Осиё Чемпионлар Лигасининг 2016 йилги мавсумига 10 декабрь куни Малайзия пойтахти - Куала-Лумпур шаҳрида қуръа ташланади. Демак, жамоалар яна 2 кундан сўнг гуруҳ босқичидаги рақибларини билиб олишади. Саралаш босқичи тақвими эса ҳозирданоқ маълум.
Ўтган мавсум тасдиқланган квотага кўра, келаси йили ҳам қитъамизнинг клублар ўртасидаги нуфузли мусобақасида Ўзбекистондан 3та жамоа тўғридан-тўғри гуруҳ босқичида, битта клуб саралаш раундида қатнашади. «Пахтакор» (чемпион), «Насаф» (кубок соҳиби) ва «Локомотив» (2-ўрин соҳиби)нинг гуруҳдаги рақиблари билан, юқорида айтганимиздек, 10 декабрь куни танишиб оламиз. «Бунёдкор»нинг ягона ўйиндан иборат ҳал қилувчи «плей-офф»даги рақиби эса аниқ - «Ал-Шабаб» (БАА) клуби.
«ҒАРБ»ДА БИР БОСҚИЧЛИ САРАЛАШ
ОФК коэффициентлар жадвалида 6-12-ўринни эгаллаган мамлакатларнинг биттадан жамоаларига ОЧЛ саралаш босқичида иштирок этиш ҳуқуқи берилади. Бироқ «Ғарб»да Ироқ, Уммон, Баҳрайн, Ливан, Сурия вакиллари ОФКнинг лицензиялаштириш жараёнидан ўта олишмагани, Қувайтнинг эса ФИФА томонидан дисквалификация қилингани сабабли, ушбу мамлакатлар клублари ОЧЛ саралашида қатнашолмайдилар. Хуллас, «Ғарб» минтақаси саралашида иштирок этадиган 8та клуб қолди. Гуруҳ босқичига 4та йўлланма берилишини инобатга олсак, бу жамоалар 4та жуфтлик ҳосил қилишади ва ягона ўйинда ўзаро баҳслашадилар.
«Ғарб» минтақаси саралаш босқичи жуфтликлари
1. «Ал-Иттиҳод» (Саудия Арабистони) - «Ал-Виҳдат» (Иордания)
2. «Нафт Теҳрон» (Эрон) - «Ал-Жаиш» (Қатар)
3. «Бунёдкор» (Ўзбекистон) - «Ал-Шабаб» (БАА)
4. «Ал-Жазира» (БАА) - «Ал-Садд» (Қатар)
Мазкур ўйинларнинг барчаси 9 февраль кунига белгиланган. Аҳамият бергандирсиз, ОФК рейтингида юқори ўринларни эгаллаган мамлакатлар клублари рақибларини ўз майдонларида қабул қиладилар. Саралаш ўйинларига тегишли бир қатор аҳамиятга молик ҳолатларни таъкидлаб ўтишимиз мумкин:
- Ўзбекистонлик ярим ҳимоячи Азиз Ҳайдаров «Ал-Шабаб» сафида ўзининг собиқ жамоаси - «Бунёдкор»га қарши майдонга тушади. Бу Ҳайдаров учун ўзбек клубларига қарши кечадиган иккинчи ўйин бўлади. У бунгача ОЧЛ доирасидаги баҳсда «Пахтакор»га қарши майдонга тушганди.
- Ўзбекистонлик яна бир ярим ҳимоячи Сардор Рашидов «Ал-Жаиш» билан гуруҳ босқичига чиқиш учун Эроннинг «Нафт» жамоаси тўсиғидан ўтиши лозим.
- Испаниялик машҳур Хави Эрнандеснинг ОЧЛ гуруҳ босқичида кўришимиз учун Қатарнинг «Ал-Садд» клуби сафарда «Ал-Жазира» (БАА)ни мағлуб этиши шарт.
«ШАРҚ»ДАГИ САРАЛАШ
«Шарқ» минтақасида фақат Индонезия клублари ОЧЛда иштирок эта олишмайди. Боиси, ФИФА томонидан мамлакат футбол федерациясига нисбатан тақиқ қўйилган. Қолган барча давлат жамоалари саралашда қатнашадилар. Шу боис, бу минтақада саралаш 3та босқичда ташкил этилади.
1-босқич (27 январь)
«Мохун Боган» (Ҳиндистон) - «Тампинес Роверс» (Сингапур)
2-босқич (2 февраль)
1. «Ханой» (Вьетнам) - «Китчи» (Гонконг)
2. Таиланд чемпионати бронза медали соҳиби - «Янгон Юнайтед» (Мьянма)
3. «Шандонг Луненг» (Хитой) - 1-босқич ғолиби
4. «Муангтонг Юнайтед» (Таиланд) - «Жоҳор Дорул Таъзим» (Малайзия)
3-босқич (9 февраль)
«Поханг Стилерс» (Ж.Корея) - 1-жуфтлик ғолиби
«Урава Редс» (Япония) - 2-жуфтлик ғолиби
«Аделаида Юнайтед» (Австралия) - 3-жуфтлик ғолиби
«Шанхай» (Хитой) - 4-жуфтлик ғолиби
ГУРУҲ БОСҚИЧИ ИШТИРОКЧИЛАРИ
Ҳар иккала минтақада 12тадан жамоа тўғридан-тўғри гуруҳ босқичида иштирок этади. Демак, айни пайт асосий босқичнинг 24та қатнашчиси тайин.
«Ғарб» минтақаси
Саудия Арабистони: «Ал-Наср», «Ал-Ҳилол», «Ал-Аҳли»
Эрон: «Сепаҳон», «Зоб-Оҳан», «Тракторсози»
Ўзбекистон: «Пахтакор», «Насаф», «Локомотив»
БАА: «Ал-Айн», «Ал-Наср»
Қатар: «Лаҳвия»
«Шарқ» минтақаси
Жанубий Корея: «Чонбук Моторс», «Сеул», «Сувон Самсунг»
Япония: «Санфречче Хиросима», «Императордаги кубоги» соҳиби, «J»-лигада 2 ёки 3-ўрин соҳиби
Австралия: «Мельбурн Виктори», «Сидней»
Хитой: «Гуанжоу Эвергранд», «Жиангсу Сейнти»
Таиланд: «Бурирам Юнайтед»
Вьетнам: «Бин Дуонг»
Гуруҳ босқичи ўйинлари 23-24 февраль кунлари бошланади.
Манба: "ИнтерФУТБОЛ" газетаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
