1956 йили илк марта ўтказилган Осиё кубогининг қитъа футболида 1-рақамли мусобақага айланиши осон кечмаган. Зеро, ўша вақтлар улкан Осиёда футболи ривожланган мустақил давлатлар саноқли эди. Ҳа, Исроил ва Гонконг терма жамоалари чиндан ҳам, кучли саналган. Жанубий Вьетнам миллий жамоаси эса фақат сиёсий сабаблар туфайли ўзини кўрсатишга зўр берган.
Фақат 90-йиллар бошига келиб, ҳаммаси нисбатан меъёрга тушди. Яъни жамоаларда қитъа кубогига нисбатан қизиқиш бир мунча ортди. Ҳозиргача атиги 8та терма жамоага Осиё футболи бош совринини ютиш насиб этгани кўп нарсадан далолат.
Булар - Япония, Саудия Арабистони, Эрон, Ж.Корея, Исроил, Қувайт, Ироқ ва «бегона» Австралия. Ишонмаслигингиз мумкин, лекин бу факт: Ҳиндистон ва Мьянма термалари вақтида мазкур турнир финалига чиқишган (тегишлича 1964 ва 1968 йилларда).
*** Осиё кубоги-2019 турнири мезбони бўлишга даъвогарлик қилган, лекин кейинроқ аризани қайтариб олган мамлакатлар: Баҳрайн, Хитой, Ливан, Малайзия, Уммон, Саудия Арабистони ва Таиланд.
*** ФИФА жаҳон чемпионати саралаш ўйинларига ҳакам тайинлашнинг ўзига хос тизимига амал қилади. Лекин ЖЧ-2002 саралаши доирасидаги Хитой - Ўзбекистон ўйини Коста-рикалик Родриго Бадилья ва Осиё кубоги-2004 гуруҳ босқичида кечган Ўзбекистон - Саудия Арабистони учрашуви бенинлик Коффи Кожага топширилгани сабабини тушунтира оладиган мутасадди топилмаса керак.
*** ФИФА Ижроий қўмитасида ишлайдиган осиёлик функционерлар: вице-президент: шайх Салмон Бин Иброҳим ал Халифа (Баҳрайн), аъзолар: шаҳзода Абдуллоҳ (Малайзия), шайх Аҳмад ал Сабоҳ (Қувайт), Козо Ташима (Япония).
*** ФИФА Одоб-ахлоқ (этика) қўмитасида ишлайдиган осиёлик функционерлар: Алан Салливан (Австралия), Акихиро Хара (Япония).
*** Осиёда жаҳон чемпионатлари саралаши мутлақ тўпурарларидан бири - бу Япония термаси афсонаси «Қирол Казу», яъни машҳур Казуёши Миура. 50 ёшини қаршилаганига қарамай, ҳамон профессионал даражада ўйнаётган ҳужумчи ЖЧ-94 саралашида 13та, кейинги циклда эса 14та гол урган. Демак, Миура ҳисобида жами 27та гол бор.
Умуман, бу футболчи «самурайлар» сафида 11 йил (1990-2000) ўйнаб, 55та голга муаллифлик қилган. Миура хусусан, Ўзбекистон терма жамоаси дарвозасини нақ 5 марта ишғол қилган. Юқорида таъкидланди, «Қирол Казу» айни пайт ҳам яшил майдонларда жавлон урмоқда («Йокогама» ФК сафида).
*** Япония J-лигасининг 2016 йилги мавсумида пойтахт - Токио мегаполисининг ўзидан 7та жамоа қатнашди: «Токио», «Кашива Рейсол», «Кавасаки Фронтале», «Омия Арижа», «Шохан Беллмаре», «Урава Редс Даймондс», «Йокогама Маринос». Жорий мавсум ҳам шу 7та клуб олий дивизионда иштирок этяпти. Айтганча, амалдаги чемпион Токиодан эмас - «Кашима Антлерс».
*** Қатарнинг «Ал-Райян» клуби жорий мавсум 50 йиллик юбилейини нишонлайди. 1967 йили Ал-Райян музофотида ташкил топган бу клубга айни пайт даниялик таниқли мураббий Микаэль Лаудруп бош мураббийлик қилмоқда. «Ал-Райян» Қатарнинг 8 карра чемпионидир. Хусусан, аввалги мавсум ҳам айнан шу жамоа олтин медаль соҳибига айланганди. Эътиборли факт: 1998 йилдан буён «Райян»ни фақат хорижлик мураббийлар бошқаришяпти.
*** «Қизилқум» клуби бундан 50 йил муқаддам Навоий кон-металлургия комбинати ишчилари томонидан «Прогресс» номи остида тузилганди. Бу жамоага Зарафшон шаҳри ташкил топганидан 2 йил ўтиб, асос солинган. Жамоа ортда қолган 50 йиллик даврда 3та ном остида фаолият юритди: «Прогресс», «Зарафшон» ва «Қизилқум». Навоийликлар 2002 йили Ўзбекистон олий лигасида 3-ўринни банд этишди ва бу ҳозиргача клуб тарихидаги энг яхши натижа бўлиб турибди.
*** Япония ва Ж.Корея терма жамоалари ўртасидаги қарама-қаршилик Жануби-Шарқий Осиёдаги энг шиддатли дерби саналади. Икки жамоанинг ўзаро ҳисоб-китоби 1954 йилнинг 7 мартидан бошланган. Сўнгги тўқнашув эса 2015 йилнинг 5 августида кузатилди. Айни пайт устунлик корейслар томонида: 40та ғалаба, 23та дуранг, 14та мағлубият. Тўплар нисбати: 117-69.
*** ФИФА томонидан жорий йил 9 март куни эълон қилинган сўнгги жаҳон рейтингининг дастлабки юзталигида Осиёдан 10та терма жамоа бор. Таққослаш учун айтсак, АФК (Африка)нинг нақ 27та (!) аъзоси топ-100дан жой олди.
*** Футбол қироли Пеле ўзига хос «ФИФА 100» рўйхатини тузган ва бундан кўпчилик хабардор. Мазкур элит рўйхатга Осиёдан атиги 2 нафар футболчи киритилган - Хидетоши Наката (Япония) ва Хон Мюн Бо (Жанубий Корея). Пеле талқинидаги кучлилар рейтинги 2004 йилнинг 4 март куни Лондонда эълон қилинганди.
*** Спорт экипировкалари ишлаб чиқаришга ихтисослашган дунёга машҳур Joma компанияси қитъамизда Ўзбекистон, Қирғизистон ва Мальдив ороллари терма жамоаларини кийинтиради.Шунингдек,Осиёдагибир қатор клублар Испания бренди билан ҳамкорлик қилишади: «Ал-Иттиҳод», «Ал-Тавон», «Ал-Ваҳда», «Ҳажер» (Саудия Арабистони); «Пирузи» (Эрон); «Сафа» (Ливан); «Истиқлол» (Тожикистон). Ўзбекистоннинг нақ 12та клуби айнан Joma мижозидир.
*** Тransfermarkt.co.uk манбаси маълумотларига таянсак, ота-бола футболчиларнинг миллий жамоада кўп ўйнаш бобидаги рейтингида Жанубий кореялик Бум Кун Ча (135та ўйин) ва Ча Ду Ри (74та ўйин) етакчилик қилишмоқда. Иккиси Ж.Корея терма жамоа сафида умумий ҳисобда жами 209 марта майдонга тушган. ОФК бўйича иккинчи яхши натижа сингапурлик Фанди Аҳмад ва Ирфан Аҳмадга тегишли - 102та ўйин.
*** ОФК миқёсидаги жаҳон чемпионатлари саралашида энг кўп ўйин бошқарган ҳакамлар тўртлиги: Абдул Малик (Сингапур, 13та), Равшан Эрматов (Ўзбекистон, 12та), Ким Донг Жин (Ж.Корея, 11та), Бенжамин Уильямс (Австралия, 11та).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
