Агар олий лигага қисқа таъриф билдириш зарурати туғилса, «Жамоалари инсофли, ҳеч қачон кераксиз очко учун жон куйдириб, бошқалар «ҳақи»ни тортиб олмайдиганлар чемпионати», қабилида фикр юритардик. Ҳа, олий лигага қўрқмасдан шундай таъриф бериш мумкин: ўтган ҳафта ўтказилган 29-тур ўйинлари бунга яққол мисол. Шу даражада ёрқин мисолки, бу турда ҳеч бир муҳтож жамоа очкосиз қолмади. Инсоф қилиш шунчаликдир-да, барака топгур ўртамиёналар ҳеч нарсани ҳал этмайдиган қандайдир 7 ёки 8-ўрин учун асло бош қотирмадилар ва очко учун ошиқиб ҳаракат қилмадилар. Умуман, 29-турга «Қўқон-1912»нинг эндиликда собиқ бош мураббийи - Рустам Абдуллаевнинг биргина гапи билан изоҳ бериш ўринли: «Сўғдиёна»га очко сув ва ҳаводек зарур эди...». Мураббийнинг бу гапини тушунса бўлади, балки шу сабабли, «Қўқон-1912» мағлубиятга учрагандир. Аммо ўз навбатида, битта савол ҳам туғиладики, унинг жавобини топиш анча қийин - қачонгача очкога сув ва ҳаводек эҳтиёж сезмайдиган жамоалар ғалаба қозонмай юраверадилар? Нима, футболда фақат очкога эҳтиёж сезган жамоа ғолиб чиқиши керакми?
ЧЕМПИОНЛИК ОЧКОЛАРИ
Ўтган тур чемпионлик даъвоси бор икки клуб - «Пахтакор» ва «Локомотив» ҳам ғалаба қозонди. «Темирйўлчилар» ўз майдонларида «Машъал»ни ортиқча мулозаматсиз, лекин камтарона 1:0 ҳисобида енгдилар. «Пахтакор» эса сафарда анча жиддий рақиб - «Насаф»дан худди шундай ҳисобда устун келди. Хуллас, чемпионлик масаласи энди сўнгги турга қолди. Аммо финиш марраси ҳам бизга бирор кутилмаган натижани тақдим этмайдиган кўринади. Сабаби, чемпионликка асосий даъвогар - «Пахтакор» 30-турда «Андижон»ни қабул қилади ва Нўъмон Ҳасанов (Виктор Жалилов) шогирдларининг бу ўйинда катта муаммога дуч келишлари эҳтимоли жуда паст. «Локомотив» аксинча, сафарда «Навбаҳор»га қарши ўйнайди. Ушбу жамоалар ўртасида кечган биринчи давра баҳсида «темирйўлчилар» 5:1 ҳисобида устун келган эдилар. Бу натижани бежиз эсламадик, ўз майдонида рақибини шундай ҳисобда енгиш уддасидан чиққан «Локомотив» сафарда ҳам «Навбаҳор»дан 3 очко тортиб олса керак. Аммо қўлга киритилажак очколар «темирйўлчилар»га қандайдир наф берармикин?
БУЛАР АУТСАЙДЕРМИ ЁКИ ФАВОРИТ?
Олий лиганинг сўнгги турларига келиб, бошқа чемпионатлар учун мутлақо ғалати ҳисобланган ҳолат юзага келмоқда. Гап шундаки, Ўзбекистон чемпионати аутсайдерлари охирги вақтларда бир юмалаб, «фаворит»га айланиб олдилар. Яқиндагина ҳаммага ютқазиб юрган «Бухоро» ва «Сўғдиёна» клубларига энди тенг келиб бўлмай қолди. Бухороликлар 2 ҳафта муқаддам «Металлург»ни сафарда 2:1 ҳисобида мағлуб этгандилар. Ўтган ҳафта эса, «Нефтчи»ни мағлубият кўчасига етаклашди - 3:1.
Ўз навбатида, «Сўғдиёна» қайд этаётган натижалар ҳам ҳайратланарли. Жиззахликлар 28-турда «Олмалиқ»дек клубни 1:0 ҳисобида енгдилар. Ўтган ҳафта «Қўқон-1912» сафарда 3:1 ҳисобида таслим этилди. Оқибатда бутун мавсум давомида қўқонликларни ишончли тарзда бошқариб келган Рустам Абдуллаев истеъфога чиқарилди.
Қизиқ томони, «Бухоро» ва «Сўғдиёна» клубларида шунча куч ва салоҳият бор экан, улар нима учун аввалги ўйинларда қаторасига мағлубиятга учраб юрдилар? ғалати, жуда ғалати...
ТУР ИҚТИБОСЛАРИ
- Ҳозирги ҳолатда «Сўғдиёна»га ғалаба сув ва ҳаводек зарур эди... Рустам АБДУЛЛАЕВ («Қўқон-1912» собиқ бош мураббийи).
- «Қўқон-1912» ҳам худди «Сўғдиёна» каби тушуниб бўлмас жамоа. Даврон ФАЙЗИЕВ («Сўғдиёна» бош мураббийи).
- Ҳозир кўпчилик «Металлург» билан ўйинни гапиряпти. Лекин бизнинг футболчилар бу борада тозалар. Нўъмон ҲАСАНОВ («Пахтакор» бош мураббийи).
- Ким Шоҳруҳ Гадоев яхши ўйнамоқда, деса, демак, у футболни яхши тушунмас экан. Рўзиқул БЕРДИЕВ («Насаф» бош мураббийи).
- «Пахтакор»ни чемпионлик билан табриклайман. У сўнгги турда «Андижон»ни мағлуб этса керак. Андрей МИКЛЯЕВ («Локомотив» бош мураббийи в.б.).
- «Пахтакор» билан ўйинни эслайлик, дарвозабон йўқ жойдан «қизил» олганди. Игорь ШКВИРИН («Олмалиқ» бош мураббийи).
Камолиддин Тожиев (21-рақам) мавсумдаги иккинчи ва ўйиндаги ягона голи билан "шерлар"га чемпионликни деярли нақд қилди
ЎРТАМИЁНАЛАР БАҲСИ - 1:1
Олий лига доирасида кечган қолган баҳсларда ўртамиёна жамоалар ўзаро тўқнаш келдилар. Яъни деярли ҳеч нарсани ҳал қилмайдиган ўйинларда куч синашиб кўрдилар. Шундай экан, бундай учрашувларнинг нақ 3таси 1:1 ҳисобида якунланганига кўп ҳайрон қолиш керак эмасдир, балки. Ҳозир бунинг сабабини тушунтириб ўтамиз.
«Олмалиқ» ушбу турда «Бунёдкор»ни қабул қилди ва анъанавий 1:1 ҳисобида тўхтади. Ўйинда бирор жамоа ғолиб бўлганида, турнир жадвалида кўтарилиши ёхуд ютқазган тақдирида, пастга тушиб кетиши мутлақо мумкин эмасди. Сабаби, «қалдирғочлар» 4-ўринга мустаҳкам жойлашганлар, олмалиқликларнинг эса, 6-поғонани ҳеч кимга бермаслиги ойдинлашиб улгурган. Шундай бўлгач, бу натижани ким мантиқан нотўғри, дея олади?
«Қизилқум» - «Металлург» тўқнашуви 1:1 ҳисобида якунланганига келсак, бу жамоалар мос равишда 9 ва 10-ўринда эдилар ва 29-турдан сўнг ҳам шу кўриниш бузилмай қолди. Бу ўринда фақат «Андижон» ва «Динамо» ўртасида кечган баҳс самарқандликларни қийин аҳволга солиб қўйганини айтиш лозим. «Динамо» 1:1 ҳисобидаги дурангдан сўнг 15-ўринга тушди ва энди олий лигада қолиш учун анча тер тўкишига тўғри келади. Аммо самарқандликлар 86-дақиқада гол қўйиб юборгани ҳолда, 88-дақиқада ҳисобни тенглаштирганларини инобатга олсак, клуб бу натижадан рози бўлса керак. «Андижон»нинг эса, жуда қулай имкониятлардан ҳам гол уролмагани ғалати. Аммо очко керак бўлмагач, уриб ҳам нима қилди, шундай эмасми?
Энди ҳаммаси охирги турда «Сўғдиёна» ва «Бухоро» ўртасида кечадиган ўзаро учрашувга боғлиқ. Агар бу ўйинда «Сўғдиёна» очко йўқотса ва «Динамо» ўз майдонида «Олмалиқ»қа қарши кечадиган баҳсда ғолиб чиқса, самарқандликлар элитада «жон» сақлаб қолишлари мумкин. Акс ҳолда, биринчи лигада 2-ўринни қўлга киритган клуб билан «плей-офф» баҳсида куч синашишларига тўғри келади.
Ўртамиёналар ўртасидаги кураш ҳақидаги мулоҳазани якунлаш олдидан сўнгги натижа билан таништириб ўтсак - «Шўртан» ўз уйида «Навбаҳор»ни мағлуб этиб, 11-ўринга кўтарилиб олди. Аммо наманганликлар мағлубиятдан кўп ташвиш тортмасалар ҳам бўлади, боиси, улар 7-ўринни йўқотганлари йўқ. Фахрли 7-ўринни!
ТУР ҚАҲРАМОНИ -
«ҚЎҚОН-1912» РАҲБАРИЯТИ
Ҳали ҳеч қачон тур қаҳрамонини танлашда бундай ноодатий йўл тутмаган эдик. Қаҳрамон сифатида гол урган футболчи, ғалаба қозонган клуб ёки мураббий эмас, балки бирор жамоа раҳбарияти тан олинса, анча ғалати кўриниши турган гап. Агар бу жамоа тур ўйинини ўз майдонида шармандали мағлубият билан якунлаган бўлса, ғалатилик даражаси янада кенгроқ кўриниш олади. Аммо ҳамма гап шундаки, биз қаҳрамон сифатида тан олган «Қўқон-1912» раҳбарияти бундай шармандали мағлубиятни ҳазм қилолмади ва дарҳол кескин чора кўрди - бош мураббий Рустам Абдуллаев истеъфога чиқарилди. Одатда мураббийлар истеъфоси ҳар доим ҳам тўғри қабул қилинавермайди ва норозиликлар учраб туради. Аммо бу сафар эмас. Агар «Қўқон-1912» ва «Сўғдиёна» ўртасида кечган ўйиндан лоақал лавҳалар томоша қилсангиз, бу истеъфо сабабини осонгина тушуниб оласиз. Раҳбарият яққол голли вазиятларни кўкка совурган, ўз дарвозасидан осонгина тўп ўтказиб юборган ва ягона жавоб голи ҳам мутлақо тасодиф бўлган жамоа бош мураббийини истеъфога чиқармай, яна нима қилсин...?
Абдуллоҳ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
