Ўзининг ҳал қилувчи паллаларига кириб бораётган ЕВРО-2016 турнири сиз-у бизга ўтган вақт мобайнида бир қатор чиройли голлар, муросасиз учрашувлар, кутилмаган натижалар, ёқимли (балки, кимларгадир ёқимсиз) туйғуларни тақдим этди. Келинг, ўтган ўйинлардаги энг қизиқарли фактлар ҳақида бироз мулоҳаза юритамиз.
Златан Ибрагимовичнинг терма жамоадаги сўнгги ўйини
Швеция термасининг тирик афсонаси - Ибрагимович гуруҳ баҳсларининг Бельгияга қарши кечган 3-тур учрашуви(0:1)да, ўзининг миллий жамоадаги охирги ўйинини ўтказди. Шундай қилиб, Златан ўз-ўзидан терма жамоасиз ва клубсиз қолган дунёдаги энг қиммат ва энг машҳур футболчига айланди. Эслатиб ўтамиз, Ибра Швеция терма жамоасида жами 116та ўйин ўтказиб, 62та гол уришга эришган.
Дебютантларнинг муваффақиятли юриши
Чемпионатга дебютант сифатида ташриф буюрган 5та терма жамоадан 4таси гуруҳдан чиқиш масаласини ижобий ҳал этди. Булар: Уэльс, Шимолий Ирландия, Исландия ва Словакия. Фақатгина Албания гуруҳ баҳсларидан сўнг уйга қайтадиган бўлди. Уэльс терма жамоаси «В» гуруҳида Англияни ортда қолдириб, 1-ўринни эгаллаган бўлса, Словакия ва Шимолий Ирландия ўз гуруҳларида 3-ўринни эгаллаб, мусобақа регламентига кўра, «плей-офф»га йўлланма олишди. Исландия термаси эса, «F» гуруҳида 2-ўринни банд этди. Улар гуруҳда Португалияни 3-ўринда қолишга мажбур этишгани диққатга сазовор.
Украина термаси антирекордни такрорлади
Михаил Фоменко шогирдлари турнир давомида бирорта ҳам гол ура олишмади ва бу борада Европа чемпионатлари тарихидаги антирекордни такрорлашди. Бунгача эса, Дания терма жамоаси ЕВРО-2000 баҳсларида гуруҳда бирорта ҳам гол ура олмаган эди. Бельгия ва Голландия майдонларида ўтган турнирда данияликлар гуруҳда Франция (0:3), Голландия (0:3), Чехия (0:2) терма жамоалари дарвозасига йўл топа олишмаганди. Сўнгги 3та Европа чемпионатида мусобақани голсиз тарк этган терма жамоа бўлмаганини ҳисобга олсак, Украинанинг бу натижаси нақадар ачинарли эканлигини ҳис қилиш мумкин.
Дарио Срна учун кутилмаган нохушлик
Донецкнинг «Шахтёр» клуби ва Хорватия терма жамоаси сардори Дарио Срна учун Франциядаги мусобақа оғриқли хотиралар билан эсда қоладиган бўлди. Хорватларнинг Туркия терма жамоасига қарши кечган 1-тур ўйини пайтида Дарионинг отаси Узейир Срна вафот этди. Бу ҳақда Дарио ҳакамнинг учрашув якунланганини билдирувчи ҳуштаги чалинганда хабар топди ва зудлик билан уйига йўл олди. Тўрт кун давомида отасининг дафн маросимида қатнашиб, ўзида куч топа олган ҳимоячи терма жамоа ихтиёрига қайтиб келди. Хорватларнинг Испания терма жамоасини енгиб, гуруҳда ғолиб бўлишларига катта ҳисса қўшди ва ҳақли равишда гуруҳ босқичидан кейин тузилган рамзий терма жамоадан жой олди.
Криштиану Роналдунинг тарихий голи
Аввалига португалларнинг ишлари унчалик юришмади. «F» гуруҳида Венгрия, Исландия ва Австрия билан баҳс олиб борган Фернанду Сантуш шогирдлари биринчи ўйинда кутилмаганда Исландия билан дуранг натижа қайд этишди - 1:1. 2-турда эса Австрия терма жамоасига қарши кечган баҳсда нурсиз дурангга имзо чекишга мажбур бўлишди. Венгрия билан ҳал қилувчи баҳсда эса, португаллар етакчиси Криштиану Роналду терма жамоасини шармандаликдан қутқариб қолди - 3:3. Роналдунинг учрашувдаги биринчи голи нафақат чиройлилиги, балки тарихий аҳамият касб этгани билан ҳам ёдда қоладиган бўлди. Шундай қилиб, Криштиану Роналду ўзи қатнашган 4та Европа чемпионатида гол урган ўйинчига айланди: ўз ватанида ўтган Евро-2004, Австрия ва Швейцариядаги Евро-2008, Украина ва Польшадаги Евро-2012 ва ниҳоят, Францияда ўтаётган мазкур чемпионат. Ушбу турнирларнинг барчасида Португалия терма жамоаси сардори гол уришга эришган.
Мусобақанинг қонли старти!
Чемпионатнинг илк кунлариданоқ бошланган мухлислар ўртасидаги жанжаллар ушбу турнирни Европа чемпионатлари тарихидаги энг тартибсиз мусобақага айлантирди. Бу борада, аввало, инглиз ва рус фанатлари «етакчилик қилишди». Англия-Россия ўйинидан сўнг, Марсель шаҳрида юзага келган жанжаллар оқибатида 30дан ошиқ одамга тан жароҳати етказилган ва 1 киши вафот этган. 20 нафар россиялик мухлисларни тартиб-интизом мутасаддилари Франциядан чиқариб юборишга мажбур бўлишди. Бу ҳали ҳаммаси эмас эди. Лилль шаҳрида Германия - Украина баҳси олдидан эса, тахминан 30 нафар немис мухлислари украиналик ишқибозларга ҳужум уюштиришган. Ниццада эса Польша - Шимолий Ирландия учрашувидан сўнг ирландиялик 24 ёшли мухлис вафот этди.
Шу тариқа Францияда ўтаётган турнирда аянчли ҳолатлар кўп кузатилди. Умид қиламизки, буёғига ЕВРО-2016 сиз-у бизга фақат ҳаяжонли ва қувончли онларни тақдим этади.
Ҳожиакбар Шерматов тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
