Бадиий гимнастика. Ҳамюртларимиз жамоавий баҳсларда ҳам Олимпиада ўйинларига йўлланма олдилар
Бразилиянинг Рио-де-Жанейро шаҳрида бадиий гимнастика бўйича ўтказилаётган лицензион мусобақада мамлакатимиз спортчилари жамоавий баҳсда ҳам муваффақиятли иштирок этиб, XXXI ёзги Олимпиада ўйинларига йўлланмани қўлга киритдилар.
Аввало шуни таъкидлаш жоизки, бадиий гимнастика бўйича жамоавий баҳсларда шу пайтга қадар мамлакатимиз спортчилари Олимпиада ўйинларига йўлланма олишмаган эди. Демак, терма жамоамиз аъзолари бу борада Ўзбекистон спорти тарихида янги саҳифани очдилар.
Жамоавий баҳсларда Ватанимиз шарафини ҳимоя қилган Самира Амирова, Валерия Давидова, Луиза Ганиева, Зарина Қурбонова ҳамда Марта Растобурова ҳал қилувчи финал мусобақасида умумий ҳисобда 32.832 очко жамғариб, Германия терма жамоасидан кейин иккинчи ўринни банд этдилар ва “Рио-2016” Олимпиада ўйинларига йўлланмани қўлга киритдилар.
Эслатиб ўтамиз, жамоавий мусобақада 1-3 ўринларни банд этган жамоалар Олимпиада ўйинларига йўлланма олишди. Ҳамюртларимиз ҳал қилувчи финал баҳсларида Греция, Финляндия, Бразилия, Озарбайжон ва Жанубий Корея терма жамоаларини ортда қолдиришга муваффақ бўлдилар.
Шундай қилиб, 17-22 апрель кунлари Рио-де-Жанейро шаҳрида спорт гимнастикаси, трамполин ва бадиий гимнастика бўйича бўлиб ўтган лицензион мусобақаларда жами 9 нафар спортчимиз XXXI ёзги Олимпиада ўйинларига йўлланма олдилар.
Дастлаб, спорт гимнастикачимиз Антон Фокин “Рио-2016” ўйинларига йўлланмани қўлга киритган бўлса, орадан бир кун ўтиб Оксана Чусовитина фаолиятидаги еттинчи Олимпиада ўйинларига йўлланма олди (бундай кўрсаткичга дунёда ҳеч бир спорт гимнастикачи эриша олмаган).
Шундан сўнг трамполин бўйича бўлиб ўтган мусобақаларда терма жамоамиз етакчиси Екатерина Хилько фаолиятидаги бешинчи Олимпиада ўйинларига йўлланма олди (бундай кўрсаткичга дунёда ҳеч бир трамполинчи эришмаган).
21 апрель санасида бадиий гимнастиканинг шахсий ҳисобдаги баҳсларда Анастасия Сердюкова навбатдаги йўлланмани делегациямиз ҳисобига ёзиб қўйган бўлса, 22 апрель куни Самира Амирова, Валерия Давидова, Луиза Ганиева, Зарина Қурбонова ҳамда Марта Растобуровалардан иборат бадиий гимнастикачиларимиз жамоавий баҳсларда тўрт йилликнинг энг йирик спорт мусобақасида иштирок этиш бахтига муяссар бўлдилар.
Гимнастикачиларимизнинг ўта масъулиятли мусобақаларда эришган муваффақиятлари мамлакатимизда спортнинг ҳар уч тури ҳам йилдан-йилга тараққий этиб бораётганлигини амалда яна бир бора исботлади.
Шундай қилиб "Рио-2016" ўйинларига йўлланма олган спортчиларимиз сони 74 тага етди. Олдинда XXXI ёзги Олимпиада ўйинларининг йўлланмалари ўйналадиган яна кўплаб мусобақалар бор ва умид қиламизки бўлажак мусобақаларда ҳам спортчиларимиз ўзларига билдирилган ишончни аъло даражада оқлайдилар ва "Рио-2016" ўйинларига йўл оладиган ҳамюртларимиз сафи янада кенгаяди.
Манба: olympic.uz
Киритилди: 11:06, 23.04.2016. Ўқилди: 6029 марта. Фикрлар: 1 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Пахтакор
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
