Кевин Гросскройц Германияга қайтди. Эътиборлиси, Туркияга йўл олган футболчи «Галатасарой»нинг бирор ўйинида иштирок этгани йўқ. Футбол тарихини ўрганиб чиқсангиз, шунга ўхшаш «умри қисқа» трансферлар етарлича кўзга ташланади. Табиийки, келишувнинг эрта кунда бекор қилинишига турли ҳолатлар сабаб бўлади. Қандай сабаблар? Агар қизиқсангиз, марҳамат, вақтида барчанинг эътиборига тушган, аммо амалга кириб-кирмай бузилган 10та «чақмоқ» келишувга эътибор қаратинг.
Мавсумолди ўйинларида гол урмадингми? Унда жавоб!
Клайв Аллен - Англияда трансфери учун 1 миллион фунтдан кўпроқ сарфланган илк ёш футболчи. Бироқ «Рейнжерс» сафидаги ўйинлари билан барчани ҳайратга солган йигитчага янги клубида ўзини кўрсатиши учун имконият беришмайди. Батафсилроқ айтсак, «Арсенал» уни 1980 йили 1,25 млн. фунт эвазига харид қилади. Ўшанда 19 ёшли Аллен «Рейнжерс» учун 49та ўйинда 32та гол уришга улгурганди. Лекин ёш ҳужумчи «канонирлар» таркибида мавсумолди ўйинларида рақиблар дарвозасини лоақал бир марта ишғол этолмайди. Натижада «Арсенал»нинг ўша пайтдаги бош мураббийи Терри Нилл бирданига ўз фикрини ўзгартиради. Яъни мавсум бошланмасиданоқ Клайвни «Кристал Пэлас» аъзолари - Кенни Сансом ва Пол Баррон билан алмаштиради. Айтишларича, «канонирлар» аслида ҳам Сансомга эга бўлишни хоҳлашган ва аввалига Алленни сотиб олиб, кейин ундан «бартер» келишуви сифатида фойдаланишни пухта режалаштиришган. Бироқ Алленнинг ўзи бу қарашларни инкор этади. «Ўша тарихга оид назарий хулосалар жуда кўп. Лекин улардан ҳеч бирини тасдиқлашга асос йўқ. Дейлик, клуб Кенни Сансомни олишни хоҳлаган экан, уни нега бирданига харид қилмаган?» - деган эди «канонирлар» либосини расмий ўйинларда бирор марта киймаган бечора Клайв.
«Инглизлар, ўзи улар нима ютишган?»
Стефан Гиварш қизиқарли тарзда машҳурликка эришади: у ғалабали ЖЧ-98да Франция термасининг бирорта гол урмаган ҳужумчисидир. Шунга қарамай, «Ньюкасл» Гиваршнинг истиқболига ишонади, аммо бу ишончдан ҳеч қандай самара чиқмайди. Стефан «қарғалар» сафига «Осер» клубидан қўшилади ва ҳаттоки, «Ливерпул»га қарши кечган дебют ўйинидаёқ гол уради. Бироқ ўша учрашувдан сўнг яна 3 мартагина майдонга тушади, холос. Зеро, «Ньюкасл» раҳбарияти уни «Рейнжерс»га сотади - 3,5 млн. фунт эвазига. Кейинчалик Стефанни АПЛ тарихидаги энг ношуд ҳужумчилардан бири сифатида тилга олишади, аммо футболчининг ўзи бунга парво ҳам қилмайди. «Сўров натижаси шундай эканми? Тупурдим. Сўров мени калака остига олиш учунгина уюштирилган. Буларнинг барчаси арзимас чўпчак. Келинг, яхшиси, асосийси ҳақида гаплашайлик. Инглизлар? Ўзи улар ЖЧ-66дан кейин нима ютишган?» дея хумордан чиққан эди француз. Ҳа, Стефан бунда ўзининг жаҳон чемпиони эканлигига шаъма қилган бўлса, ажабмас.
Сирли даҳо - хомхаёл
Португалиялик ҳужумчи Бебе 2010 йили Гимараишнинг «Витория»си томонидан сотиб олинди. Ўшанда йигитча роса қувонган бўлса керак. Лекин бу эртакнинг бошланиши эди, холос. Хуллас, трансфер амалга оширилганидан 2 ҳафта ўтар-ўтмас, «Витория»да ҳали дебют ўйини ўтказишга ҳам улгурмаган футболчига янги харидор топилди - «МЮ». Боз устига, «қизил иблислар» Бебе учун индамай 7,4 млн. фунт (!) тўлашди. Эҳтимол, ҳужумчи бирор назорат баҳсида ўта илиқ таассурот қолдирган ёки қандайдир каромат кўрсатгандир. Факт шуки, «Витория» Бебе трансфери орқали қисқа вақтда 3 млн. евро топди. Сирли даҳо, янги Роналду ёки оддий айтганда, Бебе якунда «Юнайтед» учун атиги 7 марта майдонга тушди. Кейин эса ижара шартномалари кетма-кетлиги бошланди. Бебени аввалига «Бешиктош»га юборишди, кейин «Риу Аве»га. 2014 йилнинг июлида эса ҳужумчи «Пасуш де Феррейра» клубидан қўним топди. Аммо қисқа вақтга. Яъни «бургутлар» сафида атиги бир марта майдонга тушган Бебе яна бошқа қўнимгоҳ излашни давом эттирди. Шундай қилиб, «Кордоба» ва «Райо Вальекано» жамоаларида ҳам кўриниш берди.
«Эрикссон узр сўрамади...»
Сол Кэмпбелл «Ноттс Каунти» клубида Лондон мэри бўлишга даъвогарлар рўйхатида турганидан ҳам озроқ муддат фаолият юритди. Сармоялар оқими ва АПЛга чиқишга тайёрланаётган «Ноттс Каунти» футбол директори лавозимига швециялик Свен-Ёран Эрикссонни таклиф қилди ва унинг ёрдамида фахрий Сол Кэмпбеллни ҳам ўз сафига чорлади. Бироқ тан олинган футболчи гарчи савия бўйича 3та дивизион пастлаган бўлсада, дебют ўйинида ўта ношуд кўринди. Бир неча кун ўтиб эса, жамоада ваъда қилинган потенциал имкониятни сезмаганини айтиб, у билан хайрлашиб қўя қолди. Кейинчалик Эрикссондан хафа эканлигини ҳам айтишдан уялмади: «Свен мени чақиргани учун узр сўрамади, барибир...».
«У қайтадими? Умид қиламанки, йўқ»
Кевин-Принс Боатенгни тушуниш доимо қийин. Чунки у бирор клубда кўпроқ муддат қолган эмасди. Дейлик, «Женоа»га «сафари» шу қадар қисқа бўлдики, ҳаттоки, футболчилар билан танишишга ҳам улгурмади. Тўғрироғи, клуб 2010 йили Боатенгни харид қилиб-қилмай, уни «Милан»га берди - ижара. «Клубда Боатенгни ЖЧ-2010 арафасида кузатув остига олишганди. «Милан»нинг ҳозирги ҳолати эса анча мураккаб. Зеро, кўплаб футболчиларининг шартномалари поёнига етиб қолган. Шунинг учун миланликларга балансни таъминлаш учун кимдир керак. Хуллас, Боатенг ижара келишувига кўра, «Милан»га кетди. Тўғри, «россонерлар» уни бирданига сотиб олишганида яхшигина футболчига эга бўлишарди, биз эса молия нуқтаи назаридан ютардик. Хўш, Кевин «Женоа»га қайтадими? Эҳтимол. Аммо қайсидир маънода умид қиламанки, у қайтиб келмайди», - деганди клуб президенти Энрико Прециози. Айтганча, Боатенг шу кетиши бўйича «Женоа»га қайтгани йўқ.
Ишлашга рухсат йўҚми? Майли, Гарчи...
«Сток Сити» 2013 йили «Нью Ингланд Революшн» аъзоси Хуан Агудело билан шартнома тузишни ихтиёр этди. Америкалик футболчининг клуб билан амалдаги келишуви муддати тугаган ва ҳаммаси режа бўйича кетаётганди. Бироқ ҳужумчи Англияда ишлаш ҳуқуқини берувчи рухсатномани ололмади. Бир қарашда, «Сток» фикридан қайтадигандек эди, аммо якунда барибир, шартномани расмийлаштиришга қарор қилди. Кейин эса Хуанни Голландиянинг «Утрехт» клубига жўнатди, албатта ижара келишувига мувофиқ. Лолалар юртида ярим мавсум тўп сурган Агудело яхши ниятлар билан Англияга қайтди, аммо яна махсус рухсатнома ололмади. Натижада жомадонларини тахлаб, эски клубига кетишига тўғри келди.
«Ковентри» ёки «Реал»?
Гоҳида футболчилар қийин танлов олдида қолишади. Дейлик, Роберт Ярнининг «Реал Бетис», «Реал» ва ...«Ковентри»дан бирини танлашига тўғри келган. 1998 йилнинг ёзида Хорватия термаси таркибида жаҳон чемпионатини «гуллатган» Ярни охир-оқибат, Гордон Страчан бошқарувидаги «Ковентри»га розилик беради. Трансфер нархи 2,6 млн. фунтни ташкил этади. «Бетис»нинг собиқ ўйинчиси эҳтимол, АПЛда янги юлдуз бўлишни ўйлагандир, аммо шу орада «Реал» (Мадрид) ҳам тўсатдан уни сотиб олишга қарор қилади. Хуллас, Ярни олдида мураккаб танлов кўндаланг бўлади. Табиийки, футболчи узоқ ва обдон ўйлаб, «Реал»га ўтишни маъқул кўради. Натижада «Қироллик клуби» 3,4 млн. фунт тўлаб, «Ковентри»ни рози қилади. «Йўқ, бу хотинимнинг қарори эмас, - дея турли гап-сўзларни инкор этганди Ярни. - Оиламиз билан шундай қарорга келдик. Тўғри, хотиним Англияга кўчиб ўтишга қарши эди. Зеро, фарзандларимиз ҳали кичик, қизим Испаниядаги бошланғич мактабда ўқийди. Хуллас, шуларни ўйлаб, Англияга боришдан тийилдик. Мен барчасини рўй-рост айтдим ва ўйлайманки, Страчан қарорим моҳиятини тушунди».
Мутлақо ёлғон
Стид Мальбранк Англияда ўтган 10 йиллик фаолиятидан сўнг Францияга қайтишни лозим топди. Аниқроғи, 2011 йили «Сент-Этьен» сафини тўлдирди. Бироқ орадан яна бир ой ўтгач, клубдан кетди. Хабарларда унинг саратон хасталиги билан курашаётган ўғлига ғамхўрлик қилиш учун футболдан воз кечгани таъкидланди. Бироқ кейинчалик ойдинлашича, Стиднинг ўғли бўлмаган, саратон хусусидаги гаплар ҳам қип-қизил ёлғон экан. «Стид бундай «ҳикоя» қаердан пайдо бўлганини билмайди ва мухлислар барчаси ёлғон эканлигини тушунишларини истайди. Унинг оиласида муаммо йўқ», - дея алоҳида мурожаат этган футболчи «Сент- Этьен»дан нега кетганига изоҳ бермади, барибир. У орада бир йилча футболдан четда юрди ва кейин собиқ клуби - «Лион»га ўтди.
Аҳди йўқ Оби Микель
«Челси»нинг кўплаб мухлислари Жон Оби Микель клубга қандай ўтганини жуда яхши эслашади. Аммо футболчи аввалига «аристократлар» учун «хира томон» - «Манчестер Юнайтед»ни танлаганидан бехабар мухлисларнинг сафи кенгроқ, барибир. «Қизил иблислар» 2006 йили Норвегиянинг «Люн» клубидан Микелни сотиб олишганини маълум қилишади. Ҳаммаси жиддий эди - ҳаттоки, Жон Обининг «МЮ» футболкасида тушган сурати ҳавола этилади. Бироқ ойдинлашича, «Челси» ҳам футболчи билан келишиб қўйган экан. Хуллас, бундан хабар топган «қизил иблислар» мухлислари чинакамига ғазаб отига минишади. Улар нигерияликка қўнғироқ қилиб, очиқ таҳдид билан қўрқитишгача борадилар. Натижада клуб раҳбарияти Микелга аввалига тансоқчи ёллайди, кейин бундан ҳам қониқмай, уни махсус қўриқланадиган меҳмонхонага жойлаштиради. Самараси қандай? Оби Микель кўп ўтмай, умуман ғойиб бўлади. Бутун Британия матбуоти оёққа турган пайт эса, бирданига Лондон клубида кўриниш беради. Хуллас, «Челси» уни ўз футболчиси сифатида таништиради. Тўғри, бу таништирув арзонга тушмайди: «Юнайтед»га 12, «Люн»га эса 4 миллион фунт тўланади.
Сайёҳ Амир
Амир Буазза фаолияти давомида Жанубий-шарқий Европа унинг учун тўғри келмаслигини тушунган бўлса, ажабмас. Зеро, у бу ҳудудга камида 2 марта кўчиб ўтди, аммо кўплаб сайёҳларга нисбатан олганда ҳам, тезроқ ортига қайтди. Жазоирлик йигит аввалига 2009 йили Туркиянинг «Сивасспор» клубида кўриниш берди, бироқ унинг илк ўйини ЕЛ доирасида «Шахтёр»-(Донецк)га қарши кечиб, 0:3 ҳисобидаги мағлубият билан хотима топди. Амир орадан атиги 5 кун ўтгач, клубни тарк этди - унга шаҳар ёқмаган эмиш. Хуллас, Буазза Англияга қайтиб, «Блэкпул» ва «Миллуолл» клубларида ўйнади, шундан сўнг Кипрга, «Омония» жамоасига йўл олди. Бу сафарги саёҳати атиги 2 ойга чўзилди, холос. Айни пайт ушбу кўчманчи футболчи Франциянинг 3-дивизионида тўп сурмоқда.
Манба: «СЭ», А. АҲМЕДОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
