Олимпиада ўйинларининг бирор-бир спорт мусобақасига ташриф буюрган муҳлисларни бир овоздан Ўзбекистон ўғлонини олқишлаб турганнини ҳеч кўрганмисиз. Бугун биз бунинг шоҳиди бўлдик.
Бразилиянинг Рио-де-Жанейро шаҳрида давом этаётган XXXI ёзги Олимпиада ўйинларининг оғир атлетика бўйича ўтказилаётган мусобақаларида ҳамюртимиз Руслан Нурудинов қўлга киритган оламшумул ғалабаси билан нафақат юртдошларимизнинг, балки спорт иншоатига ташриф буюрган турли миллат вакилларининг ҳам ёқимтойига айланди, десак муболаға қилмаган бўламиз.
Айниқса, полвонимиз силтаб кўтариш машқида 237 кг. тошни кўтариб, Олимпиада ўйинларининг олтин медали билан бирга Олимпия ўйинларининг рекордини ҳам янгилаганда зал ларзага келди. Барча-барча Русланни тарихий ғалаба билан олқишлай бошлашди.
Ҳа, мардонавор спортчиларимизнинг бирин-кетин совринли ўринларни қўлга киритаётганликлари қолган юртдошларимизда ҳам ғалабага бўлган интилиш ҳиссини, ўзига бўлган ишончни янада юксалтирмоқда. Бугун мамлакатимиз вакилларининг қўлга киритаётган муваффақиятларига кўпчилик хавас қилаётгани ҳам бор гап.
Эътибор беринг, қаторасига иккинчи кундирки Олимпия ўйинларида Ўзбекистон байроғи сарбаланд кўтарилмоқда. 14 август куни боксчимиз Ҳасанбой Дўсматов шоҳсупанинг энг юқори поғонасига кўтарилган бўлса, бугун Руслан Нурудиновнинг ғалабаси шарафига музаффар байроғимиз сарбаланд кўтарилди. Бунақаси Ўзбекистон спорти тарихида биринчи маротаба кузатилмоқда. Мана шундай дамларда озод ва обод юрт қадрини, мустақиллик неъмати нечоғлик тотли эканлигини дилимизнинг туб-тубидан ҳис қиламиз. Қалбларимиз фахр ва ифтихор ҳисларига лиммо-лим бўлади.
“Жуда ҳаяжондаман. Қалбимда кечаётган ҳис туйғуларни икки оғиз сўз билан таърифлаб беролмайман. Бу барча юртдошларимиз ғалабасидир. Фурсатдан фойдаланиб Давлатимиз ва хукуматимиз раҳбариятига, мени бугун бевосита ва билвосита қўллаб-қувватлаган барча-барчага самимий миннатдорчилигимни изҳор қилмоқчиман”, дейди Руслан Нурудинов.
“Бугун Руслан Нурудинов қайд этган натижани ҳақиқий мўжизага қиёслаш мумкин, - дейди Халқаро оғир атлетика федерацияси президенти Томаш Аян. Бу ўз навбатида Ўзбекистонда спорт қай даражада тараққий этиб бораётганлигининг ёрқин исботидир. Очиғи, Рио ўйинларида юртдошларингиз томонидан қайд этилаётган натижалар ҳар қанча тахсинга сазовор. Олимпиада ўйинларида бундай натижаларга ўз-ўзидан эришиб бўлмайди. Мен Ўзбекистонда бир неча маротаба бўлганман ва юртингизда соғлом турмуш тарзини қарор топтириш йўлида бевосита Давлатингиз раҳбари томонидан амалга оширилаётган ишларга қойил қолиш керак. Бунинг самараси бугун Олимпия ўйинларида ҳам яққол қўзга ташланмоқда. Шуни ишонч билан айта оламанки, Олимпиада ўйинларининг навбатдаги кунларида ҳам Ўзбекистон спортчилари нималарга қодирликларини бир неча бор исботлайдилар ва Олимпия ўйинларида совриндор бўлган спортчиларингиз сафи янада кенгаяди”.
Шу ўринда эътиборингизни яна бир жиҳатга қаратсак. Мамлакатимиз спортчилари “Рио-2016” ўйинларига қадар мустақил жамоа сифатида беш бор ёзги Олимпия ўйинларида иштирок этишган ва фақатгина 2004 йили Греция пойтахти Афина шаҳрида бўлиб ўтган Олимпия ўйинларида иккита олтин медалга сазовор бўлганлар. Айни пайтга келиб спортнинг қатор турларида спортчиларимиз ҳал қилувчи финал баҳсларига етиб келишган ва умид қиламизки мазкур Олимпия ўйинларида Давлатимиз байроғи яна бир неча бора сарбаланд кўтарилади. Бу йўлда спортчиларимизга омад ва зафарлар тилаб қоламиз.
15 август кунги мусобақалар якунларига кўра делегациямиз аъзолари 2 та олтин ва 4 та бронза медалини қўлга киритган ҳолда умумжамоа ҳисобида 206 давлат орасида 27-ўринда боришяпти.
Шавкат Жалилов
Анвар Ильясов
Рио-де-Жанейро шаҳридан тайёрланди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
