинг 69 давлатидан келган 243 нафар спортчи 10 вазн тоифасида совринли ўринлар ҳамда 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг 23 та йўлланмаси учун кураш олиб бордилар.
Эътиборлиси, жаҳоннинг етакчи чарм қўлқоп усталари иштирокида ўтказилган мусобақада Ўзбекистон терма жамоаси аъзолари 6 та медаль ҳамда 4 та Олимпия йўлланмасини қўлга киритиб, Ўзбекистон спортчилари ҳеч кимдан кам эмасликлари ва кам бўлмасликларини амалда яна бир бора исботладилар. Шу ўринда таъкидлаш лозимки, 1993 йилдан буён жаҳон чемпионатларида мустақил жамоа сифатида иштирок этиб келаётган бокс бўйича Ўзбекистон терма жамоаси бир чемпионатда 6 та медалга сазовор бўлмаган.
Ҳамюртларимиз медаллар сонига кўра Куба терма жамоасидан сўнг иккинчи, умумжамоа ҳисобида эса 7-ўринни банд этдилар. Умумжамоа ҳисобида 4 та олтин, 2 та кумуш ва 1 та бронза медалига сазовор бўлган Куба вакиллари биринчи, 2 та олтин ҳамда биттадан кумуш ва бронза медалини қўлга киритган россияликлар иккинчи, биттадан олтин ва кумуш ҳамда 2 та бронза медалига сазовор бўлган Озарбайжон терма жамоаси учинчи ўринни эгаллади. Биттадан олтин, кумуш ва бронза медалига эга бўлган ирландияликлар тўртинчи, биттадан олтин медални қўлга киритган Франция ҳамда Марокаш терма жамоалари бешинчи ва олтинчи ўринларни банд этдилар. Кучли ўнликдан, шунингдек, Қозоғистон (8-ўрин), Хитой (9-ўрин) ва Украина (10-ўрин) терма жамоалари жой олдилар.
Умуман жаҳон чемпионатида иштирок этган 69 давлатдан 18 тасига совринли ўринларни қўлга киритиш насиб этди. Шундан олти давлат вакилларигина олтин медалга сазовор бўлдилар.
Ушбу жаҳон чемпионатида янгидан-янги номлар ҳам кашф этилди. Қувонарлиси, жаҳон чемпионатида илк бор совринли ўринларни қўлга киритган спортчиларнинг беш нафарини Ўзбекистон терма жамоаси аъзолари ташкил қилди. Бу ҳам ўз навбатида Ўзбекистон бокс мактабида янгидан-янги иқтидорлар камолга етаётганлигидан дарак беради. Умид қиламизки, жаҳон чемпионатида бошланган зафарли одимлар Олимпиада ўйинларида ҳам давом этади.
Шундай қилиб, финалга қадар кечган жангларни мағлубиятсиз ўтказган Муроджон Аҳмадалиев (-56 кг), Фазлиддин Ғоипназаров (-64 кг) ва Бектемир Мелиқўзиев (-75 кг) жаҳон чемпионатининг кумуш медаллари билан тақдирланган бўлишса, Элнур Абдураимов (-60 кг), Элшод Расулов (-81 кг) ва Баҳодир Жалолов (+91 кг) бронза медали соҳиби бўлдилар.
2016 йилги Олимпиада ўйинларининг йўлланмаларига Муроджон Аҳмадалиев (-56 кг), Элнур Абдураимов (-60 кг), Фазлиддин Ғоипназаров (-64 кг) ва Бектемир Мелиқўзиев (-75 кг) сазовор бўлдилар.
Ҳамюртларимиз жаҳон чемпионати давомида Куба, Россия, Италия, Қозоғистон, Таиланд, Ҳиндистон, Туркия, Грузия, Франция, Ирландия, Жазоир, Янги Зеландия, Мўғилистон, Венесуэла ва Иордания каби 15 давлат вакилларини енгишга муваффақ бўлдилар.
Хусусан, Таиланднинг уч нафар, Қозоғистон, Италия, Жазоир ва Янги Зеландия терма жамоаларининг икки нафардан, Куба, Россия, Ирландия, Мўғилистон, Туркия, Венесуэла, Ҳиндистон, Франция, Иордания ва Грузия терма жамоаларининг бир нафардан спортчисини мағлуб этишди.
Жаҳон чемпионати баҳсларида муваффақиятли иштирок этган Ўзбекистон терма жамоаси аъзолари 18 октябрь куни Тошкент вақти билан соат 01:30да Ватанимизга қайтиб келадилар.
Маълумот учун. Бокс бўйича 2017 йилги жаҳон чемпионати Германиянинг Гамбург шаҳрида ўтказилади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Сурхон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
