Ўтган бир йил муддат футболимиз учун муваффақиятли бўлди, деб айта олмаймиз. Аксинча фикр билдирсангиз эса, ҳеч қандай эътирозга учрамаслигингиз турган гап. Ўзбекистон миллий терма жамоаси бошқарувида рўй берган ўзгаришлар туфайли кўзга ташланаётган самарадорлик олимпиячилар томонидан Осиё чемпионатида қайд этилган шармандали натижа туфайли йўққа чиқди. Балки бу муваффақиятсизлик у қадар оғриқли бўлмас эди, агарда ҳар икки жамоани ҳам бир мураббий бошқармаганида...
Ўтган йил қай даражада муваффақиятсиз кечганини яна биргина мисолда ҳам тушунтириб ўтиш мумкин - мана баҳор келиб қолди, аммо Ўзбекистон футбол федерациясида йил якунларига бағишлаб ўтказиладиган тантанали тадбирдан дарак йўқ. Кўзга ташланарли бирор ғалаба бўлмагач, бундай тадбирдан нима наф дерсиз. Энг яхши футболчи ва мураббийни тақдирлашми? ЎФФ матбуот хизмати йилнинг энг яхшиларини аниқлаб қўйганига анча бўлди, аммо унинг натижаларини эълон қилиш учун фурсат етганича йўқ. Бемаврид бирор иш бошлашдан эса, маъни кўринмаяпти. Мана шундай вақтда Ўзбекистон футзал терма жамоасининг Осиё чемпионатидаги муваффақиятли иштироки қадри бир неча баробар ошиб кетишини тушуниб етасиз.
Футболдан фарқли ўлароқ, футзал биз учун бу йил анча омадли келди. Умуман, Ўзбекистон футзал ассоциацияси томонидан амалга оширилган ишларга ҳар қанча тасанно айтсанг кам. Ассоциация нафақат терма жамоани қитъа биринчилигига яхши тайёрлай олди, балки Осиё чемпионатидек нуфузли мусобақанинг ўтказилишида ҳам катта ҳажмдаги ишни амалга оширди. Бу эса халқаро миқёсдаги обрўга ҳам ижобий таъсир ўтказиши турган гап.
Ўз навбатида шунча кўрилган тайёргарликка яраша Ўзбекистон терма жамоаси ҳам Осиё чемпионатида ўз олдига қўйилган вазифани шараф билан уддалай олгани кишини хурсанд қилади. Футболчилардан фарқли ўлароқ футзалчиларимиз тарихда илк марта жаҳон чемпионати йўлланмасини қўлга киритдилар. Ким билади дейсиз, балки мана шу ғалаба ўзбек футболининг қаддини бироз кўтариб олишига сабабчи бўлар...
Ўтган ўн кун давомида «Ўзбекистон» спорт мажмуасида бўлган байрамга ҳамма гувоҳ бўлди. Терма жамоамиз Осиё чемпионатида бор куч ва маҳоратини ишга солди ва халқимизга ажойиб байрам туҳфа этди. Бунинг учун йигитларга катта раҳмат. Аслида, нафақат бизда, балки бутун дунёда футзалдан кўра футболга бўлган эътибор юқорироқ юради. Сабаби оддий - футболнинг шиддати ҳам, жозибаси ҳам бошқача. Шунга монанд футбол ва футзалга қаратилаётган эътиборни ҳам ўзаро солиштириб бўлмайди. Бу ҳолат ҳамма нарсада акс этади - янги қурилаётган стадионлардан тортиб, спортчилар маошида ҳам фарқ катта. Оддий мисол - футзал бўйича ўтказилаётган Ўзбекистон чемпионати олий лига сингари «уй-сафар» тизимида ўтказилмайди. Шунчаки, бир жойда йиғилиб, ўзаро ўйнаб чиқадилар, тамом, вассалом. Футболчилар сингари йил давомида сафарда юриш деган тушунча футзалда йўқ.
Аммо шунга қарамай, футболчилар тақдим эта олмаган байрамни футзалчиларимиз аъло даражада уддаладилар. Ўзбекистон чемпионатида иштирок этадиган ҳар бир клуб раҳбарларидан илтимос қилган бўлардик -иложи бўлса футзал бўйича ўтказилган Осиё чемпионатини қўл остидаги футболчи ва мураббийларга мажбуран бўлса-да қайтадан томоша қилдирсинлар. Жуда бўлмаса, Ўзбекистон терма жамоаси ўтказган олтита ўйинни кўриб чиқишсин. Зора ўшанда футзалдаги эҳтирос ва самимият уларга ҳам бироз юқса.
Албатта футзал ва футбол бир-биридан фарқ қилади, буни тушунамиз. Аммо олий лиганинг ҳиссиз ва зерикарли ўйинларини томоша қилавериб тўйган мухлислар нима учун стадионга келмай қўйганларини балки шунда тушуниб етарлар. Биз футзалдаги тезлик ва дриблингни футболга кўчиришларини талаб қилмаймиз, аммо наҳотки футболчилар тақир трибуналар қаршисида ўйнайверишдан тўймаган бўлсалар? Наҳотки футзалдаги ҳиссиётни олий лигада ҳам кўришнинг имкони бўлмаса? Мухлис стадионга келаркан, худди футзал бўйича ўтказилган Осиё чемпионатида бўлганидек ҳиссиётларни туйишни истайди. Олий лигада тўп сурадиган «азаматлар» эса пиёда юриб 90 дақиқани ўтказишга ўрганиб қолганлар. Айтинг, шунда ҳам футболимиз ривожланиб кетсинми?
Аслини олсак, Осиё чемпионати ўйинларини Ўзбекистон миллий терма жамоаси футболчилари ҳам кўриб чиқсалар яхши бўлар эди. Легионерлар ҳам, легионермаслар ҳам. Айниқса, чорак финалга алоҳида эътибор беришсин. Шунда балки жаҳон чемпионати йўлланмаси қўлга киритилган тақдирда қандай байрам бўлишини тушуниб етарлар. Яна шуни ҳам ҳисобга олишсин-ки, агар улар мундиалга чиқсалар, бундай байрамдан ўн ва балки юз чандон аълороғи бўлади. Чунки «Ўзбекистон» спорт мажмуасига 3000 мухлис келган бўлса, «Бунёдкор» стадионида 35 минг ишқибоз ўтиради ва яна шунчаси кўчада қолиб кетган бўлади. Бу ёғини ҳам инобатга олишсин. Наҳотки улар мана шундай байрамнинг бош қаҳрамони бўлишни истамайдилар? «Ўзбекистон» спорт мажмуасига йиғилган мухлислар «Рустам, Рустам» дея бақирганини эшитдиларми?
Агар эшитган бўлсалар, улар ҳам мана шундай олқиш олиш учун ўйнасинлар. қачонки шу ишни уддаласалар, Ўзбекистон миллий терма жамоаси ҳам жаҳон чемпионатига йўл олади. Унгача эса аламимизни ўсмирлар, ёшлар ва футзал терма жамоалари қайд этган натижалар билан ёпиб юришга мажбур бўлаверамиз...
Абдуллоҳ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
