Яқинда футболимиз фахрийси, таниқли мутахассис Валерий Лёткин ўзининг 70 ёшлик юбилейини нишонлади. «Меҳ-нат-каш!» Ўзбекистон футболи Фахрийлар кенгаши раиси Наримон Жалолов юбилей оқшоми Валерий Лёткин фаолиятини шу биргина ибора билан чиройли тарзда таърифлади.
- Ҳозирги кунда ота-оналар ўз фарзандларини футбол мактабларига етаклаб боришади, - дея эслайди Валерий Николаевич ёшлик даврини. — Мен эса кечгача тўп ортидан югурганим учун онамдан дакки эшитардим. Ҳалигача унинг гапларини эслайман: «Бир кишининг 3 нафар ўғли бўлган экан. Иккиси ақлли, учинчиси футболчи». Шунга қарамай, стадион ўзига тортаверарди. Болалигимда шунчаки, катталарга тўпни ташлаб турардим. Бундан фахрланганман ҳам.
Онаси 12 ёшли ўғлига спорт формалари - гетра, кеда, ва 3-рақамли футболка беришганидан сўнг уларни ўзи тозалаб, авайлаб-асрашини кўргач, барчасига розилик беради. Бироқ ёмон баҳо олганида, машғулотларга боришини тақиқлаб қўярди. Қисқаси, ёш Лёткин яхши ўқишга мажбур эди. У вақтини тўғри тақсимларди ва ҳаммасига улгурарди. Шу-шу интизом масаласи унинг учун ҳаётий қоидага айланди.
Бўйдор йигитни марказий ҳимояда ўйната бошлашади. У ўзига яраша «тозаловчи» эди ва шериклари хатоларини тўғрилаб, бутун ҳимояни бошқарарди. Ўзбекистон ўсмирлар термаси ва «Пахтакор»даги жамоадошларининг айтишларича, Лёткин тўқнашувларда нафақат рақиб, балки ўзини ҳам аямасди. Оддий айтганда, «Ўйини яхши ўқирди». Доимо қайноқ жойда ҳозир бўларди. Зеро, сардорлик мақоми ундан шундай ҳаракатланишини талаб этарди. Жасур йигит ҳужумчилардан етарлича зарбалар ҳам қабул қиларди. Хусусан, бир сафар «Пахтакор» сафида оғир жароҳатланади. Бу Москванинг «Спартак» жамоасига қарши ўйинда юз берганди. У қийинчиликларга қарамай, даволанади ва яна майдонга қайтади. Тўғри, ўша мавсумнинг қолган қисмини «Ташавтомаш» жамоасида ўтказади. Лекин олдингидек ўйнолмаётганини ҳис қилади. Натижада бутсаларини михга илади. Хуллас, айни кучга тўлган вақти - 25 ёшида мураббийлик фаолиятини бошлайди. Кичик жамоаларда ишлаб, тажриба тўплаганидан сўнг футболчилар билан яхши тил топишадиган Лёткинни катта клубларга таклиф қиладилар. Натижада у Жиззах, Халқобод, Муборак, Андижон, Самарқанд, Бекобод жамоаларида ишлайди. Мураббийликдаги фаолиятининг энг катта қисмини эса «Трактор» жамоасида ўтказади. Завод жамоаси Лёткин қўл остида «чақилмас ёнғоқ» мақомини олганди. Умуман, бугунги юбиляр «Трактор»ни 15 йил давомида бошқарган.
Унинг шогирдлари қаторидан Равшан Ҳайдаров, Юрий Шейкин ва Алексей Евстафеевни алоҳида ажратиб кўрсатиш мумкин.
Асосийси, Лёткин гарчи 70 ёшни қаршилаган бўлсада, ҳамон ишлашда давом этмоқда. У айни пайт ПФЛда Мусобақаларни ўтказиш бўлимини бошқармоқда.
- Сиз чемпионат тақвимидан хурсанд бўлган бирор-бир клуб раҳбари ёки мураббийни учратганмисиз? - дея савол беради Валерий Николаевич. - Ҳаммада ўзига яраша эътирози бўлади. Ваҳоланки, нафақат ОЧЛда иштирок этувчи клублар, балки турли ёш тоифасидаги 14та терма жамоамиз ўйинлари саналарини ҳам ҳисобга олиш лозим. Мухлислар, стадион ходимлари ва телеоператорларда ҳам эътироз туғилиши табиий ҳол. Қисқаси, ҳамма кўрпани ўз томонига тортади. Агар бирор ўйин санаси ўзгарса, бунда ким айбдор? Мусобақаларни ўтказиш бўлими, яъни Лёткин. Уни эътиборга олмабди, буни назардан қочирибди...
Қисқаси, фахрий мутахассис доимо ҳаракатда. Тан олиш жоиз, унинг обрўси ва атрофида жамланган ёш кадрларга барча нозик жиҳатларни қунт билан ўргатиши туфайли олий, ёшлар ва биринчи лигаларимиз регламенти Осиё футбол конфедерацияси томонидан қитъада энг мувофиқлаштирилганларидан бири сифатида тан олинган.
Тимур Низаев, «Правда Востока» шарҳловчиси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
