Қиммат трансферлар, ярим ҳимояда режанинг йўқлиги, футболчилар ва раҳбарият ўртасидаги совуқ муносабат, буларнинг барчаси Энрике «Барселона»си ва Моуриньонинг «Реал»ида кўришимиз бўлган ҳолатлар…
Роллар ўзгармоқда. Яқин ўтмишда ҳам, “Барселона” ўз тарбияланувчиларининг кучига суянган бир пайтда “Реал” Мадрид суперюлдузлар сотиб олиш сиёсати ва шов-шувлар кўтариш билан машхур эди. Ҳозирда эса ҳаммаси аксига айланиб кетди.
Ўтган ёзги трансфер мавсумида “Барселона” “Реал”дан анча кўп харажат қилди. Тўғри, «Реал»га қўйилган таъқиқни ҳам эсдан чиқармаслик лозим. Луис Энрике Пако Алкасерни 30 миллион еврога сотиб олди ва клуб тарбияланувчиси Мунирни ижарага бериб юборди. Бундан ташқари, кўпчилик мухлислар Серхи Самперга имконият берилишини истаб турган бир пайтда, клуб раҳбарияти Андре Гомеш учун барча бонусларни ҳисоблаганда 35 миллион евронинг баҳридан ўтди.
Мунир ва Сампер “Барса”нинг ўйин услубига мослашган ва ҳеч шубҳасиз, уларнинг ўрнига келган икки футболчидан қолишмайдиган ўйин намойиш эта олишлари аниқ эди. Бироқ, клуб “Реал”нинг ўтмишдаги сиёсати каби йўл тутди, ҳамён ёшлар тизимидан устун келди.
Бунга қарши ўлароқ, мадридликлар ўз тарбияланувчиси Алваро Моратани жамоага қайтарди. Асосий таркибдан Лукас Васкес, Начо, Марко Асенсио ёки Марианоларга имкон бера бошлади. Ушбу мавсумда Фабио Коэнтраудан ташқари барча захира ўйинчилари ўз номига гол ёздириб қўйди. Зидан эса асосий юлдузларга боғланиб қолмаслик учун ҳаракат қилмоқда.
“Камп Ноу”да эса Месси, Неймар, Суарес учлиги жамоани қутқармоқда. Бир пайтлар ўз услуби билан дунёга танилган ярим ҳимоя аввалгидек эмас. Фалсафа нуқтаи назаридан қараганда, “Реал” ҳозирда азалий рақибидан олдинда бораётганини кўришимиз мумкин.
Мураббийлари фаолиятида ҳам фарқ яққол кўзга ташланмоқда. Зидан матбуот анжуманларида ўз харизмасини кўрсатаётган бўлса, Луис Энрике Моуриньонинг “Реал”ни бошқарган давридагидек журналистлар билан талашиб-тортишиш билан ўтказмоқда.
Португалиялик мураббий билан яна бир ўхшашлик бор. Шу йилнинг январида “Барселона” ва Луис Энрике ФИФАнинг “Бест” совринида қатнашишни истамади. Худди Моуриньо ва унинг шогирдлари “Олтин тўп – 2012” совринига боришни маъқул кўрмагани каби.
Энг муҳими, ўз ўйинидаги ожиз нуқталарни яхшилаш ўрнига, клуб футболчилари барчасида ҳакамни айблай кетишди. Моуриньо бошчилигидаги “Реал” ҳам ўз вақтида ҳакам томон танқидлар тошини ёғдирган эди.
“Ўзгача”нинг даврида мадридликлар қарши ҳужумларда ажойиб ҳаракат қиларди. Кўпчилик жамоани чуқур ҳимояланаётган жамоаларга қарши ҳужум режаси йўқлиги, ярим ҳимояда яратувчанлик етишмаслигида айблаганди. “Барселона” ҳам ҳозирда айнан шу йўлдан бормоқда.
Яна бир муҳим жиҳат ҳам бор. Клуб раҳбарияти жамоа аъзолари билан самимий муносабатда эмас. Суарес раҳбариятни аргентиналик юлдузнинг шартнома музокаралари бўйича айблай кетди. Шу ҳафтада эса Дани Алвес клуб директорларини иккиюзламачиликда айблади.
Олдин эса айнан Мадридликлар “Сантяго Бернабеу”да афсона мақомига эга Икер Касиляс билан шундай муносабатда бўлган эди. Ҳозирги пайтда, “Реал”да барчаси ажойиб кўринмоқда, муаммолар эса каталонияликларда тўпланиб қолган.
“Барселона” бир неча мавсум олдинги “Реал”га айланиб қолган. Бу мавсум якуни қандай бўлишидан қатъи назар, клуб ёзда ўзининг туб қадриятларини тиклаши керак бўлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
