Мадриднинг «Реал» жамоаси юлдуз футболчиларни сотиб олиш билан бирга, ўзи ҳам кўплаб кучли ўйинчиларини клубдан кетишига йўл қўйиб берган. Қуйида биз «Қироллик клуби»ни тарк этиб, турли жамоалар сафида Европа чемпионлар лигасида ғолиб чиққан собиқ «Реал»чилар ҳақида тўхталиб ўтамиз.
Хуан Мата
Ҳозирда «Манчестер Юнайтед» жамоаси шарафини ҳимоя қилаётган ушбу футболчи 2003-2007 йиллар давомида «Реал»нинг ёшлар ва асосий жамоаларида ҳаракат қилди. 2007-йилда «Қироллик клуби»ни тарк этиб, «Валенсия» сафига қўшилди. 2011-йил «Челси» томонидан сотиб олинган ярим ҳимоячи Лондон жамоаси билан 2012-йилда Европа чемпионлар лигасида ғалаба қозонди.
Валтерь Самуель
2004 йил «Рома»дан 25 миллион евро эвазига сотиб олинган аргентиналик футболчи «Реал»да ўзини кўрсата олмади ва бир йилдан сўнг «Интер» жамоасига сотиб юборилди. Милан жамоасида ишончли ўйин кўрсатиб, 2014 йилгача ҳаракат қилди. Шу давр мобайнида у «Интер»да кўплаб ютуқларга эришди. Хусусан 2009-2010 йилги мавсумда «нерадзурри»лар таркибида Европа чемпионлар лигаси бош совринини қўлга киритди.
Эстебан Камбьяссо
«Реал»нинг собиқ яна бир аргентиналик футболчиси.1996 йил 16 ёшида Аргентинадан “Қироллик клуби»га жалб қилинган ёш футболчи икки мавсум Мадридда тўп суриб, яна ўз юртига йўл олди. У ерда тўрт йил ҳаракат қилди ва 2002 йил «Реал»га яна қайтиб келди. 2004 йил шартномаси тугаган ярим ҳимоячига Мадрид жамоаси янги битим таклиф қилмади. Шундан сўнг Камбьяссо эркин агент сифатида Миланнинг «Интер» жамоасига қўшилди. У «Интер»да ўз ўйинини топиб, ўн мавсум Италияда ёрқин ўйин кўрсатди. Жамоаси билан эса умумий ҳисобда 15 турнирда ғолиб чиқди. Шу жумладан, 2010 йил Жозе Моуриньо қўл остида Европа чемпионлар лигасида зафар қучди.
Уэсли Снейдер
«Аякс»да порлаган Голландиялик ушбу футболчи учун Европанинг кучли жамоалари кураш бошлади ва бу борада Мадриднинг «Реал» клуби устун келиб, Уэсли Снейдерни 2007 йил 27 миллион евро эвазига қўлга киритди. Икки мавсум Мадридда тўп сурган ярим ҳимоячи 2009 йил жамоа Криштиану Роналду ва Какани харид қилгач, «Интер» жамоасига сотиб юборилди. Милан клубида Снейдер бир неча турнирларда зафар қучди. Уларнинг орасида 2009-2010 йилги Чемпионлар лигасининг ғолиблиги ҳам бор.
Арьен Роббен
2007 йил «Реал»нинг бош мураббийи Бернд Шустер истагига кўра «Челси»дан 36.55 миллион евро эвазига сотиб олинган Арьен Роббен Мадридда икки мавсум ҳаракат қилди. Жуда кўп ҳолларда жароҳат олиб жамоасига ёрдам бера олмаган ярим ҳимоячини 2009 йил “қироллик клуби» «Бавария»га сотиб юборди. Мюнхен клубининг ютуқларида асосий роллардан бирини ўйнаган Роббен 2013 йил Европа чемпионлар лигаси финал учрашувида Дортмунднинг «Боруссия» жамоаси дарвозасини ишғол этиб, жамоасига бош совринни туҳфа этди.
Кларенс Зеедорф
1996 йил Италиянинг «Сампдория» клубидан «Реал»га трансфер қилинган ушбу ярим ҳимоячи жамоанинг 1997-1998 йилги Европа чемпионлар лигасидаги ғалабасида муҳим рол ўйнади. Бунгача «Аякс» билан ушбу турнирда ғолиб чиққан футболчи Гус Хиддинк Мадрид клубга келгач асосий таркибдаги ўрнини йўқотди ва 2000 йил Миланнинг «Интер» жамоасига сотиб юборилди. «Нерадзурри»лар таркибида икки мавсум тўп суриб, бу сафар энди «Милан»га келиб қўшилди. Ушбу жамоа сафида 2003, 2007 йилларда Европа чемпионлар лигасида ғалаба қозонган Зеедорф учта турли жамоада «кўҳна қитьа» клублари ўртасидаги энг нуфузли турнирда бош совринга эга бўлган дастлабки футболчига айланди.
Самуэль Это’О
Айнан «Реал» томонидан Африкадан олиб келинган футболчидан жамоа умуман фойдаланмади. «Леганес», «Эспаньол» клубларида ижарада ўйнаган ҳужумчи, «Мальолка»да ҳам дастлаб ижара асосида тўп суриб, 2000 йилда «Реал» томонидан сотиб олинди. 2004 йилгача, «Мальолка»да тўп сурган Это’О, ушбу йилда «Барселона» билан шартнома тузди. «Қироллик клуби»нинг азалий рақиби таркибида унинг фаолияти гуллаб яшнади. Беш мавсум Каталон жамоасида ажойиб ўйинлар кўрсатган ҳужумчи 2005-2006, 2008-2009 йилги мавсумларда чемпионлар лигасида зафар қучди. 2009 йил «Барселона»ни тарк этиб, «Интер»га ўтган футболчи ушбу клубда ҳам 2009-2010 йилги мавсумда Европа чемпионлар лигаси бош совринини қўлга киритди. «Анжи» сафида Одил Аҳмедов билан бирга тўп сурган Самуэль Это’О чемпионлар чигаси турнирининг уч карра ғолиби ҳисобланади.
Шавкат Ниёзов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
