6 декабрь куни ФИФАнинг аёллар футболи бўйича эксперти, УЕФАнинг PRO лицензиясини олган мураббий Моника Штаб хоним Ўзбекистонга келди. Мазкур ташрифдан кўзланган мақсад - юртимизда аёллар футболини ривожлантиришга ёрдам беришдан иборат.
Октябрь ойида Малайзия пойтахтида ОФКнинг аёллар футболидаги элит мураббийлари учун семинар ташкил этилганди. Ўшанда ҳамюртимиз Баҳром Норсафаров матбуот анжуманида Осиёда аёллар футболига айрим янгиликларни киритиш таклифини илгари сурганди. Ўша матбуот анжуманида УЕФАнинг техник инструктори Беатрис фон Зибенталь хоним ҳам иштирок этганди. Шундан сўнг Осиёга УЕФА ва ФИФАнинг вакилини жўнатишга қарор қилишганди.
Икки ташкилотнинг ҳам вакиласи ҳисобланган Моника Штаб ўз саёҳатини юртимиздан бошлашни маъқул кўрди. У Ўзбекистонга олдин ҳам ташриф буюрган, 2010 йили Тошкент ва Қарши шаҳарларида бўлганди. Ўшанда аёллар ўртасидаги пляж футболи бўйича мамлакат чемпионати баҳсларини кузатишдан ташқари аёллар жамоалари вакиллари учун блиц-семинар ҳам ўтказганди.
Германия элчихонасида бўлиб ўтган матбуот анжуманида дастлаб Германиянинг Ўзбекистондаги элчиси Найтхарт Хёфер-Виссинг ўз фикрларини билдириб ўтди. Мамлакатимиздан эса вакил сифатида аёллар футболи уюшмаси раҳбари Алишер Файзиев ва инструктор Тимур Асфандияров иштирок этишди.
Матбуот анжуманининг расмий қисми икки мамлакатнинг аёллар футболида ҳамкорликни давом эттириш масаласига бағишланди. Хёфер-Виссинг юртимизда бўлиб ўтадиган турнирларга шахсан ташриф буюришга ваъда берди. Айтиш жоиз, жорий йилда ҳам у бу ишни икки марта амалга оширганди.
Анжумандан сўнг мухбиримиз Штаб хонимга икки савол билан мурожаат қилди.
Саволлар:
1. Ўзбекистон аёллар футболида Германияда муваффақият келтираётган моделларнинг қай биридан фойдаланиляпти? Ёки фақат маҳаллий шароитдан келиб чиқиб ишланяптими?
2. Терма жамоаларни қайси ёшдан ташкил қилиш лозим?
Жавоблар:
1. Мамлакатингизда аёллар ўртасидаги чемпионат иккита лигада ўтказилади - олий ва биринчи. Олий лигада 12та, биринчи лигада эса 6та жамоа бор. Дивизионларда жамоалар ўрнини алмаштиришда спорт принциплари биринчи ўринда туриши керак. Шунда барча жамоаларда мақсад пайдо бўлади. Кимлардир элитадан тушиб кетмаслик, бошқалар эса кучлилар сафига чиқиш учун курашадилар. Агар бу принциплардан фойдаланилмаса, мақсад бўлмайди.
Олий дивизионнинг икки даврали тизимда ўтказилиши яхши. Лекин биринчи лига учун бошқа тизим жорий қилиш керак. Бу йил сизларда 6 даврали турнир ўтказилди. Масалан, уч даврадан сўнг кучли тўрт жамоа ўртасида «плей-офф» босқичини жорий қилиш. Унда клублар қанчадир ғалаба учун курашадилар, жамоалар пастки ўринларда қолиб кетмасликка ҳаракат қилишади.
Шунингдек, қайсидир жамоа олий дивизионни тарк этиши, аниқроғи, 12та клубдан иккитаси биринчи лигага тушиб кетиши керак.
Бир пайтлари Германияда ҳам шунга ўхшаш ҳолат кузатилган. Бир жамоа қаторасига 11 йил мамлакат чемпиони бўлган. Бу 70-йилларда эди. Бугунги кунда эса у ерда чемпионлик учун бир нечта жамоа кураш олиб боради. Аёллар футболини ривожлантиришнинг иккинчи варианти - ҳар бир профессионал клубга аёллар жамоасини бириктириш. Шунда молиявий муаммоларни бартараф этса бўлади.
Федерация эркаклар клуби аёллар жамоасига эга бўлмаса, чемпионатда иштирок этмаслигини таъминлаши лозим. Аёллар жамоасини таъминлаш қимматга тушмайди. Клуб бюджетининг 1 фоизи ажратилса ҳам кифоя. Олий лигангизда 16та жамоа бор. Шундай экан, ҳар бир клуб 1 фоиздан ажратса, катта маблағ жамланади. Шунда аёллар олий лигасига жамоа қўя олмаётганларга ҳам ёрдам бўлади. Агар олий дивизион жамоалари сонини оширмаса ҳам, айрим клублар биринчи лигада ўйнашлари мумкин. Умуман олганда, рақобат кучаяди. Шунда аёллар чемпионатида «Севинч» ва «Металлург» сингари иккита эмас, балки кўпроқ кучли жамоалар пайдо бўлади.
2. Молиялаштириш ҳам муҳим аҳамият касб этади. Масалан, эркаклар термаси бир нечта йиғин ўтказганда, аёллар жамоаси нари борса икки марта йиғилади. Лекин аёллар футболини ривожлантириш учун биринчи ўринда федерация раҳбарлари жон куйдиришлари лозим. Шунда ҳаммаси изига тушади.
Бундан ташқари, 16 ёшли эмас, балки унданда ёш терма жамоаларга эга бўлиш керак. Терма жамоани U-14дан йиғишни бошлаш лозим. Шунда 12-14 ёшли қизлар ўйнашади. Уларни эса 9-10 ёшларидан танлаб олиш керак. Ўғил болаларда бу жараён 7-8 ёшда бошланади.
Агар мақсад бўлса, федерация учун бу унчалик муаммо туғдирмайди.
Аёллар футбол уюшмаси таълим тизими билан меморандум имзоласа анча фойдали бўлади. Бусиз жуда қийин. Мисол учун, Тошкентда 12та туман бор. Ҳар бирида биттадан спорт мактаби очилса, ўз-ўзидан шаҳар чемпионатини ўтказса бўлаверади.
«Севинч» ва «Машъал» клубларида ёш футболчи қизларни тайёрлаш тизими яхши йўлга қўйилган. Бу айнан Германия ва аёллар футболи ривожланган бошқа мамлакатлар танлаган йўлдир. Мазкур режани биргаликда амалга ошириш шарт.
Эсимда, Ўзбекистонга биринчи ташриф буюрганимда U-16 термангиз йўқ эди. Энди эса бу жамоа Осиё чемпионатининг финал босқичида икки марта иштирок этди. Шунингдек, U-19 термаси ҳам узоқ танаффусдан сўнг қитъа чемпионатига чиқди. Бу катта ўзгариш. Ваҳоланки, келганимга эндигина 5 йил бўлди. Сизларда захира катта. Фақат бундан унумли фойдаланиш керак.
Ж.БОБОХОНОВ, тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
