Спорт оламининг энг йирик мусобақаси Олимпия ўйинларида иштирок этиш ҳар бир спортчининг улкан орзуси. Олимпиада ўйинларида ғолиблик шоҳсупасига кўтарилиш икки ҳисса шарафдир.
Бразилиянинг Рио-де-Жанейро шаҳрида ўтказилаётган XXXI ёзги Олимпия ўйинларида бугун ҳамюртимиз Ҳасанбой Дўсматовнинг ғалабаси шарафига Давлатимиз мадҳияси янграб, музаффар байроғимиз сарбаланд кўтарилди. Бу мамлакатимиз Истиқлолга эришганидан буён Олимпия ўйинларида қўлга киритилган еттинчи олтин медалдир.
Бокс бўйича энг енгил вазн тоифасида Ватанимиз шарафини ҳимоя қилган Ҳасанбой Дўсматов бугун бўлиб ўтган ҳал қилувчи финал жангида колумбиялик Мартинес устидан зафар қучиб, ўз вазнида дунёнинг биринчи рақамли спортчиси эканлигини амалда исботлади.
“Ватанимиз байроғини Олимпия ўйинларида сарбаланд кўтарганимдан жуда ҳам бахтиёрман. Бу бутун Ўзбекистоннинг ғалабасидир. Мен озод ва обод юртда туғилиб вояга етганлигимдан ва халқаро майдонда Ўзбекистон номидан майдонга чиқаётганлигимдан доимо фахрланаман. Муҳтарам Президентимиз биз ёшларга қарата маррани доимо юқори олинг, зеро Ўзбекистон ёшлари ҳеч кимдан кам эмас ва ҳеч қачон кам бўлмайди деган сўзлари қалбимга абадий мухрланган. Президентимизнинг ушбу даъватлари барча ўзбекистонлик ёшлар каби мени ҳам доимо янгидан-янги марралар сари чорлайди. Фурсатдан фойдаланиб, биз спортчиларга қаратилаётган алоҳида эътибор ва кўрсатилаётган ғамхўрлик учун Давлатимиз ҳамда хукуматимиз раҳбариятига чексиз миннатдорчилигимни билдирмоқчиман. Олимпия ўйинларидаги олтин медалимни Ўзбекистон Республикаси Президентига ҳамда барчамиз учун энг азиз, энг улуғ байрам Мустақиллигимизнинг 25 йиллигига бағишлайман”, - дейди Ҳасанбой Дўсматов.
Ҳасанбойни яқиндан билганлар уни туғма истеъдод соҳиби эканлигини бод-бод такрорлашади. Болалигидан спортга меҳр қўйган Ҳасанбой ўз олдига юксак марраларни қўйди ва ана шу мақсадга эришиш йўлида тингмай ўз устида ишлаб, маҳоратини тоблаб борди. Не бахтким, бундан 16 йил аввал мурғак қалбга тугилган эзгу ният бу кун ижобат бўлмоқда.
“2000 йили Австралиянинг Сидней шаҳрида ўтказилган Олимпиада ўйинларида 7 ёшли болакай эдим. Ҳали-ҳамон ёдимда, ҳамюртимиз Муҳаммадқодир Абдуллаев бокс бўйича мусобақада барча рақиблари устидан зафар қучиб, ғолиблик шоҳсупасига кўтарилганини бутун оиламиз билан кўрганмиз. Шунда бир кун келиб мен ҳам Олимпия чемпиони бўламан дея ният қилганман. Ниятларимиз ижобат бўлганидан жуда ҳам хурсандман”, - дея болалик хотираларини ёдга олди қаҳрамонимиз.
Яхши ният бир кун келиб албатта рўёбга чиқишига Ҳасанбойнинг тарихий ғалабаси мисолида яна бир карра амин бўлиш мумкин. XXXI ёзги Олимпия ўйинларида Мексика, Қозоғистон, АҚШ ҳамда Колумбиялик чарм қўлқоп усталарини мағлуб этган ўзбек ўғлони Ҳасанбой Дўсматовнинг номи эндиликда Олимпиада ғолиблари қаторидан ўрин эгаллади.
“Ҳасанбойнинг ғалабаси қалбимизда фахр ва ғурур ҳисларини янада жўш урдирди – дейди Ўзбекистон Миллий олимпия қўмитаси Бош котиби Ойбек Касимов. Маҳоратли чарм қўлқоп устамизни ғалабаси шарафига музаффар байроғимиз кўтарилаётганда аксарият ватандошларимиз каби кўзларимга хурсандчилик кўз ёшлари келди. Шуни ишонч билан айта оламанки, маҳоратли боксчимизнинг ушбу оламшумул ғалабаси Рио-де-Жанейро шаҳрида ўтказилаётган XXXI ёзги Олимпия ўйинларида Ватанимиз шарафини ҳимоя қилаётган барча спортчиларимизни янада рухлантириб, янгидан-янги ғалабалар сари чорлайди”.
Ҳа, XXXI ёзги Олимпия ўйинларида мамлакатимиз чарм қўлқоп усталари ўзларининг зафарли одимлари билан юртдошларимизни хушнуд этишда давом этишмоқда. Айни пайтга келиб Олимпия ўйинларининг бокс мусобақаларида Ўзбекистон терма жамоаси битта олтин (-46 кг, Ҳасанбой Дўсматов) ва битта бронза медалини (-91 кг, Рустам Тўлаганов) қўлга киритган ҳолда спортнинг ушбу тури бўйича ўтказилаётган мусобақада иштирок этаётган давлатлар орасида пешқадамлик қилишмоқда. Албатта, бу ҳали ҳаммаси эмас. Олдинда мамлакатимиз чарм қўлқоп усталари иштирокидаги қатор муҳим жанглар турибди.
Жумладан, тўрт нафар боксчимиз Мурод Аҳмадалиев (-56 кг), Фазлиддин Ғоипназаров (-64 кг), Бектемир Мелиқўзиев (-75 кг) ва Баҳодир Жалолов (+91 кг) чорак финалда рингга кўтарилишса, Шаҳрам Гиясов (-69 кг) 15 август куни финал йўлланмаси учун марокашлик боксчига қарши баҳс юритади. Шу куни Шаҳобиддин Зоиров (-52 кг) куни чорак финал йўлланмаси учун рингга чиқади.
Яна бир ҳушхабар. 14 август куни делегациямиз ҳисоби яна бир бронза медали ҳисобига бойиди. Юнон-рум кураши бўйича 59 кг. вазн тоифасида баҳсларга киришган ҳамюртимиз, икки карра жаҳон чемпионати совриндори, уч карра Осиё чемпиони Елмурат Тасмурадов саралаш баҳсларида Сербия ва Корея Халқ Демократик Республикаси вакилини, учинчи ўрин учун кечган беллашувда эса қирғизистонлик Арсен Ералиевни мағлуб этиб, медаллар коллекциясига Олимпия ўйинларининг бронза медалини ҳам қўшиб қўйди.
Шундай қилиб, XXXI ёзги Олимпия ўйинларида ҳозирча 1 та олтин ва 4 та бронза медалига эга бўлган Ўзбекистон делегацияси умумжамоа ҳисобида 206 давлат орасида 36 ўринда бормоқда.
Шавкат Жалилов
Анвар Ильясов
Рио-де-Жанейро шаҳридан махсус тайёрланди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
