«Краснодар» ҳужумчиси Фёдор Смолов Россия чемпионатининг якунланган мавсумида 20та гол уриб, тўпурар бўлди. У айниқса, чемпионатнинг баҳорги қисмида ўзини кўрсатди. Энди эса мамлакат терма жамоаси билан Францияда бўлиб ўтадиган Европа чемпионатига тайёргарлик кўрмоқда. Ўтган ҳафта «Спорт-Экспресс» нашри футболчи билан суҳбат уюштирди.
- Мавсум аввалида барчаси шундай муваффақиятли кечишини кутганмидингиз? Қайси пайтга келиб тўпурар бўлишингиз мумкинлигини ҳис қилдингиз?
- «Урал» билан ўйиндаги «покер»дан сўнг тўпурарлар баҳсига қўшилганимни ҳис қилдим.
- Охирги турда захира ўриндиғида ўтирдингиз. Агар Промес «хет-трик» қайд этиб, сиздан ўзиб кетди, дейишганида майдонга тушармидингиз?
- Йўқ. Чунки бир қарорга келиб бўлгандим. Қолгани эса Яратганнинг хоҳишига боғлиқ эди. Ўша куни антибиотик қабул қилганим учун ўзимни яхши ҳис қилмагандим.
- Сизга «Спартак»дан қизиқиш бўлганмиди?
- Ҳа, ўтган ёзда.
- Москваликлар яхши шароитларни яратиб берамиз, дейишганми?
- Ҳа.
- Лекин мураббий ким бўлишини билмаганингиз учун таклифни қабул қилмагансиз...
- Бу асосий сабаб эди. Ахир мураббий билан ишлашим керак-ку.
- Романцевнинг айтишича, клуб сиз билан келиша олмаганми, демак музокараларни ёмон олиб борган.
- Менимча, ўша пайт «Спартак»нинг асосий мақсади мураббий билан шартнома имзолаш эди. Барчаси ҳал бўлган пайтда эса мен «Краснодар» билан шартнома тузиб бўлгандим.
- Олег Кононовнинг сизга муносабати қандай бўлди?
- Олег Георгиевичга миннатдорчилик билдираман. «Краснодар»га ўтишим биланоқ у мени қўллаб-қувватлади. Шунингдек, мени марказий ҳужумчига айлантиргани ҳам фойда берди. Шунингдек, жамоадошларимга ҳам миннатдорчилик билдираман.
- Кокорин Химкида «Динамо» дарвозасини ишғол қилди. Сиз ҳам москваликлар дарвозасига гол урдингиз. Ўшанда қанчалик эҳтиросга берилдингиз?
- Ўзгача ҳиссиёт.
- Нима учун?
- Ўзингиз биласиз, «Динамо»да омадим чопмаган. Бир неча бор ижарада ўйнаб, жамоага қайтганман. Лекин ҳар сафар ишим қовушмаган. Уларга нималарга қодир эканлигимни кўрсатишни истагандим. «Урал»да ўйнаганимда ҳам москваликлар дарвозасини ишғол қилганман.
- Нима учун «Динамо»да омадингиз чопмаган?
- Энг аввало, барчасига ўзим сабабчиман. Агар яхши ўйин кўрсатганимда бундай бўлмасди. Бошқа тарафдан эса ёш бўлганман ва қўллаб-қувватлашга муҳтож эдим. Лекин «Динамо»да ҳеч ким бундай қилмаган.
- Айтишларича, «Динамо»да сизга ёки Кокоринга ишонч билдиришга қарор қилишган экан.
- Буни ҳис қилганман.
- Жамоанинг қуйи дивизионга тушиб кетганига муносабатингиз қандай?
- Албатта, ачиндим. Ахир буюк тарихга эга жамоа ҳеч қачон олий дивизионни тарк этмаганди. Охиригача жамоанинг премьер-лигада қолишига ишонгандим.
- «Краснодар» хўжайини Сергея Галицкий сизнинг ўсишингизда қанчалик аҳамият касб этган?
- Жуда катта. У ажойиб инсон. Ундан жуда миннатдорман. Келаси йили «Краснодар» билан Чемпионлар Лигасига чиқиб, шу тариқа миннатдорчилик билдирмоқчиман.
- Тўртинчи ўринни клубдагилар орқага қадам, деб ҳисоблашдими?
- Янги футболчилар келишди. «Краснодар» янги йилгача ва баҳорда иккита бошқа-бошқа жамоага айланди, десам хато бўлмайди. Менимча, медаллар учун имкониятни ЦСКА билан баҳсда эмас, балки «Мордовия»га қарши уй ўйинимиз ва «Уфа» ҳамда «Анжи»лар билан бўлган сафар учрашувларимизда йўқотдик.
- Қозонда «Рубин»га қарши учрашувда сизнинг «офсайд»дан урган голингизни инобатга олишганди. Бундан ажабландингизми?
- Ҳа. Ўша пайт тўпга секин ҳаракат қилдим ва ўйиндан ташқари ҳолатда қолиб кетишимни ҳис қилгандим. Қайсидир маънода ҳакамни оқлашим мумкин. Битта камерада тўп Сигурдссонга тегиб, менга борган.
- Премьер-лигадаги энг кучсиз ҳимоя «Спартак»да экан. Шу фикрга қўшиласизми?
- Бу саволга жавоб беришни истамайман. Чунки бу менга боғлиқ эмас.
- Унда энг кучли ҳимоя қайси?
- ЦСКАда. Чунки бу жамоа ҳимоячилари кўп йиллардан буён бирга тўп суришади. Нафақат ҳимоячилар, балки Вернблум ва Загоевлар ҳам ортга қайтиб ўйнашади.
А. Исроилхонов тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
