Ўзбекистон ўсмирлар терма жамоаси кетидан ёшлар термамиз ҳам ўз олдига қўйилган вазифани бажара олмади. Жасур Абдураимов жамоаси ҳам чорак финалда имкониятни бой берди.
Ўйин, футболчиларнинг техник маҳорати борасида жамоамиз Эрондан кучли эди. Аммо форслар кучли жиҳатларимизни имкон қадар йўққа чиқариб, ожиз томонимиздан фойдалана олишди.
Эронликлар майдоннинг ҳар қандай нуқтасидан белгиланган жарима тўпини тўғри бизнинг жарима майдончамизга етказиб, ўйин бошидан "стандарт"лардан фойдаланишга ҳаракат қилишди. Ана шундай уринишлардан бири 14-дақиқадаёқ уларга наф келтирди. Жаримадан етказилган тўпга Шакарий чалқанча услубда зарба беришга уринди, аммо тўп унинг ёнида турган Жаъфарийга келиб тушди. Ризо яқин масофадан аниқ зарба билан дарвозани ишғол қилди.
Бундай савиядаги учрашувда кам хато қилган жамоа ғалаба қозониши ҳеч кимга сир эмас. Эронликлар гол уриб олишганидан кейин кўпчилик бўлиб ҳимояланиб, бехато ўйнашга интилишди. Танаффусга қадар терма жамоамиз тўла устунликка эга бўлиб, бир қатор вазиятлар яратишди. Баъзи вазиятларда омад форсларга кулиб боққанини ҳам таъкидлаш лозим. Жумладан, Яхшибоев узатма бераётганида ҳимоячининг оёғига тегиб, дарвозага йўл олаётган тўп устунга тегиб майдонни тарк этди.
Ким билади дейсиз, балки эронликлар ғалабани кўпроқ хоҳлашгандир. Ҳар ҳолда, футболчиларимиз гол уриши шарт бўлган вазиятлар рақиб футболчилари қаердандир пайдо бўлиб, ҳамиша зарба йўлига ғов бўлишнинг уддасидан чиқаверишди. Шароф Муҳиддиновнинг кучли зарбалари борлигини кўрдик, аммо эронлик посбон ҳам бўш келмади.
Иккинчи бўлим бошланиб, жамоамиз катта куч билан олдинга ташланаётган пайтда Эрон яна йўқ жойдан гол уриб кетди. Футболчиларимиз майдон марказида тўпни йўқотишди ва рақиб футболчиси тўпни олдинга чизиққа тепиб юборди. Марказий ҳимоячиларимиз тўпни тепиб юбориш ўрнига тезликда Жаъфарийга ютқазиб қўйишди ва ҳужуэмчи яккама-якка вазиятда дарвозани ишғол қилди.
Ана шу гол ўзбекистонликлар руҳий жиҳатдан қаттиқ таъсир кўрсатди шекилли, улар биринчи бўлимдагидек дадил ҳаракат қила олишмади. "Насаф" ҳужумчиси Бобур Абдухолиқовнинг зарбаларига аниқлик етишмади. Форслар иккинчи бўлимда майдонни травматология шифохонасига айлантириб юбориб, имкон қадар ўйинни "совутиш"га муваффақ бўлишди. Эрон ёшлар терма жамоаси ўз мақсадига эришди ва 15 йилдан кейин илк марта Жаҳон чемпионати йўлланмасини қўлга киритди.
Ўзбекистоннинг ўсмирлар ва ёшлар терма жамоалари бу галги Осиё чемпионатларини муваффақиятсиз ўтказган ҳолда, Мундиал йўлланмасини қўлга кирита олмади.
Ёшлар ўртасидаги Осиё чемпионати. Чорак финал.
ЎЗБЕКИСТОН - ЭРОН - 0:2 (0:1)
Голлар: Ризо Жаъфарий (14, 47)
Огоҳлантиришлар: Азизжон Ғаниев (45+2), Жавоҳир Эсонқулов (84) — Нима Тоҳирий (29)
Ўзбекистон: 1.Умиджон Ҳамроев, 3.Ҳожиакбар Алижонов, 4.Исломжон Қобилов (С), 5.Хушнудбек Авилов, 6.Азизжон Ғаниев, 9.Жасурбек Яхшибоев, 11.Бобур Абдухолиқов (Жавоҳир Эсонқулов 74), 14.Шароф Муҳиддинов, 15.Ойбек Рустамов, 19.Достон Ибрагимов (Саиджамол Давлатжонов 55), 20.Ҳусниддин Ғофуров (Шоҳрух Маҳмудҳожиев 83)
Эрон: 12.Шаҳоб Одилий, 3.Али Шожаий, 4.Ориф Ғуломий, 5.Нима Тоҳирий, 6.Муҳаммад Султонмеҳр (Али Таҳеран 56), 7.Ризо Шакарий (Ҳуссайн Сакий 90+2), 9.Меҳди Меҳдихоний, 13.Умид Нур Афкан (С), 19.Ризо Жафарий (Мужтаба Нахариан 87), 20.Шаҳин Аббосиан, 23.Абулфазл Раззоғпур
Бош ҳакам: Муҳаммад Тақи (Сингапур)
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
