Англия Премьер-лигасининг 9-тури доирасида бўлиб ўтган марказий ўйинда "Челси" ўз майдонида "Манчестер Юнайтед"ни йирик ҳисобда тор-мор келтирди.
Лондонликларнинг баҳснинг 35-сониясидаёқ ҳисобни очишга муваффақ бўлишди. Марказдан олдинги чизиққа етказилган узатма учун Педро чаққонлик қилиб Смоллинг ва Блиндни орда қолдирди, Де Хеани алдаб ўтди ва бўш дарвозани ишғол қилди.
Ушбу гол манкунианликлар учун жиддий зарба бўлди ва Моуриньонинг барча режаларини чиппакка чиқарди. Бошқа томондан омад ҳам "Челси" томонида бўлганини бўлганини таъкидлаш лозим. Уларнинг дарвоза томон берган ҳар бир аниқ зарбаси голга айланди. Ўйиннинг 21-дақиқасида бурчакдан етказилган узатма натижасида тўп "МЮ" футболчилари орқали дарвозабон майдончасидаги Кэхиллга келиб тушди ва "Челси" ҳимоячиси яқин масофадан дарвозани ишғол қилди.
Иккинчи бўлимда манчестерликлар вазиятни ўнглашга интилишди, аммо Азар томонидан киритилган тўп уларни тўла "нокаут"га учратди. Эден жарима майдончаси ичида тўпни қабул қилди ва олис бурчакка аниқ зарба берди. Орадан кўп ўтмасдан Н'Голо Канте "Челси" сафидаги ўзининг илк голини уришга муваффақ бўлди.
Шу тариқа, "Челси" футболчилари клуб хўжайини Роман Абрамовичнинг эртага бўладиган 50 йиллик юбилейи учун муносиб совға тайёрлашди. Жамоа ўз очколарини 19тага етказиб, пешқадамларга деярли етиб олди. "МЮ" эса 14 очко билан 7-ўринда қоладиган бўлди.
АПЛ, 9-ТУР
Челси – Манчестер Юнайтед 4:0 (2:0, 2:0)
Голлар: 1:0 – 1 Педро, 2:0 – 21 Кэйхилл, 3:0 – 62 Азар, 4:0 – 70 Канте.
Челси – Куртуа, Давид Луиз, Кэйхилл, Алонсо, Аспиликуэта, Матич, Мозес, Педро (Чалоба, 71), Канте, Азар (Виллиан, 78), Диего Коста (Батшуайи, 78).
Манчестер Юнайтед – Де Хеа, Валенсия, Смоллинг, Байи (Рохо, 52), Блинд, Лингард (Марсьяль, 65), Феллайни (Мата, 46), Эррера, Погба, Рэшфорд, Ибраҳимович.
Огоҳлантиришлар: Педро (1), Байи (29), Давид Луиз (41), Алонсо (66), Погба (75).
Матнда хатолик топсангиз, ўша хатони белгилаб, бизга жўнатинг (Ctrl + Enter).